ହାଇଦ୍ରାବାଦ: ବର୍ତ୍ତମାନ ବଲିଉଡ ଲୋକପ୍ରିୟ ଦମ୍ପତି ଐଶ୍ବର୍ଯ୍ୟା ରାୟ ଏବଂ ଅଭିଷେକ ବଚ୍ଚନ ବ୍ୟକ୍ତିଗତ ଜୀବନୀକୁ ନେଇ ଲାଇମ ଲାଇଟରେ ରହିଛନ୍ତି । କିଛି ଦିନ ତଳେ ଉଭୟଙ୍କ ବିବାହ ବିଚ୍ଛେଦ ଚର୍ଚ୍ଚା ଜୋର ଧରିଥିଲା । ଏପରିକି ଶ୍ବଶୁର ଆମିତାଭ ବଚ୍ଚନ ମଧ୍ୟ ଐଶ୍ବର୍ଯ୍ୟାଙ୍କୁ ସୋସିଆଲ ମିଡିଆରେ ଅନଫଲୋ କରିଦେଇଥିବା କୁହାଯାଉଥିଲା । ତେବେ ଏହି ଗୁଜବ ମଧ୍ୟରେ ନିକଟରେ ଆରାଧ୍ୟାଙ୍କ ସ୍କୁଲ ବାର୍ଷିକ କାର୍ଯ୍ୟକ୍ରମରେ ଉଭୟଙ୍କୁ ଏକାଠି ଦେଖିବାକୁ ମିଳିଥିଲା । ଏଥିସହ ବର୍ତ୍ତମାନ ପ୍ରୋ କବାଡି ଲିଗ ମ୍ୟାଚରେ ପୁରା ବଚ୍ଚନ ପରିବାର ଏକାଠି ନଜର ଆସିଛନ୍ତି । ଅଭିଷେକ ବଚ୍ଚନଙ୍କ କବାଡି ଟିମକୁ ସମର୍ଥନ କରିବା ପାଇଁ ଝିଅ ଆରଧ୍ୟାଙ୍କ ସହ ଐଶ୍ବର୍ଯ୍ୟା ରାୟ, ଅମିତାଭ ବଚ୍ଚନ ଏକାଠି ସାମିଲ ହୋଇଛନ୍ତି ।
ଏହି ମ୍ୟାଚର ଅନେକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭାଇରାଲ ଭିଡିଓରେ ଦେଖିବାକୁ ମିଳିଛି ଯେ, ପୁରା ବଚ୍ଚନ ପରିବାର ଅଭିଷେକ ବଚ୍ଚନଙ୍କ କବାଡି ଟିମ୍ ଜୟପୁର ପିଙ୍କ ପାନ୍ଥର୍ସକୁ ସମର୍ଥନ କରିବା ପାଇଁ ଏଥିରେ ସାମିଲ ହୋଇଛି । ଏହି ସମୟରେ ସମସ୍ତେ ଜୟପୁର ପିଙ୍କ ପାନ୍ଥର୍ସର ଜର୍ସି ପିନ୍ଧିଥିବାର ନଜର ଆସିଛନ୍ତି । ଏଥିସହ ସମସ୍ତେ ଟିମକୁ ନେଇ ବେଶ ଉତ୍ସାହିତ ଏବଂ ଖୁସି ଥିବା ଦେଖିବାକୁ ମିଳିଛି ।