ନୟାଗଡ:ରକ୍ତ ରଞ୍ଜିତ ହେଲା ରାସଙ୍ଗ ଗାଁ ! ପୂର୍ବ ଶତ୍ରୁତାରୁ ଗଡିଲା ମୁଣ୍ଡ, ଯୁବକଙ୍କୁ ଗୁଳି କରି ନିର୍ମମ ହତ୍ୟା । ଦେଶୀ ବନ୍ଧୁକରୁ ଗୁଳି ଚଳାଇ ଯୁବକଙ୍କୁ ହତ୍ୟା । ଏଭଳି ଘଟଣା ଘଟିଛି ନୟାଗଡ ଜିଲ୍ଲା ଗଣିଆ ଥାନା ରାସଙ୍ଗ ଗ୍ରାମରେ । ମୃତକ ଜଣଙ୍କ ହେଉଛନ୍ତି ରଜତ ରାଉତ, ତାଙ୍କୁ ଗୁଳି କରି ହତ୍ୟା କରିଥିବା ବ୍ୟକ୍ତି ହେଉଛନ୍ତି ତାରେନି ବେହେରା ଓ ସାଗର ବେହେରା ।
ଏହା ମଧ୍ୟ ପଢନ୍ତୁ-ଗଞ୍ଜେଇ ଯାଞ୍ଚ ବେଳେ କାରରୁ ମିଳିଲା ଏକ କୁଇଣ୍ଟାଲ ରୂପା ଇଟା
ମିଳିଥିବା ସୂଚନା ଅନୁୟାୟୀ ରାସଙ୍ଗ ଗ୍ରାମର ରଜତ ରାଉତଙ୍କ ସହ ରାସଙ୍ଗ ପଞ୍ଚାୟତ ଗୋଛାବାରି ଗ୍ରାମର ତାରେନି ବେହେରା ଓ ସାଗର ବେହେରାଙ୍କ ସହ ପୂର୍ବ ଶତ୍ରୁତା ରହିଥିଲା । ଗୁରୁବାର ଦିନ ରଜତ ରାଉତ ତାଙ୍କ ଟ୍ରାକ୍ଟର ନେଇ ପାଟିକଟା ମୁଣ୍ଡିଆକୁ ପଥର ଆଣିବା ପାଇଁ ଯାଉଥିବା ସମୟରେ ପୂର୍ବ ଶତ୍ରୁତାକୁ କେନ୍ଦ୍ର କରି ରଜତଙ୍କ ସହ ତାରେନି ଓ ସାଗର ବଚସା କରିଥିଲେ, ଯାହା ପରେ ଉଗ୍ର ରୂପ ନେବାରୁ ସ୍ଥାନୀୟଲୋକେ ଆୟତ୍ତକୁ ଆଣିଥିଲେ, କିନ୍ତୁ କିଛି ବାଟ ଗଲା ପରେ ପୁଣି ତିନି ଜଣଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା ।
ତେବେ ରଜତ ଘରକୁ ନଫେରିବାରୁ ପରିବାର ଲୋକେ ବହୁ ଖୋଜା ଖୋଜି କରିଥିଲେ, ପରେ ଜଙ୍ଗଲରେ ମୃତଦେହ ସହିତ ଏକ ଦେଶୀ ବନ୍ଧୁକ ପଡିଥିବା ଦେଖି ଗ୍ରାମବାସୀ ଏବଂ ପରିବାର ଲୋକେ ଗଣିଆ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଦେଶୀ ବନ୍ଧୁକ ଜବତ କରି ତଦନ୍ତ ଚଲାଇଛି । ତେବେ ରଜତ ରାଉତଙ୍କୁ ହତ୍ୟା ପରେ ଦୁଇ ହତ୍ୟାକାରୀ ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ ସେମାନଙ୍କୁ ଖୋଜୁଛି ପୋଲିସ, ତଦନ୍ତ ଜାରି ରହିଥିବା ବେଳେ ପୋଲିସ ଅଭିଯୁକ୍ତଙ୍କ କୌଣସି ପତ୍ତା ପାଇପାରିନାହିଁ । ସ୍ଥାନୀୟ ଅଞ୍ଚଳରେ ଏନେଇ ଏକ ଅପ୍ରୀତିକର ପରିବେଶ ସୃଷ୍ଟି ହୋଇଛି ।
ନିକଟରେ ଓଡ଼ଗାଁର ଜ୍ୟୋତିର୍ମୟୀଙ୍କ ମୃତ୍ୟୁ ଘଟଣା ପୁରା ଜିଲ୍ଲାରେ ଚାଞ୍ଚଲ୍ୟ ଖେଳାଇ ଦେଇଥିଲା, ଏହା ହତ୍ୟା ନା ଆତ୍ମହତ୍ୟା ତାହା ଆଜି ପର୍ଯ୍ୟନ୍ତ ସ୍ପଷ୍ଟ ହୋଇନଥିବା ବେଳେ ସ୍ବାମୀର ପରକୀୟା ପ୍ରୀତିରୁ ଏହି ହତ୍ୟାକାଣ୍ଡ ଘଟିଥିବା କୁହାଯାଉଥିଲା । ଜ୍ୟୋତିର୍ମୟୀଙ୍କ ମୃତଦେହ ଘରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯିବା ପରେ ହତ୍ୟା ଅଭିଯୋଗ ଆଣିଥିଲେ ମହିଳାଙ୍କ ବାପାଘର ଲୋକେ । ଏହାପରେ ପୋଲିସ ଏକ ମାମଲା ରୁଜୁ କରି ୫ଜଣଙ୍କୁ ଅଟକ ରଖିଥିଲା । ଏହି ଘଟଣାରେ ଏବେ ମଧ୍ୟ ତଦନ୍ତ ଜାରି ରହିଛି ।
