ହାଇଦ୍ରାବାଦ:୧୭ ଦିନ ପରେ ଉତ୍ତରକାଶୀ ସିଲ୍କିରା ଟନେଲରୁ ଫସି ରହିଥିବା ସମସ୍ତ ୪୧ ଶ୍ରମିକଙ୍କୁ ଉଦ୍ଧାରକାରୀ ଟିମ ସଫଳତାର ସହ ଉଦ୍ଧାର କରିଛନ୍ତି । ସମସ୍ତ ଶ୍ରମିକଙ୍କୁ ଉଦ୍ଧାର ପରେ ହସ୍ପିଟାଲ ପଠାଯାଇଥିଲା । ସମସ୍ତେ ସୁସ୍ଥ ଥିବା ଜଣାପଡିଛି । ଏହା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦ୍ଧାର ହୋଇଥିବା ସମସ୍ତ ଶ୍ରମିକଙ୍କ ସହ କଥାବାର୍ତ୍ତା ହୋଇଛନ୍ତି । ଅନ୍ୟପକ୍ଷରେ ଉଦ୍ଧାର ହୋଇଥିବା ପ୍ରତ୍ୟେକ ଶ୍ରମିକଙ୍କ ପାଇଁ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ୧ ଲକ୍ଷ ଟଙ୍କା ଆର୍ଥିକ ସହାୟତା ଘୋଷଣା କରିଛନ୍ତି । ବର୍ତ୍ତମାନ ଏହି ମହାନ ସଫଳତା ପାଇଁ ବଲିଉଡର ସେଲିବ୍ରିଟିମାନେ ସମସ୍ତ ଶ୍ରମିକଙ୍କୁ ଏବଂ ଉଦ୍ଧାରକାରୀ ଟିମ୍କୁ ଅଭିନନ୍ଦନ ଜଣାଇଛନ୍ତି ।
ଗତ ମଙ୍ଗଳବାର ବିଳମ୍ବିତ ରାତିରେ ଏକ୍ସରେ ଉଦ୍ଧାର କାର୍ଯ୍ୟର ଏକ ଫଟୋ ସେୟାର କରି ଅକ୍ଷୟ କୁମାର ରେସ୍କ୍ୟୁ ଟିମକୁ ଅଭିବାଦନ ଜଣାଇଛନ୍ତି । ସେ କ୍ୟାପସନରେ ଲେଖିଛନ୍ତି, ୪୧ ଜଣଙ୍କ ଉଦ୍ଧାର ବିଷୟରେ ଜାଣି ମୁଁ ବହୁତ ଖୁସି । ମୁଁ ବହୁତ ଆରାମ ଅନୁଭବ କରୁଛି । ଉଦ୍ଧାରକାରୀ ଟିମ୍ର ପ୍ରତ୍ୟେକ ସଦସ୍ୟଙ୍କୁ ନମସ୍କାର । ଆପଣମାନେ ବହୁତ ଭଲ କାମ କରିଛନ୍ତି ଏହା ଏକ ନୂତନ ଭାରତ ଏବଂ ଆମେ ସମସ୍ତେ ବହୁତ ଗର୍ବ ଅନୁଭବ କରୁ । ଜୟ ହିନ୍ଦ ।'
ଏହି ସମୟରେ କଙ୍ଗନା ରାଣାୱତ ମଧ୍ୟ ଉତ୍ତରକାଶୀ ଟନେଲର ଫଟୋ ସେୟାର କରିଛନ୍ତି । ଫଟୋରେ, କିଛି ବୃଦ୍ଧ ମହିଳା ସଫଳ ଉଦ୍ଧାର ପାଇଁ ସେମାନଙ୍କ ଭଗବାନଙ୍କ ନିକଟରେ ପ୍ରାର୍ଥନା କରୁଥିବା ଦେଖିବାକୁ ମିଳିଛି । ଏହି ଫଟୋ ସେୟାର କରି କଙ୍ଗନା କ୍ୟାପସନରେ ଲେଖିଛନ୍ତି, 'ଉଦ୍ଧାର କାର୍ଯ୍ୟ ସଫଳ ହୋଇଛି । ହର ହର ମହାଦେବ ।' ଏହି ଚମତ୍କାର ବିଜୟରେ ମ୍ୟୁଜିସିଆନ ସୋଫି ଚୌଧୁରୀ ବି ଉଦ୍ଧାରକାରୀ ଟିମର କିଛି ଫଟୋ ସେୟାର କରି ଉଦ୍ଧାରକାରୀ ଟିମ୍ ଏବଂ ୪୧ ଜଣ ଶ୍ରମିକଙ୍କ ପ୍ରଶଂସା କରିଛନ୍ତି ।