ହାଇଦ୍ରାବାଦ: ବିବାଦରେ ଖ୍ରୀଷ୍ଟଫର ନୋଲନଙ୍କ ହଲିଉଡ ଫିଲ୍ମ 'ଓପେନହାଇମର'। ଫିଲ୍ମରେ ଇଣ୍ଟିମେଟ ସିନ୍ ବେଳେ ଗୀତା ପଢିବାକୁ ନେଇ ବିବାଦରେ ଛନ୍ଦି ହୋଇଛି । ଭାରତରେ ଫିଲ୍ମର ଏହି ସିନ୍କୁ ତୀବ୍ର ବିରୋଧ କରାଯିବା ସହ ନିର୍ଦ୍ଦେଶକଙ୍କୁ କଡା ସମାଲୋଚନା କରାଯାଇଛି । ତେବେ ବର୍ତ୍ତମାନ ଏହାର ପ୍ରଭାବ ଫିଲ୍ମର ଆୟ ଉପରେ ପଡିଛି । ଫିଲ୍ମଟି ଭାରତୀୟ ବକ୍ସ ଅଫିସରେ ଭଲ ଓପେନିଂ କରିଥିଲା । ଏପରିକି ସପ୍ତାହ ଶେଷ ପର୍ଯ୍ୟନ୍ତ ଭାରତରେ ଏହି ଚଳଚ୍ଚିତ୍ରର ବ୍ୟବସାୟ ବହୁତ ଭଲ ଥିଲା । ତେବେ ସୋମବାର ଫିଲ୍ମ କଲେକ୍ସନରେ ଅପେକ୍ଷାକୃତ ହ୍ରାସ ଘଟିଛି ।
ଏହି ଚଳଚ୍ଚିତ୍ର କେବଳ ବିଶ୍ବରେ ନୁହେଁ ଭାରତରେ ମଧ୍ୟ ଆଗୁଆ ବୁକିଂରେ ଭଲ ଲାଭ କରିଥିଲା । 'ଓପେନହାଇମର' ଦୁଇଟି ଭାଷାରେ ଭାରତରେ ରିଲିଜ କରିଥିଲା। ହିନ୍ଦୀରେ ରୋଜଗାର ବିଷୟରେ କହିବାକୁ ଗଲେ ଖ୍ରୀଷ୍ଟଫର ନୋଲନଙ୍କ ନିର୍ଦ୍ଦେଶିତ ଏହି ଚଳଚ୍ଚିତ୍ରଟି ଉଦଘାଟନୀ ଦିନରେ 1.75 କୋଟି ରୋଜଗାର କରିଥିଲା । ଏହାପରେ ଶନିବାର ଏବଂ ରବିବାର ଦିନ ଫିଲ୍ମର ଆୟ ବୃଦ୍ଧି ପାଇଲା ଏବଂ ଓପେନହାଇମର ଶନିବାର ଦିନ 2.05 କୋଟି ଆୟ କରିଥିବା ବେଳେ ରବିବାର ଦିନ ହିନ୍ଦୀ ଭାଷାରେ 2.55 କୋଟି ବ୍ୟବସାୟ କରିଥିଲା । କିନ୍ତୁ ସୋମବାର ଫିଲ୍ମର ରୋଜଗାରରେ ବହୁତ ହ୍ରାସ ଘଟିଛି । ଫିଲ୍ମଟି ମାତ୍ର 78 ଲକ୍ଷ ବ୍ୟବସାୟ କରିଛି । ହିନ୍ଦୀ ଭାଷାରେ ଏହି ଫିଲ୍ମ ଏପର୍ଯ୍ୟନ୍ତ ମୋଟ 7.13 କୋଟି ବ୍ୟବସାୟ କରିଛି ।