ହାଇଦ୍ରାବାଦ: ହିନ୍ଦୀ ସିନେମାର ପ୍ରସିଦ୍ଧ ଚଳଚ୍ଚିତ୍ର ନିର୍ମାତା ତଥା ନିର୍ଦ୍ଦେଶକ ଅନୁରାଗ କଶ୍ୟପ ପ୍ରତିବର୍ଷ 10 ସେପ୍ଟେମ୍ବରରେ ତାଙ୍କ ଜନ୍ମଦିନ ପାଳନ କରନ୍ତି । ଉତ୍ତରପ୍ରଦେଶର ଗୋରଖପୁରରେ ଜନ୍ମଗ୍ରହଣ କରିଥିବା ଅନୁରାଗ କଶ୍ୟପ ତାଙ୍କର ଦୀର୍ଘ ଚଳଚ୍ଚିତ୍ର କ୍ୟାରିଅରରେ ଅନେକ ଚଳଚ୍ଚିତ୍ର ନିର୍ମାଣ କରିଛନ୍ତି । କିନ୍ତୁ ବହୁତ କମ୍ ଲୋକ ଜାଣିଥିବେ ଯେ, ଅନୁରାଗ କେବେ ବି ମାୟାନଗରୀର ଏହି ରଙ୍ଗିନ୍ ଦୁନିଆକୁ ଆସିବାକୁ ହିଁ ଚାହୁଁନଥିଲେ । ବାସ୍ତବରେ ସେ ଦୁନିଆ ଏବଂ ବ୍ରହ୍ମାଣ୍ଡରେ ଲୁଚି ରହିଥିବା ରହସ୍ୟ ଖୋଜିବାକୁ ଚାହୁଁଥିଲେ । ଅନୁରାଗ ଜଣେ ବୈଜ୍ଞାନିକ ହେବାକୁ ଚାହୁଁଥିଲେ ଏବଂ ଏହି ସ୍ୱପ୍ନ ସହିତ ସେ ଅଧିକ ଅଧ୍ୟୟନ ପାଇଁ ଦିଲ୍ଲୀ ଆସି ହାନସରାଜ କଲେଜରେ ନାମ ଲେଖାଇଥିଲେ । କିନ୍ତୁ ବୋଧହୁଏ ତାଙ୍କ ଭାଗ୍ୟରେ ଆଉ କିଛି ଲେଖାଥିଲା । ଏଠାରେ ତାଙ୍କର ଆଗ୍ରହ ଥିଏଟର ପ୍ରତି ବଢିଲା ଏବଂ ଶେଷରେ ସେ ନିଷ୍ପତ୍ତି ନେଇଥିଲେ ଯେ, ଚଳଚ୍ଚିତ୍ର ଜଗତରେ ନିଜର ପରିଚୟ ସୃଷ୍ଟି କରିବେ ।
ଜନ ନାଟ୍ୟ ମଞ୍ଚରେ ଯୋଗ ଦେଇଥିଲେ ଅନୁରାଗ
1993 ମସିହାରେ ସ୍ନାତକୋତ୍ତର ପୂରା କରିବା ପରେ ଅନୁରାଗ ଏକ ଷ୍ଟ୍ରିଟ୍ ଥିଏଟର ଗ୍ରୁପ୍ "ଜନ ନାଟ୍ୟ ମଞ୍ଚ"ରେ ଯୋଗ ଦେଇଥିଲେ । କ୍ୟାରିୟରର ପ୍ରାରମ୍ଭରେ ଅନୁରାଗ ଅନେକ ଉତ୍ଥାନ-ପତନ ଦେଖିଲେ । ତାଙ୍କୁ ଅନେକ ଦିନ ରାସ୍ତା କଡରେ ଦିନ କାଟିବାକୁ ପଡିଲା । ବହୁ ସଂଘର୍ଷ ପରେ ସେ ପୃଥ୍ବୀ ଥିଏଟରରେ କାମ ପାଇଲେ, ଯାହା ତାଙ୍କର ପ୍ରଥମ ଚାକିରି ଥିଲା, କିନ୍ତୁ ନିର୍ଦ୍ଦେଶକଙ୍କ ମୃତ୍ୟୁ ହେତୁ ତାଙ୍କର ପ୍ରଥମ ନାଟକ ଅଧୂରା ରହିଗଲା । 1997 ମସିହାରେ, ଅନୁରାଗ ଧାରାବାହିକ କଭି କଭି ପାଇଁ ସ୍କ୍ରିପ୍ଟ ଲେଖିବାର ସୁଯୋଗ ପାଇଲେ । ଅନୁରାଗ କଶ୍ୟପଙ୍କ ଜୀବନରେ ପରିବର୍ତ୍ତନ ସେତେବେଳେ ଆସିଲା, ଯେତେବେଳେ ମନୋଜ ବାଜପେୟୀ ତାଙ୍କୁ ରାମ ଗୋପାଳ ବର୍ମାଙ୍କ ପାଇଁ ସତ୍ୟ ନାମକ ଏକ ଚଳଚ୍ଚିତ୍ର ଲେଖିବାକୁ ପ୍ରସ୍ତାବ ଦେଇଥିଲେ । 1998 ମସିହାରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ରଟି ବକ୍ସ ଅଫିସରେ ସୁପର ହିଟ୍ ହୋଇଥିଲା ।
