ହାଇଦ୍ରାବାଦ:2001 ର ଫିଲ୍ମ ଗଦର ଏକ ପ୍ରେମ କଥାର ସିକ୍ବେଲ ଅର୍ଥାତ୍ ଗଦର 2 ଦୀର୍ଘ 22ବର୍ଷ ପରେ ରିଲିଜ ହୋଇଛି। ପ୍ରଥମ ଭାଗ ପରି 2ୟ ଭାଗକୁ ମଧ୍ୟ ଦର୍ଶକ ବେଶ ପସନ୍ଦ କରିଛନ୍ତି। ଫିଲ୍ମ ରିଲିଜ ହେବା ଦିନ ଠାରୁ ଭଲ ପ୍ରଦର୍ଶନ କରିଆସୁଛି। ଆଜି ଫିଲ୍ମ ରିଲିଜର 24 ଦିନ ବିତିଗଲାଣି । ତଥାପି ଫିଲ୍ମର ଆୟରେ ବ୍ରେକ ଲାଗୁନି। ବର୍ତ୍ତମାନ ଫିଲ୍ମ ଭାରତୀୟ ବକ୍ସ ଅଫିସରେ 500କୋଟି କ୍ଲବରେ ସାମିଲ ହୋଇ ଆଉ ଏକ ମାଇଲକୁଣ୍ଟ ହାସଲ କରିଛି । ସେପଟେ ଏକାସାଙ୍ଗେ ରିଲିଜ୍ ହୋଇଥିବା ଅକ୍ଷୟ କୁମାରଙ୍କ ଫିଲ୍ମ ଓଏମଜି 2 ଗଦର 2 ଭଳି ଏତେଟା ସଂଗ୍ରହ କରିନଥିଲେ ସୁଦ୍ଧା ବକ୍ସ ଅଫିସରେ ତାର ସ୍ଥିତି ବଜାୟ ରଖିଛି ।
ଗଦର 2 ଭାରତରେ 40.01 କୋଟି ସହ ଓପେନିଂ କରିଥିବା ବେଳେ ପ୍ରଥମ ସପ୍ତାହରେ ଫିଲ୍ମ ମୋଟ 284.63କୋଟି ଆୟ କରିଥିଲା । 2ୟ ସପ୍ତାହରେ 134.47କୋଟି ଆୟ କରିଥିଲା । 3ୟ ସପ୍ତାହରେ 63.35କୋଟି ଆୟ କରିଥିବା ବେଳେ 4ର୍ଥ ସପ୍ତାହ ଅର୍ଥାତ୍ 24 ଦିନରେ ଆଉ ଏକ ସଫଳତା ହାସଲ କରିଛି । ଫିଲ୍ମ ରବିବାର ଅର୍ଥାତ 24ଦିନରେ 7.50କୋଟି ଆୟ କରିଛି । ତେବେ ଏହାକୁ ମିଶାଇ ଫିଲ୍ମର ମୋଟ ଆୟ 500.87କୋଟିକୁ ବୃଦ୍ଧି ପାଇଛି । କିନ୍ତୁ ଫିଲ୍ମ ପଠାନର ରେକର୍ଡକୁ ଭାଙ୍ଗିବାରେ ଅସଫଳ ହୋଇଛି । କାରଣ ପଠାନ 24ଦିନରେ 508.1 କୋଟି ଆୟ କରିଥିଲା । ପଠାନ ଭାରତରେ ମୋଟ 543.09 କୋଟି ଆୟ କରି ଇତିହାସ ରଚିଥିଲା । ତେବେ ଗଦର 2 ପଠାନକୁ ମାତ୍ ଦେବ କି ନାହିଁ ତାହା ଆଗାମୀ ଦିନରେ ଜଣାପଡିବ।