ହାଇଦ୍ରାବାଦ: ସାଉଥ୍ ସୁପରଷ୍ଟାର ଅଲ୍ଲୁ ଅର୍ଜୁନଙ୍କ ପାଇଁ ‘ପୁଷ୍ପା’ ଚଳଚ୍ଚିତ୍ର କୌଣସି ବରଦାନଠୁ କମ୍ ନଥିଲା । ପ୍ରଥମେ ଏହି ଚଳଚ୍ଚିତ୍ର ବକ୍ସ ଅଫିସରେ ଅତୁଳନୀୟ ସଫଳତା ହାସଲ କରିଥିଲା । କିନ୍ତୁ ଏହା ପରେ ଫିଲ୍ମଟି ଯାହା କମାଲ କରି ଦେଖାଇଛି, ତାହା ଗତ 7 ଦଶନ୍ଧି ଧରି ଚଳଚ୍ଚିତ୍ର ଇଣ୍ଡଷ୍ଟ୍ରିରେ କେବେ ବି ହୋଇପାରି ନଥିଲା । ଅନେକ ତେଲୁଗୁ ଚଳଚ୍ଚିତ୍ରକୁ ଜାତୀୟ ପୁରସ୍କାର ପ୍ରଦାନ କରାଯାଇଛି । କିନ୍ତୁ ଏପର୍ଯ୍ୟନ୍ତ କୌଣସି ତେଲୁଗୁ ଅଭିନେତା ଏହି ପୁରସ୍କାର ପାଇନଥିଲେ । ବର୍ତ୍ତମାନ ‘ପୁଷ୍ପା: ଦ ରାଇଜ୍’ ଚଳଚ୍ଚିତ୍ର ପାଇଁ ଅଲ୍ଲୁ ଅର୍ଜୁନଙ୍କୁ ଜାତୀୟ ପୁରସ୍କାର ପ୍ରଦାନ କରାଯାଇଛି । ଏହି ଖବର ସହିତ ଅଭିନେତାଙ୍କ ଘରେ ବର୍ତ୍ତମାନ ଉତ୍ସବର ମାହୋଲ ଦେଖିବାକୁ ମିଳିଛି ।
ସୋସିଆଲ ମିଡିଆରେ ଅନେକ ଭିଡିଓ ସାମ୍ନାକୁ ଆସୁଛି, ଯେଉଁଥିରେ ଦେଖିବାକୁ ମିଳିଛି ଯେ ଫ୍ୟାନ୍ସମାନେ ଅଲ୍ଲୁ ଅର୍ଜୁନଙ୍କୁ ଅଭିନନ୍ଦନ ଜଣାଇବା ପାଇଁ ତାଙ୍କ ଘରେ ପହଞ୍ଚିଛନ୍ତି । ଫ୍ୟାନ୍ସ ତାଙ୍କୁ ଆଲିଙ୍ଗନ କରୁଛନ୍ତି ଏବଂ ଏହି ବିଶେଷ ଉତ୍ସବରେ ତାଙ୍କୁ ଅଭିନନ୍ଦନ ଜଣାଇଛନ୍ତି। ଅନେକ ପ୍ରଶଂସକ ଅଲ୍ଲୁ ଅର୍ଜୁନଙ୍କ ଘର ବାହାରେ ଏକାଠି ହୋଇଛନ୍ତି । ତାଙ୍କର ଘନିଷ୍ଠ ବନ୍ଧୁମାନେ ତାଙ୍କୁ ଅଭିନନ୍ଦନ ଜଣାଇବାକୁ ତାଙ୍କ ଘରକୁ ଆସୁଛନ୍ତି ।
ଏହି ସମୟରେ ଅଲ୍ଲୁଙ୍କ ପିତା ଅଲୁ ଅରବିନ୍ଦଙ୍କୁ ଦେଖିବାକୁ ମିଳିଛି । ଏହି ବିଶେଷ ଉତ୍ସବରେ ଅଲୁ ଅରବିନ୍ଦ ତାଙ୍କ ପୁଅକୁ ଆଲିଙ୍ଗନ କରିଛନ୍ତି । ଉଭୟଙ୍କ ଖୁସି କହିଲେ ନସରେ । ଏହା ବ୍ୟତୀତ ସୁକୁମାର ଫିଲ୍ମର ନିର୍ଦ୍ଦେଶକ ମଧ୍ୟ ନଜର ଆସିଛନ୍ତି । ଏହି ଖବର ଶୁଣିବା ମାତ୍ରେ ସୁକୁମାର ଆସି ଅଲୁ ଅର୍ଜୁନଙ୍କୁ ଆଲିଙ୍ଗନ କରିଛନ୍ତି । ଏହା ବ୍ୟତୀତ ଅନ୍ୟ ଲୋକମାନେ ମଧ୍ୟ ଧୀରେ ଧୀରେ ଅଲୁ ଅର୍ଜୁନଙ୍କୁ ଭେଟି ତାଙ୍କୁ ଅଭିନନ୍ଦନ ଜଣାଇବାକୁ ଆସୁଛନ୍ତି। ଏସବୁକୁ ନେଇ ଅଲ୍ଲୁଙ୍କ ମୁହଁରେ ଖୁସି ସ୍ପଷ୍ଟ ଭାବରେ ନଜର ଆସୁଛି ।