ସମ୍ବଲପୁର: ହାଇକୋର୍ଟ ବେଞ୍ଚ ପ୍ରତିଷ୍ଠା ଦାବି ନେଇ ପୂର୍ବରୁ ନିଆଯାଇଥିବା ନିଷ୍ପତ୍ତି ଅନୁସାରେ ଆଜି (ବୁଧବାର) ସମ୍ବଲପୁରରେ 12 ଘଣ୍ଟିଆ ବନ୍ଦ ପାଳନ ହୋଇଛି । କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ଓ ନାଗରିକ କ୍ରିୟାନୁଷ୍ଠାନ କମିଟିର ଡାକରାରେ ସକାଳ 6 ଟାରୁ ଆନ୍ଦୋଳନ ଆରମ୍ଭ ହୋଇଥିଲା । ସମ୍ବଲପୁର ସହରର ସରକାରୀ, ବେସରକାରୀ ଅଫିସ ସହ କୋର୍ଟ କଚେରୀ ସମ୍ପୂର୍ଣ୍ଣ ବନ୍ଦ ରହିଥିଲା । ରାସ୍ତାରେ ଶହ ଶହ ଗାଡି ଅଟକି ରହିଥିବା ସହ ଦୋକାନ ବଜାର ସବୁ ବନ୍ଦ ରହିଥିଲା ।
ହାଇକୋର୍ଟ ବେଞ୍ଚ ପ୍ରତିଷ୍ଠା ନେଇ ପଶ୍ଚିମ ଓଡିଶା ବନ୍ଦ
ସକାଳୁ ସମ୍ବଲପୁର କ୍ଷେତରାଜପୁରର ମୁଖ୍ୟ ରେଳ ଷ୍ଟେସନରେ ଆନ୍ଦୋଳନକାରୀ ରେଳ ଲାଇନରେ ବସି ଟ୍ରେନ ଗୁଡିକୁ ଅଟକାଇ ଦେଇଥିଲେ । ଫଳରେ ସମ୍ବଲପୁର-ପୁରୀ ଟ୍ରେନ ବାତିଲ ହୋଇଥିବାବେଳେ ବହୁ ଟ୍ରେନ ଚଳାଚଳ ବାଧା ପ୍ରାପ୍ତ ହୋଇଥିଲା । ବାରମ୍ବାର ବୁଝା ସୁଝା ପରେ ଆନ୍ଦୋଳନକାରୀ ରେଳ ଲାଇନରୁ ନହଟିବାରୁ ପୋଲିସ ବଳ ପୂର୍ବକ ଆନ୍ଦୋଳନକାରୀଙ୍କୁ ହଟାଇଥିଲା । ଏହି ଘଟଣାରେ ସମ୍ବଲପୁର ଆରପିଏଫ ପୋଲିସ 21 ଜଣଙ୍କୁ ଗିରଫ କରିଥିଲା ।