2003ରେ ନିର୍ଦ୍ଦେଶନାରେ ରଖିଥିଲେ ପାଦ
ଏହା ପରେ ଅନୁରାଗ କଶ୍ୟପ ଶୋଲ, ଜଙ୍ଗ, ନାୟକ ଇତ୍ୟାଦି ଅନେକ ଚଳଚ୍ଚିତ୍ରର ସ୍କ୍ରିପ୍ଟ ଲେଖିଥିଲେ । 2003 ମସିହାରେ ଅନୁରାଗ ଚଳଚ୍ଚିତ୍ର ନିର୍ଦ୍ଦେଶନା କ୍ଷେତ୍ରରେ ପାଦ ରଖିଲେ ଏବଂ ଚଳଚ୍ଚିତ୍ର 'ପାଞ୍ଚ' ନିର୍ଦ୍ଦେଶନା ଦେଇଥିଲେ । କିନ୍ତୁ ଦୁର୍ଭାଗ୍ୟବଶତଃ ଫିଲ୍ମ ବିବାଦ ଭିତର ପଶିବାରୁ ରିଲିଜ ହୋଇପାରିଲା ନାହିଁ । ଏହା ପରେ ଅନୁରାଗ 2007 ମସିହାରେ ବ୍ଲାକ୍ ଫ୍ରାଇଡେ ଚଳଚ୍ଚିତ୍ରର ନିର୍ଦ୍ଦେଶନା ଦେଇଥିଲେ । ଅନୁରାଗଙ୍କ ଏହି ଫିଲ୍ମ ମଧ୍ୟ ବିବାଦରେ ଥିଲା । ଏହି ଚଳଚ୍ଚିତ୍ର ପରେ ମଧ୍ୟ ଅନୁରାଗଙ୍କ ଅଧିକାଂଶ ଚଳଚ୍ଚିତ୍ର ବିବାଦୀୟ ହୋଇରହିଥିଲା ।
ଜଣେ ନିର୍ଦ୍ଦେଶକ ଭାବରେ ଅନୁରାଗ ଅନେକ ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ଯେଉଁଥିରେ ନୋ ସ୍ମୋକିଙ୍ଗ୍, ଦେବଡି, ଗୁଲାଲ, ମୁମ୍ବାଇ କଟିଙ୍ଗ, ଗ୍ୟାଙ୍ଗ ଅଫ୍ ୱାସିପୁର, ବମ୍ବେ ଟକିଜ୍ ଇତ୍ୟାଦି ଅନ୍ତର୍ଭୁକ୍ତ । ଚଳଚ୍ଚିତ୍ର ନିର୍ଦ୍ଦେଶନା ବ୍ୟତୀତ ଅନୁରାଗ ଅନେକ ଫିଲ୍ମ ମଧ୍ୟ ପ୍ରସ୍ତୁତ କରିଛନ୍ତି। 2009 ମସିହାରେ, ସେ ନିଜର ଏକ ଫିଲ୍ମ ପ୍ରଡକ୍ସନ କମ୍ପାନୀ “ଅନୁରାଗ କାଶ୍ୟପ ଫିଲ୍ମସ୍ ପ୍ରାଇଭେଟ ଲିମିଟେଡ୍ (AKFPL)” ପ୍ରତିଷ୍ଠା କରିଥିଲେ । ତାଙ୍କ ଦ୍ୱାରା ନିର୍ମିତ ଚଳଚ୍ଚିତ୍ର ଗୁଡ଼ିକ ହେଉଛି ଉଡାନ୍, ତୃଷ୍ଣା, ଶୈତାନ, ଗ୍ୟାଙ୍ଗସ୍ ଅଫ୍ ୱାସିପୁର, ସହିଦ, ଲୁଟେରା,କୁଇନ୍, ମସାନ୍, ସାଣ୍ଡ କି ଆଖ୍ ଇତ୍ୟାଦି । ଏହା ବ୍ୟତୀତ ଅନୁରାଗ ବ୍ଲାକ୍ ଫ୍ରାଇଡେ, ନୋ ସ୍ମୋକିଙ୍ଗ୍, ଲକ୍ ବାଇ ଚାନ୍ସ ଇତ୍ୟାଦି ଚଳଚ୍ଚିତ୍ରରେ ଛୋଟ ଭୂମିକାରେ ମଧ୍ୟ ଅଭିନୟ କରିଥିଲେ। ଅନୁରାଗ କାଶ୍ୟପ ଫିଲ୍ମ ଇଣ୍ଡଷ୍ଟ୍ରିରେ ସକ୍ରିୟ ଅଛନ୍ତି।
ବ୍ୟକ୍ତିଗତ ଜୀବନ ସମ୍ପର୍କରେ...
