ହାଇଦ୍ରାବାଦ:ଶେଷରେ ଇତିହାସ ରଚିଲା ଭାରତ । ସଫଳ ହେଲା ବହୁ ପ୍ରତୀକ୍ଷିତ ଚନ୍ଦ୍ରଯାନ-3 ମିଶନ । ଦୀର୍ଘ 50 ଦିନର ମହାକାଶ ଯାତ୍ରା ଶେଷ କରି ଶେଷରେ ଚନ୍ଦ୍ରପୃଷ୍ଠରେ ସଫଳତାର ସହ ଲ୍ୟାଣ୍ଡିଂ କଲା ଚନ୍ଦ୍ରଯାନ-3 ଲ୍ଯାଣ୍ଡର ‘ବିକ୍ରମ’ । ଆଜି ଭାରତ ପାଇଁ ଗର୍ବ ଦିନ ହୋଇଥିବା ବେଳେ ଏହି ଗର୍ବର ମୂହୁର୍ତ୍ତକୁ ସାରା ଭାରତବାସୀ ସେଲିବ୍ରେଟ୍ କରିଛନ୍ତି । ଏହାରି ମଧ୍ୟରେ ବଲିଉଡ୍ରୁ ଆରମ୍ଭ କରି ସାଉଥ୍ ଯାଏଁ ସମସ୍ତ ସେଲିବ୍ରିଟିଙ୍କ ମଧ୍ୟରେ ବି ଉତ୍ସବର ମାହୋଲ ଦେଖିବାକୁ ମିଳିଛି ।
ବଲିଉଡ୍ ଅଭିନେତା ଅକ୍ଷୟ କୁମାରଙ୍କଠାରୁ ଆରମ୍ଭ କରି ସାଉଥ୍ର ମେଗାଷ୍ଟାର ଚିରଞ୍ଜିବୀ, ଜୁନିଅର ଏନ୍ଟିଆର୍ ସମସ୍ତେ ଏହି ମୂହୁର୍ତ୍ତକୁ ଉପଭୋଗ କରିବା ସହ ଏହି ଐତିହାସିକ ସଫଳତାକୁ ନେଇ ଇସ୍ରୋକୁ ହୃଦୟରୁ ଧନ୍ୟବାଦ ଜଣାଇଛନ୍ତି । ସୋସିଆଲ ମିଡିଆରେ ଅଭିନେତାମାନେ ପୋଷ୍ଟ କରି ଇସ୍ରୋକୁ ଶୁଭକାମନା ଜଣାଇଛନ୍ତି । ଅକ୍ଷୟ କୁମାର ଟ୍ବିଟ୍ କରି ଲେଖିଛନ୍ତି, 'ଇସ୍ରୋକୁ ବିଲିୟନ ହାର୍ଟ ଧନ୍ୟବାଦ ଜଣାଉଛି । ତୁମେ ଆମ ମାନଙ୍କୁ ଗର୍ବ ଅନୁଭବ କରାଇଛ । ଭାରତ ଏହି ଐତିହାସିକ ମୁହୁର୍ତ୍ତକୁ ଦେଖି ଧନ୍ୟ ମନେ କରୁଛି । ଚନ୍ଦ୍ରରେ ଏବେ ଭାରତ ।' ସେପଟେ ବଲିଉଡ ଅଭିନେତା ଅଜୟ ଦେବଗନ ଏବଂ ଅଭିଷେକ ବଚ୍ଚନଙ୍କ ସମେତ ଅନେକ ସେଲିବ୍ରିଟି ଏହି ମୂହୁର୍ତ୍ତକୁ ସେଲିବ୍ରେଟ୍ କରିଛନ୍ତି ।
ସେହିପରି ସାଉଥ ସୁପରଷ୍ଟାର ଜୁନିଅର ଏନଟିଆର ଟ୍ବିଟ କରି ଲେଖିଛନ୍ତି, 'ଇସ୍ରୋକୁ ମୋର ହୃଦୟରୁ ଅଭିନନ୍ଦନ। ଚନ୍ଦ୍ର ପୃଷ୍ଠରେ ଚନ୍ଦ୍ରଯାନ ସଫଳତାର ସହ ସଫ୍ଟ ଲ୍ୟାଣ୍ଡିଂ କରିଛି । ମିଶନର ଏକ ସଫଳ ଅବତରଣ ସବୁଥର ପରି ଆପଣ ଭାରତକୁ ଗର୍ବିତ କରାଇଛ । ସାଉଥ୍ର ମେଗାଷ୍ଟାର ଚିରଞ୍ଜିବୀ ଟ୍ବିଟ୍ କରି ଲେଖିଛନ୍ତି, 'ଭାରତ ପାଇଁ ଗର୍ବର ମୂହୁର୍ତ୍ତ । ଚନ୍ଦ୍ରଯାନ-3 ଏକ ଅଦୃଶ୍ୟ ଏବଂ ଚମତ୍କାର ସଫଳତା ପାଇଛି । ଭାରତ ଏକ ଇତିହାସ ସୃଷ୍ଟି କରିଛି । ମୁଁ ଏକ ବିଲିୟନ ଗର୍ବିତ ଭାରତୀୟଙ୍କ ସହ ମିଶି ଆମ ଭାରତୀୟ ବୈଜ୍ଞାନିକଙ୍କୁ ଅଭିନନ୍ଦନ ଜଣାଉଛି । ଏହା ଚନ୍ଦ୍ରରେ ଏକ ମୂଲ୍ୟବାନ ଆବିଷ୍କାର ଏବଂ ଆଗାମୀ ଦିନରେ ଅଧିକ ମହାକାଶ ମିଶନ ପାଇଁ ଏହା ଏକ ବାଟ ଖୋଲିଛି । ଆଶା କରୁଛି ସେହି ଦିନ ବି ଆଉ ଦୁର ନୁହେଁ ଯେବେ ଆମେ ମଧ୍ୟ ଚନ୍ଦ୍ରରେ ଛୁଟି କାଟିବା ।