ଭୁବନେଶ୍ବର: ବ୍ୟାଙ୍କ କ୍ୟାସିୟରଙ୍କ କୋଟିପତି ହେବା ନିଶା । ଗଞ୍ଜେଇ ଚାଲାଣ କରି ଭାବିଥିଲେ ରାତାରାତି ହେବେ ମାଲେ ମାଲ । ଏଥି ପାଇଁ ରଖିଥିଲେ ଜଣେ ସହଯୋଗୀ ଓ କିଣିଥିଲେ ଏକ୍ସୟୁଭି କାର। କିନ୍ତୁ କୋଟିପତି ହେବା ନିଶାରେ ଆଜି ପୂର୍ଣ୍ଣଚ୍ଛେଦ ପକାଇଛି ଏସଟିଏଫ । ଗଞ୍ଜେଇ ଚାଲାଣ କରୁଥିବା ବେଳେ ଆଜି ଏସଟିଏଫ ହାତରେ ଧରାପଡି ଗିରଫ ହୋଇଛନ୍ତି ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ କିଶୋରନଗର ଅନୁଗୁଳ ବ୍ରାଞ୍ଚର କ୍ୟାସିଅର ସୁଶାନ୍ତ କୁମାର ସାହୁ । ପ୍ରାୟ ୧ କ୍ବିଣ୍ଟାଲ ୬୨ କେଜି ଗଞ୍ଜେଇ ଜବତ କରିଛି STF ।
ସୂଚନା ଅନୁଯାୟୀ ଆଜି ଏକ କାରରେ ଏହି ସବୁ ଗଞ୍ଜେଇ ଚାଲାଣ ହେଉଥିବା ନେଇ ସୁରାକ ପାଇଥିଲା ଏସଟିଏଫ୍ ଟିମ । ଏହାପରେ ଅନୁଗୁଳ କିଶୋର ନଗର ଅଞ୍ଚଳର ବାଙ୍କ ପଳାଶା ନିକଟରୁ କାର ସହ ଗଞ୍ଜେଇ ଜବତ କରିଥିଲା ଏସଟିଏଫ । ଯାହାର ମାଷ୍ଟର ମାଇଣ୍ଡ ଥିଲେ ବ୍ୟାଙ୍କ କ୍ଲର୍କ ସୁଶାନ୍ତ କୁମାର ସାହୁ। ଏସଟିଏଫ୍ ତାକୁ ଗିରଫ କରିବା ସହ ତାଙ୍କ ସହଯୋଗୀ ଜୁଗଳ ସାହୁକୁ ମଧ୍ୟ ଗିରଫ କରିଥିଲା।