ହାଇଦ୍ରାବାଦ: ଅପେକ୍ଷା ହୋଇଛି ଅନ୍ତ । ଆଜି ରିଲିଜ ହୋଇଛି ସାଉଥ ସୁପରଷ୍ଟାର ପ୍ରଭାସ ଏବଂ ବଲିଉଡ ଅଭିନେତ୍ରୀ କ୍ରିତି ସାନନଙ୍କ ଅଭିନୀତ ପାନ ଇଣ୍ଡିଆ ଫିଲ୍ମ 'ଆଦିପୁରୁଷ' । 2D ଏବଂ 3D ରେ ସିଲଭର ସ୍କ୍ରିନରେ ରିଲିଜ ହୋଇଛି । ପ୍ରଥମ ଦିନର ପ୍ରଥମ ଶୋ' ଦେଖିବାକୁ ପ୍ରଶଂସକମାନେ ପ୍ରେକ୍ଷାଳୟରେ ପ୍ରବଳ ଭିଡ଼ ଜମିଛି । ଆଡଭାନ୍ସ ଟିକେଟ ବୁକିଂରେ ରେକର୍ଡ ସୃଷ୍ଟି କରିଛି ଫିଲ୍ମ । ବର୍ତ୍ତମାନ ଫିଲ୍ମ ବିଶ୍ବର 10 ହଜାର ସ୍କ୍ରିନରେ ରିଲିଜ ହୋଇଛି । ଦେଶର ପ୍ରତ୍ୟେକ ଥିଏଟରରେ ବଜରଙ୍ଗବଲିଙ୍କ ପାଇଁ ପ୍ରଥମ ସିଟ ରିଜର୍ଭ କରାଯାଇଛି ଏବଂ ସେଠାରେ ପ୍ରଭୁ ହନୁମାନ ଜୀଙ୍କର ଫଟୋ ରଖାଯାଇଛି ।ତେବେ ଏହାକୁ ଦେଖି ଫିଲ୍ମ ପ୍ରଥମ ଦିନରେ ଅଧିକ ରୋଜଗାର ସହ ଲୋକପ୍ରିୟତା ହାସଲ କରିବ ବୋଲି ଆଶା କରାଯାଉଛି ।
ଓମ ରାଉତଙ୍କ ଦ୍ୱାରା ଲିଖିତ ଏବଂ ନିର୍ଦ୍ଦେଶିତ ଆଦିପୁରୁଷ ହେଉଛି ପ୍ରାଚୀନ ସଂସ୍କୃତ ଉପନ୍ୟାସ ରାମାୟଣର ଏକ ଆଡାପ୍ଟେସନ । ଯାହା 500କୋଟି ବଜେଟରେ ନିର୍ମିତ ହୋଇଛି । ଏହି ଫିଲ୍ମଟି ବିଶ୍ବର 10 ହଜାର ପରଦାରେ ରିଲିଜ କରିଛି । ଭାରତର 7,000 ସ୍କ୍ରିନରେ ରିଲିଜ ହେବା ସହ ବିଦେଶର 3000 ସ୍କ୍ରିନରେ ରିଲିଜ ହୋଇଛି । ସେପଟେ ଫିଲ୍ମକୁ ନେଇ ଫ୍ୟାନ୍ସଙ୍କ ମଧ୍ୟରେ ଉତ୍ସାହିତ ଦେଖିବାକୁ ମିଳିଛି । ତେଲେଙ୍ଗାନା ଏବଂ ଆନ୍ଧ୍ରପ୍ରଦେଶରେ ପ୍ରଭାସଙ୍କ ପ୍ରଶଂସକଙ୍କ ମଧ୍ୟରେ ଏକ ଭିନ୍ନ ସ୍ତରର କ୍ରେଜ୍ ଦେଖିବାକୁ ମିଳୁଛି । ସକାଳୁ ଠାରୁ ଫ୍ୟାନ୍ସ ଆଦିପୁରୁଷର ପ୍ରଚାର କରୁଥିବା ଦେଖିବାକୁ ମିଳିଛି । ଥିଏଟରକୁ ମନ୍ଦିର ପରି ସଜାଇଥିବା ନଜର ଆସିଛି ।