ମୁମ୍ବାଇ: 'ପବିତ୍ର ରିସ୍ତା' ଫେମ ଅଭିନେତ୍ରୀ ଅଙ୍କିତା ଲୋଖଣ୍ଡେଙ୍କ ବାପା ଶଶିକାନ୍ତ ଲୋଖଣ୍ଡେଙ୍କ ଦେହାନ୍ତ ହୋଇଛି । ଗଣମାଧ୍ୟମର ରିପୋର୍ଟ ଅନୁଯାୟୀ, ଯଦିଓ ତାଙ୍କ ବାପାଙ୍କ ମୃତ୍ୟୁର କାରଣ ଏପର୍ଯ୍ୟନ୍ତ ଜଣାପଡିନାହିଁ । ହେଲେ ଗତ ଦୁଇ ମାସ ଧରି ଶଶିକାନ୍ତ ଲୋଖଣ୍ଡେଙ୍କ ଅସୁସ୍ଥ ଥିବା ଜଣାପଡିଛି । ତେବେ ମୃତ୍ୟୁ ବେଳକୁ ତାଙ୍କତୁ 68 ବର୍ଷ ହୋଇଥିଲା । ଆଜି ତାଙ୍କ ଅନ୍ତିମ ସଂସ୍କାର କରାଯାଇଥିବା ବେଳେ ଅଭିନେତ୍ରୀ ତାଙ୍କ ବାପାଙ୍କ କୋକେଇକୁ କାନ୍ଧ ଦେବା ସହ ଶେଷ ରୀତିନୀତି ସମ୍ପନ୍ନ କରିଛନ୍ତି ।
ସୂଚନା ଅନୁସାରେ, ଅଙ୍କିତାଙ୍କ ବାପା ଜଣେ ବ୍ୟାଙ୍କର୍ ଥିଲେ । ଅଙ୍କିତା ତାଙ୍କ ପିତାଙ୍କ ଅତି ନିକଟତର ଥିଲେ । ସେ ପ୍ରାୟତଃ ତାଙ୍କ ସହିତ ଫଟୋ ଏବଂ ଭିଡିଓ ସେୟାର କରୁଥିଲେ । ଏଥି ସହିତ ଅଙ୍କିତା ବାପାଙ୍କ ବିୟୋଗରେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି । ଶନିବାର ଅଙ୍କିତାଙ୍କ ବାପାଙ୍କ ଦେହାନ୍ତ ହୋଇଥିବା ବେଳେ ଆଜି ମୁମ୍ବାଇ ସ୍ଥିତ ଔଶିୱାରା ଶ୍ମଶାନରେ ଅନ୍ତିମ ସଂସ୍କାର କରାଯାଇଥିଲା । ତେବେ ପୁରା ପରିବାରରେ ଶୋକର ଲହରୀ ଖେଳିଯାଇଥିବା ବେଳେ ଅନେକ ସେଲିବ୍ରଟି ତାଙ୍କ ବାପାଙ୍କ ଶେଷ ଦର୍ଶନ କରିଥିଲେ । ଅନ୍ତିମ ସଂସ୍କାର ପୂର୍ବରୁ ଶେଷ ଦର୍ଶନ ପାଇଁ ଶ୍ରଦ୍ଧା ଆର୍ଯ୍ୟ, ତୁଷାର ଟଣ୍ଡନଙ୍କ ସମେତ ସେଲିବ୍ରିଟିମାନେ ଅଙ୍କିତାଙ୍କ ମୁମ୍ବାଇ ଘରେ ପହଞ୍ଚି ଲୋଖଣ୍ଡେ ପରିବାରକୁ ସମବେଦନା ଜଣାଇଛନ୍ତି ।
ଅଙ୍କିତାଙ୍କ ବାପାଙ୍କ ଅନ୍ତିମ ସଂସ୍କାରର ଅନେକ ଭିଡିଓ ସାମ୍ନାକୁ ଆସିଛି । ଯେଉଁଠାରେ, ଗୋଟିଏ ଭିଡିଓରେ ଅଙ୍କିତା ତାଙ୍କ ବାପାଙ୍କ ମୃତଦେହକୁ କାନ୍ଧ ଦେଉଥିବା ବେଳେ ଅନ୍ୟ ଭିଡିଓରେ ସେ ତାଙ୍କ ସ୍ୱାମୀ ଏବଂ ପରିବାର ସହ ନଜର ଆସିଛନ୍ତି । ଏସବୁ ମଧ୍ୟରେ, ଏପରି ଏକ ଭିଡିଓ ମଧ୍ୟ ସାମ୍ନାକୁ ଆସିଛି, ଯାହା ଦେଖି ତାଙ୍କ ପ୍ରଶଂସକମାନେ ଭାବପ୍ରବଣ ହୋଇପଡିଛନ୍ତି । ତାଙ୍କ ବାପାଙ୍କ ଅନ୍ତିମ ସଂସ୍କାରରେ ଅଙ୍କିତା ସ୍ୱାମୀ ବିକି ଜୈନଙ୍କୁ ହଗ୍ କରି କାନ୍ଦୁଛନ୍ତି ।
ଏହା ମଧ୍ୟ ପଢନ୍ତୁ: ପୁଣି ବାହା ହେଲେ ଅଙ୍କିତା ଲୋଖଣ୍ଡେ, ଦେଖନ୍ତୁ ସ୍ବାମୀଙ୍କ ସହ ରୋମାଣ୍ଟିକ ଫଟୋ
ସୂଚନା ଥାଉ କି, ଅଙ୍କିତା 2009ରେ ଏକତା କପୁରଙ୍କ ସିରିଏଲ ପବିତ୍ର ରିସ୍ତାରୁ ଅଭିନୟ କ୍ୟାରିଅର ଆରମ୍ଭ କରିଥିଲେ । ଏହି ଶୋ’ରେ ତାଙ୍କୁ ସ୍ୱର୍ଗତ ଅଭିନେତା ସୁଶାନ୍ତ ସିଂ ରାଜପୁତଙ୍କ ବିପକ୍ଷରେ ଦେଖିବାକୁ ମିଳିଥିଲା । ସେ ଅର୍ଚ୍ଚନା ଭୂମିକାରେ ଏକ ଘରେ ଘରେ ବେଶ ପରିଚିତ ହୋଇଥିଲେ । ଏହା ପରେ ଅଙ୍କିତା କମେଡି ସର୍କସ, ଏକ ଥି ନାୟିକା ଏବଂ ଝଲକ ଦିଖଲା ଜା ସମେତ ଅନେକ ଶୋ' କରିଥିଲେ । ଅଙ୍କିତା ବଲିଉଡ ଫିଲ୍ମରେ ମଧ୍ୟ କାମ କରିଛନ୍ତି । ସେ କଙ୍ଗନା ରଣାୱତଙ୍କ ବିପକ୍ଷରେ ମଣିକର୍ଣ୍ଣିକା ଚଳଚ୍ଚିତ୍ର ସହ ବଲିଉଡରେ ଡେବ୍ୟୁ କରିଥିଲେ । ଏହା ପରେ ତାଙ୍କୁ ବାଗୀ 3ରେ ମଧ୍ୟ ନଜର ଆସିଥିଲେ । ବର୍ତ୍ତମାନ, ଅଙ୍କିତା ଦୀର୍ଘ ସମୟ ଧରି ପରଦାରୁ ଦୂରରେ ରହିଛନ୍ତି ଏବଂ ବିକି ଜୈନଙ୍କୁ ବିବାହ କରି ସୁଖମୟ ଜୀବନ ବିତାଉଛନ୍ତି ।
