ହାଇଦ୍ରାବାଦ:ବିବାଦରେ ଲୋକପ୍ରିୟ ବଲିଉଡ଼ ଅଭିନେତା ରଣବୀର କପୁର । କେକ୍ କାଟି ଖ୍ରୀଷ୍ଟମାସ ପାଳନ କରିବା ପଡିଲା ମହଙ୍ଗା । ଏବେ ରଣବୀର କପୁରଙ୍କ ଏକ ଭିଡିଓ ଖୁବ ଭାଇରାଲ ହେଉଛି । ଯେଉଁଥିରେ ରଣବୀର କେକ୍ ଉପରେ ମଦ ଢାଳି 'ଜୟ ମାତା ଦି' ନାରା ଲଗାଇଥିବା ଦେଖିବାକୁ ମିଳିଛି । ଯାହାକୁ ନେଇ ବର୍ତ୍ତମାନ ଅଭିନେତାଙ୍କ ନାଁରେ ମାମଲା ରୁଜୁ ହୋଇଛି ।
ନିକଟରେ ରଣବୀର କପୁର ଏବଂ ଆଲିଆ ଭଟ୍ଟ ପୁରା ପରିବାର ସହ ଧୁମଧାମରେ ଖ୍ରୀଷ୍ଟମାସ ପାଳନ କରିଥିଲେ । ଭାଇରାଲ ଭିଡିଓରେ ରଣବୀର କେକ୍ ଉପରେ ମଦ ଢାଳି ନିଆଁ ଲଗାଇ 'ଜୟ ମାତା ଦି' ନାରା ଲଗାଉଥିବା ଦେଖିବାକୁ ମିଳିଛି । ଏହା ଶୁଣି ସେଠାରେ ଉପସ୍ଥିତ ସଦସ୍ୟ ମଧ୍ୟ ହସୁଛନ୍ତି । ତେବେ ଅଭିନେତାଙ୍କ ଏହି ଭିଡିଓକୁ ଅନେକ ନାପସନ୍ଦ କରିଛନ୍ତି ଏବଂ ରଣବୀରଙ୍କୁ ଖୁବ ଟ୍ରୋଲ କରିଛନ୍ତି । ଲୋକଙ୍କ ଧାର୍ମିକ ଭାବନାକୁ ଆଘାତ ଦେଇଥିବା ଅଭିଯୋଗ କରି ରଣବୀରଙ୍କ ବିରୁଦ୍ଧରେ ମାମଲା ରୁଜୁ କରାଯାଇଛି ।
ବୁଧବାର ରଣବୀରଙ୍କ ନାଁରେ ମୁମ୍ବାଇର ଏକ ପୋଲିସ ଷ୍ଟେସନରେ ମାମଲା ରୁଜୁ କରାଯାଇଛି । ଓକିଲ ଆଶିଷ ରାୟ ଏବଂ ପଙ୍କଜ ମିଶ୍ରଙ୍କ ଜରିଆରେ ଘାଟକୋପର ପୋଲିସ ଷ୍ଟେସନରେ ସଞ୍ଜୟ ତିୱାରୀ ନାମକ ଜଣେ ବ୍ୟକ୍ତି ଅଭିଯୋଗ ଦାଖଲ କରିଛନ୍ତି । ସେ ଦାବି କରିଛନ୍ତି ଯେ, ଭିଡିଓରେ ଅଭିନେତା କେକ୍ ଉପରେ ମଦ ଢାଳି 'ଜୟ ମାତା ଦି' କହୁଛନ୍ତି । ଅଭିଯୋଗରେ ଏହା ଦର୍ଶାଯାଇଛି ଯେ, ହିନ୍ଦୁ ଧର୍ମରେ ଏବଂ ଅନ୍ୟ ଦେବତାଙ୍କୁ ଆହ୍ବାନ କରିବା ପୂର୍ବରୁ ଅଗ୍ନି ଦେବତାଙ୍କୁ ଆହ୍ୱାନ କରାଯାଏ । କିନ୍ତୁ ରଣବୀର କପୁର ଏବଂ ତାଙ୍କ ପରିବାର ଅନ୍ୟ ଧର୍ମର ପର୍ବ ପାଳନ କରୁଥିବା ବେଳେ ଜାଣିଶୁଣି ନିଶା ଦ୍ରବ୍ୟ ବ୍ୟବହାର କରିଛନ୍ତି ଏବଂ 'ଜୟ ମାତା ଦି' ନାରା ଲଗାଇଛନ୍ତି । ଏହାଦ୍ବାରା ଧାର୍ମିକ ଭାବନାକୁ ଆଘାତ ଲାଗିଥିବା ନେଇ ଅଭିଯୋଗକାରୀ ଦାବି କରିଛନ୍ତି । ତେବେ ପୋଲିସ ଏ ମାମଲାରେ କୌଣସି ପ୍ରାଥମିକ ରିପୋର୍ଟ ଦାଖଲ କରିନାହିଁ ।
ଏହା ମଧ୍ୟ ପଢନ୍ତୁ:ଖ୍ରୀଷ୍ଟମାସରେ ଫ୍ୟାନ୍ସଙ୍କୁ ଭେଟି ଦେଲେ ଆଲିଆ-ରଣବୀର, ଝିଅ ରାହାଙ୍କ ଦେଖାଇଲେ ଚେହେରା
କହିରଖୁଛୁ କି, ପରିବାର ସହ ଖ୍ରୀଷ୍ଟମାସ ସେଲିବ୍ରେସନ ପରେ ରଣବୀର ଏବଂ ଆଲିଆ ଝିଅ ରାହାଙ୍କ ଚେହେରା କ୍ୟାମେରା ଆଗରେ ଦେଖାଇ ସମସ୍ତଙ୍କୁ ସରପ୍ରାଇଜ କରିଥିଲେ । ରାହାଙ୍କ ଅନେକ ଭିଡ଼ିଓ ଏବଂ ଫଟୋ ଭାଇରାଲ ହେଉଛି । ଯାହାକୁ ସମସ୍ତେ ପସନ୍ଦ କରିବା ସହ ରାହାଙ୍କ ଖୁବ ପ୍ରଶଂସା କରିଛନ୍ତି । ଫିଲ୍ମ ବିଷୟରେ କହିବାକୁ ଗଲେ, ରଣବୀର ଡିସେମ୍ବର ୧ରେ ରିଲିଜ ହୋଇଥିବା ତାଙ୍କ ଫିଲ୍ମ 'ଆନିମଲ' ସଫଳତାକୁ ବେଶ ଉପଭୋଗ କରୁଛନ୍ତି । ଏହି ଫିଲ୍ମ ବର୍ତ୍ତମାନ ସୁଦ୍ଧା ତା'ର ଜଲୱା ଜାରି ରଖିଥିବା ବେଳେ ବକ୍ସ ଅଫିସରେ ୫୦୦ କୋଟିରୁ ଅଧିକ କଲେକ୍ସନ କରି ସଫଳତା ହାସଲ କରିଛି ।
