ଭୁବନେଶ୍ବର: ସମ୍ବଲପୁର ଜିଲ୍ଲାର ହୁମା ବକ୍ର ମନ୍ଦିର ରାଜ୍ୟର ପ୍ରସିଦ୍ଧ ଶୈବ ପୀଠ ମାନଙ୍କ ମଧ୍ୟରୁ ଅନ୍ୟତମ । ମହାଦେବଙ୍କ ବକ୍ର ମନ୍ଦିର ଭାବରେ ଏହାର ରହିଛି ସ୍ବତନ୍ତ୍ର ମାନ୍ୟତା । ତେବେ ମନ୍ଦିର ନିକଟ ଦେଇ ବହି ଯାଇଥିବା ମହାନଦୀ ଘାଟରେ ଥିବା କୁଢ଼ୋ ମାଛ ମାନଙ୍କ ପ୍ରତି ପର୍ଯ୍ୟଟକ ତଥା ଶ୍ରଦ୍ଧାଳୁଙ୍କ ବିଶେଷ ଆକର୍ଷଣ ଓ ଶ୍ରଦ୍ଧା ରହିଛି । ତେବେ ବର୍ତ୍ତମାନ ବିପଦରେ ପଡ଼ିଛି ଏହି ଦୁର୍ଲଭ ମାଛଙ୍କ ପ୍ରଜାତି । ଯାହାକୁ ନେଇ ଚିନ୍ତା ପ୍ରକଟ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ଅନାଦି କାଳରୁ ଏହି କୁଢ଼ୋ ମାଛଙ୍କୁ ଭଗବାନ ବିଷ୍ଣୁଙ୍କ ଅବତାର ବୋଲି ବିଶ୍ବାସ କରାଯାଏ । ତେବେ ବର୍ତ୍ତମାନ ଏହି ମାଛଙ୍କୁ ସହଜରେ ଧରିବା ପାଇଁ ହୁମା ମନ୍ଦିର ମଛିଦ୍ର ଘାଟ ଠାରୁ କିଛି ଦୂରରେ କୁଦ ଗଣ୍ଡେରପୁର ଓ ଚିପିଲିମାରେ ଏହି ଦୁର୍ଲଭ ମାଛକୁ ସହଜରେ ଧରିବା ପାଇଁ ବେଆଇନ ଭାବରେ ବିସ୍ଫୋରଣ କରାଯାଉଛି । ଯାହାପରେ ମଲା କୁଢ଼ୋ ମାଛ ସବୁ ପାଣିରେ ଭାସୁଥିବାର ଦେଖିବାକୁ ମିଳିଛି । ଏନେଇ ଟ୍ବିଟ କରି ଚିନ୍ତା ପ୍ରକଟ କରିବା ସହ ଏହା ଉପରେ ରୋକ୍ ଲଗାଇବା ପାଇଁ ପ୍ରଶାସନ ପକ୍ଷରୁ ପଦକ୍ଷେପ ନିଆଯିବା ଉଚିତ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ପ୍ରଧାନ ।