ବୃତ୍ତିଗତ ଜୀବନ ବ୍ୟତୀତ ଅନୁରାଗ ତାଙ୍କ ବ୍ୟକ୍ତିଗତ ଜୀବନ ପାଇଁ ମଧ୍ୟ ଚର୍ଚ୍ଚାରେ ଥିଲେ । ନିଜ କ୍ୟାରିୟରରେ ସଫଳତା ହାସଲ କରିଥିବା ଅନୁରାଗ, ସମ୍ପର୍କ ମାମଲାରେ କିଛି ଖାସ୍ ସଫଳ ହୋଇପାରିନାହାନ୍ତି । ଅନୁରାଗ କାଶ୍ୟପଙ୍କ 2003 ମସିହାରେ ଚଳଚ୍ଚିତ୍ର ସମ୍ପାଦକ ଆରତୀ ବଜାଜଙ୍କୁ ବିବାହ କରିଥିଲେ। କିନ୍ତୁ ଛଅ ବର୍ଷ ପରେ ଅର୍ଥାତ୍ 2009 ରେ ଦୁହେଁ ଛାଡପତ୍ର ନେଇଥିଲେ। ଏହି ଦମ୍ପତିଙ୍କର ଆଲିଆ କଶ୍ୟପ ନାମକ ଏକ ଝିଅ ମଧ୍ୟ ଅଛି । 2011ରେ ଅନୁରାଗ ଦ୍ୱିତୀୟ ଥର ପାଇଁ ଅଭିନେତ୍ରୀ କଲ୍କି କୋଚଲିନଙ୍କୁ ବିବାହ କରିଥିଲେ । ଦୁହେଁ ଫିଲ୍ମ ଦେବଦିଙ୍କ ସେଟରେ ଭେଟିଥିଲେ । ପରେ ଦୁହେଁ ବିବାହ ବନ୍ଧନରେ ଆବଦ୍ଧ ହୋଇଥିଲେ । ମାତ୍ର ଏହି ସମ୍ପର୍କ ବି ବେଶୀ ଦିନ ତିଷ୍ଠି ରହିଲା ନାହିଁ ଏବଂ 2015 ରେ ଦୁହେଁ ଛାଡପତ୍ର ନେଇଥିଲେ । ତେବେ ଛାଡପତ୍ର ପରେ ମଧ୍ୟ ଅନୁରାଗ ତାଙ୍କ ପତ୍ନୀ, ଅଭିନେତ୍ରୀ କାଲ୍କି କୋଚଲିନ୍ ଏବଂ ଆରତୀ ବଜାଜଙ୍କ ସହ ଭଲ ବଣ୍ଡିଂ ସେୟାର କରନ୍ତି ।
ୱାର୍କ ଫ୍ରଣ୍ଟ ବିଷୟରେ କହିବାକୁ ଗଲେ ଅନୁରାଗ ଖୁବ୍ ଶୀଘ୍ର ନିର୍ମାତା-ନିର୍ଦ୍ଦେଶକ ଭାବରେ ପ୍ରଶଂସକଙ୍କ ପାଇଁ ଫିଲ୍ମ 'Two Sisters and a Husband' ନିର୍ମାଣ କରିବାକୁ ଯାଉଛନ୍ତି ।
