ମୁମ୍ବାଇ:ଆଜି ୭୫ ବର୍ଷ ବୟସରେ ପଦାର୍ପଣ କରିଛନ୍ତି ବଲିଉଡ ଅଭିନେତ୍ରୀ କାଜଲଙ୍କ ଶାଶୁ ତଥା ଅଭିନେତା ଅଜୟ ଦେବଗନଙ୍କ ମାଆ ବୀଣା ଦେବଗନ । ଶାଶୁଙ୍କ ଜନ୍ମଦିନ ଅବସରରେ ଅଭିନେତ୍ରୀ କାଜଲ ମାଆଙ୍କ ସହ ଏକ ଫଟୋ ନିଜ ଟ୍ବିଟର ହ୍ୟାଣ୍ଡେଲରେ ସେୟାର କରିଛନ୍ତି । ଆଉ ଶାଶୁଙ୍କୁ ଜଣାଇଛନ୍ତି ଜନ୍ମଦିନର ଶୁଭେଚ୍ଛା ।
ଅଭିନେତ୍ରୀ କାଜଲ ବୀଣା ଦେବଗନଙ୍କ ଫଟୋ ସେୟାର କରି ଲେଖିଛନ୍ତି, 'ଆପଣଙ୍କୁ ୭୫ବର୍ଷ ପୂର୍ତ୍ତି ଅବସରରେ ଅନେକ ଅନେକ ଶୁଭେଚ୍ଛା ଓ ଶୁଭକାମନା'। ସେହିପରି ଅଜୟ ଦେବଗନ ମଧ୍ୟ ନିଜ ମାଆଙ୍କ ଏକ ଫଟୋ ସେୟାର କରି ଲେଖିଛନ୍ତି, 'ଜନ୍ମଦିନର ଅନେକ ଶୁଭେଚ୍ଛା ମାଆ' । ତୁମେ ମୋ ଜୀବନର ସବୁ ଜିନିଷ ପାଇଁ ମୋ ପସନ୍ଦର ବ୍ୟକ୍ତି ଅଟ । ଆପଣଙ୍କ ଆଶୀର୍ବାଦ ଓ ମାର୍ଗଦର୍ଶନର ସର୍ବଦା ଆବଶ୍ୟକ ରହିଛି ।
ଅଭିନେତା ଅଜୟ ଦେବଗନ ବଲିଉଡର ଜଣେ ସଫଳ ଅଭିନେତା ମଧ୍ୟରୁ ଜଣେ ଅଟନ୍ତି । ଅଜୟ ଅଭିନୟ ସାଙ୍ଗକୁ ଅନେକ ଫିଲ୍ମର ନିର୍ମାତା ଓ ନିର୍ଦ୍ଦେଶକ ଭାବେ କାମ କରିଛନ୍ତି । ୧୯୯୧ ମସିହାରେ 'ଫୁଲ ଅର୍ କାଣ୍ଟେ' ଫିଲ୍ମରେ ଡେବ୍ୟୁ କରି ନିଜ ଅଭିନୟ କ୍ୟାରିୟର ଆରମ୍ଭ କରିଥିଲେ । ପରେ ପରେ ସେ ବହୁ ସଫଳ ଫିଲ୍ମ ବଲିଉଡକୁ ଦେଇଥିଲେ ।
ସେଥିମଧ୍ୟରୁ ଫୁଲ ଅର୍ କାଣ୍ଟେ, ୧୯୯୨ ମସିହାରେ ଜିଗର, ୧୯୯୩ ମସିହାରେ ଦିଲ ହେ ବୋତାବ୍, ଏକ ହି ରାସ୍ତା, ସଂଗ୍ରାମ, ଦିବ୍ୟଶକ୍ତି, ୧୯୯୪ ମସିହାରେ ବିଜୟପଥ ଓ ଦିଲବାଲେ, ସୁହାଗ, କାନୁନ, ୧୯୯୫ରେ ହଲଚଲ, ହକିକତ, ୧୯୯୬ରେ ଦିଲଜଲେ,ଜାନ୍, ଇଶକ୍,ଇତିହାସ । ସେହିପରି ୧୯୯୯ରେ ହମ ଦିଲ ଦେ ଚୁକେ ସନମ୍, କଚେ ଧାଗେ, ୨୦୦୦ରେ ରାଜୁ ଚାଚା, ଦିୱାନେ, ୨୦୦୧ରେ ଲଜ୍ଜା, ୨୦୦୩ରେ ଗଙ୍ଗାଜଳ, ପରୱାନା, ୨୦୦୪ରେ ତାରଜନ୍, ୨୦୦୬ରେ ଗୋଲମାଲ, ୨୦୧୧ ମସିହାରେ ସିଂଘମ, ୨୦୧୫ରେ ଦୃଶ୍ୟମ୍ ଭଳି ଅନେକ ସଫଳ ଫିଲ୍ମ କରି ବେଶ ଲୋକପ୍ରିୟତା ହାସଲ କରିପାରିଛନ୍ତି ।
ସୂଚନା ଥାଉକି, ଅଭିନେତା ଅଜୟ ଦେବଗନ, ଅଭିନେତ୍ରୀ କାଜଲଙ୍କ ଭେଟ ଫିଲ୍ମ ଗୁଣ୍ଡାରାଜର ସେଟରେ ହୋଇଥିଲା । ତାପରଠାରୁ ଉଭୟ ଉଭୟଙ୍କୁ ପସନ୍ଦ କରିବାରେ ଲାଗିଥିଲେ । ପରେ ୧୯୯୯ ମସିହାରେ ଦୁହେଁ ଏକ ସାଧାରଣ ଅନ୍ଦାଜରେ ବିବାହ କରିଥିଲେ । ତେବେ ତାଙ୍କର ଦୁଇଟି ସନ୍ତାନ ୟୁଗ ଓ ନିଶା ରହିଛନ୍ତି ।
ସୂଚନା ଅନୁସାରେ, ଅଭିନେତା ଅଜୟ ଦେବଗନ ବୀରୁ ଦେବଗନ ଓ ବୀଣା ଦେବଗନଙ୍କ ପୁଅ ଅଟନ୍ତି । ଅଜୟ ଦେବଗନଙ୍କ ବାପା ବୀରୁ ଦେବଗନ ଜଣେ ଜଣାଶୁଣା ଷ୍ଟଣ୍ଟ କୋରିଓଗ୍ରାଫର ସହ ଆକ୍ସନ ଫିଲ୍ମ ନିର୍ଦ୍ଦେଶକ ଅଟନ୍ତି ।
