ମୁମ୍ବାଇ: 35ବର୍ଷ ବୟସରେ ପାଦ ଥାପିଲେ ବି ଟାଉନ୍ର ବିବାଦୀୟ ଅଭିନେତ୍ରୀ କଙ୍ଗନା ରାଣାୱତ । ନିଜ ଦକ୍ଷ ଅଭିନୟ ଏବଂ ସ୍ପଷ୍ଟବାଦୀ ସ୍ବଭାବ ପାଇଁ ସର୍ବଦା ହେଡଲାଇନରେ ରହିଥାନ୍ତି କଙ୍ଗନା । କଙ୍ଗନା ବିଭିନ୍ନ ପ୍ରସଙ୍ଗକୁ ନେଇ ନିଜ ମନ୍ତବ୍ୟକୁ ନେଇ ବିବାଦରେ ଛନ୍ଦି ହୋଇ ଥାଆନ୍ତି । ନିଜ ଅଭିନୟ ଏବଂ ସ୍ବଭାବ ପାଇଁ ବେଶ ସଫଳତା ହାସଲ କରିବା ସହ ଫ୍ୟାନ୍ସଙ୍କ ମନ ଜିତିପାରିଛନ୍ତି କଙ୍ଗନା । ଏହାରି ମଧ୍ୟରେ ନିଜ ଜନ୍ମଦିନ ଅବସରରେ କଙ୍ଗନା ସୋସିଆଲ ମିଡିଆରେ ଏକ ଭିଡିଓ ସେୟାର କରି ନିଜ ପରିବାର, ସାଙ୍ଗ, ପ୍ରଶଂସକ ଏବଂ ଶତୃଙ୍କୁ ଧନ୍ୟବାଦ ଜଣାଇଛନ୍ତି । ଏହି ଭିଡିଓ ସେୟାର ହେବା ମାତ୍ରେ ଫ୍ୟାନ୍ସମାନେ ତାଙ୍କ ପୋଷ୍ଟକୁ ଲାଇକ୍ କରିବା ସହ ଜନ୍ମଦିନ ଶୁଭେଚ୍ଛା ଜଣାଇଛନ୍ତି ।
ଜନ୍ମଦିନରେ ନିଜ ଟ୍ବିଟର ହ୍ୟାଣ୍ଡେଲ୍ରେ ଅଭିନେତ୍ରୀ କଙ୍ଗନା ଏହି ଭିଡିଓ ସେୟାର କରି କ୍ୟାପସନରେ ହାର୍ଟରୁ ମୋ ମେସେଜ ବୋଲି ଲେଖିଛନ୍ତି । ଏହି ଭିଡିଓରେ ପ୍ରଥମେ ନିଜ ବାପା, ମା' ଏବଂ ନିଜ କୁଳଦେବୀଙ୍କୁ କୃତଜ୍ଞତା ଜଣାଇଛନ୍ତି । ଏଥିସହ ସେ ନିଜ ପ୍ରିୟଜନ, ପରିବାର ସଦସ୍ୟ, ସାଙ୍ଗସାଥୀ ଫ୍ରଶଂସକ, ଶୁଭଚିନ୍ତକ ଏବଂ ଶତୃଙ୍କୁ ଧନ୍ୟବାଦ ଜଣାଇଛନ୍ତି । ସେ କହିଛନ୍ତି, "ଯେଉଁମାନେ ମୋର ନିନ୍ଦା କରୁଛନ୍ତି ମୋର ଶତୃ ଅଟନ୍ତି । ସେମାନେ ମୋତେ କେବେ ଅଳସୁଆ ହେବାକୁ ଦେଇନାହାନ୍ତି । ସର୍ବଦା ମୋତେ ଲଢିିବା ଶିଖାଇଛନ୍ତି । ଏହିପରି ଆଗକୁ ବଢାଇବା ଶିଖାଇଥିବାରୁ ମୁଁ ସେମାନଙ୍କ ନିକଟରେ କୃତଜ୍ଞ ରହିବି । ମୁଁ ଜଣେ ସରଳ ସ୍ବଭାବର ଅଟେ । ମୁଁ ବ୍ୟକ୍ତିଗତ ଭାବେ ସମସ୍ତଙ୍କ ଭବିଷ୍ୟକୁ ନେଇ ଯାହା ଠିକ ସେହି କାମ କରିବାକୁ ଚେଷ୍ଟା କରିଥାଏ । ଏହାରି ମଧ୍ୟରେ ଯଦି କାହାକୁ ମୋର ଆଚରଣ ଏବଂ ମୋ କଥା କାହାକୁ ଖରାପ ଲାଗିଛି, ତାହେଲେ ମୋତେ କ୍ଷମା କରିବେ । ମୋ ମନରେ କାହା ପାଇଁ ମଧ୍ୟ ଭେଦଭାବ ନାହିଁ ।"