ମୁମ୍ବାଇ:ପୁଣିଥରେ ଭାରତୀୟ ସିନେମାରେ ଏକ ବଡ଼ ଧମାକା ହେବାକୁ ଯାଉଛି । ବାହୁବଲୀ, ଆରଆରଆର, କେଜିଏଫ ଏବଂ ପଠାନ ଭଳି ଫିଲ୍ମ ବିଶ୍ୱବ୍ୟାପୀ ସୁପରହିଟ୍ ହେବା ପରେ ବର୍ତ୍ତମାନ ସାଉଥ୍ ସୁପରଷ୍ଟାର ପ୍ରଭାସଙ୍କ ଅଭିନୀତ ଫିଲ୍ମ ଆଦିପୁରୁଷ ସହ ବକ୍ସ ଅଫିସରେ ଧମାକା କରିବାକୁ ଯାଉଛନ୍ତି । ଫିଲ୍ମର ଆଡଭାନ୍ସ ବୁକିଂ ଟିକେଟ ମଧ୍ୟ ଅଧିକା ହୋଇଛି। ଯାହାକୁ ନେଇ କୁହାଯାଉଛି ଯେ, ଫିଲ୍ମଟିର ପ୍ରଥମ ଦିନର କଲେକ୍ସନ 50 କୋଟି ଅତିକ୍ରମ କରିପାରେ । ତେବେ ରିଲିଜ ପୂର୍ବରୁ ଫିଲ୍ମ ଷ୍ଟାର୍ଙ୍କୁ ଛୁଟୁଛି ଶୁଭେଚ୍ଛାର ସୁଅ । ଏହି ପରିପ୍ରେକ୍ଷୀରେ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଏବଂ ବଲିଉଡ ଅଭିନେତା ଆମୀର ଖାନ ଟିମକୁ ଶୁଭେଚ୍ଛା ଜଣାଇଛନ୍ତି ।
ସୋସିଆଲ ମିଡିଆରେ ପୋଷ୍ଟ ସେୟାର କରି ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଏବଂ ଆମୀର ଖାନ 'ଆଦିପୁରୁଷ' ଟିମ୍କୁ ଶୁଭେଚ୍ଛା ଜଣାଇଛନ୍ତି । ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଟ୍ୱିଟରରେ ସେ ନିଜେ ଫିଲ୍ମ ଦେଖିବାର ଏକ ଫଟୋ ସେୟାର କରିଛନ୍ତି । ଲେଖିଛନ୍ତି, "ଫିଲ୍ମର ପୁରା ଟିମ୍କୁ ଶୁଭେଚ୍ଛା ।" ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଲେଖିଛନ୍ତି, "ଶ୍ରୀରାମଙ୍କ ଜୀବନୀ ଉପରେ ଆଧାରିତ ଫିଲ୍ମ ଆଦିପୁରୁଷ ଉପରେ ପ୍ରଭୁ ରାମଙ୍କ ଆଶୀର୍ବାଦ ହେଉ । ଆଦିପୁରୁଷର ନିର୍ଦ୍ଦେଶକ, ନିର୍ମାତା ଏବଂ ଟିମକୁ ଶୁଭେଚ୍ଛା, ଫିଲ୍ମଟି ହିଟ୍ ହେଉ ।"