ସମ୍ବଲପୁର: ଜିଲ୍ଲା ଯାଦବ ସଂଘ ପକ୍ଷରୁ ସମ୍ବଲପୁର ଜିଲ୍ଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କୁ 2 ଦଫା ଦାବି ସମ୍ବଳିତ ଏକ ଦାବିପତ୍ର ପ୍ରଦାନ କରାଯାଇଛି। ସ୍ବର୍ଗତ ବିପି ମଣ୍ଡଳଙ୍କ 103ତମ ଜନ୍ମ ଜୟନ୍ତୀ ଅବସରରେ ଆଜି ଜାତିଭିତ୍ତିକ ଜନ ଗଣନା ଓ ରାଜ୍ୟରେ ଶିକ୍ଷା ଓ ସରକାରୀ ନିଯୁକ୍ତି କ୍ଷେତ୍ରରେ 27 ପ୍ରତିଶତ ସଂରକ୍ଷଣ ଦାବିରେ ଏହି ଦାବିପତ୍ର ପ୍ରଦାନ କରାଯାଇଛି।
ସଂଘ ପକ୍ଷରୁ କୁହାଯାଇଛି ଯେ 1931 ପରେ ଆଜି ପର୍ଯ୍ୟନ୍ତ ଜାତି ଭିତ୍ତିକ ଜନ ଗଣନା ହୋଇନାହିଁ । ଯଦି ବି କେବେ ଜାତି ଭିତ୍ତିକ ଜନଗଣନା ହୋଇଛି, ତେବେ ତାହାକୁ ଲୋକଙ୍କ ଆଗରେ ପ୍ରକାଶ କରାଯାଇନାହିଁ । ଏହିଭଳି ସ୍ଥିତିରେ ପଛୁଆ ବର୍ଗର ଲୋକମାନେ ନିଜର ସାମ୍ବିଧାନିକ ଅଧିକାରରୁ ବଞ୍ଚିତ ରହିବା ସହ ସମାଜରେ ସାମାଜିକ ଅସମାନତା ବଢ଼ିବାରେ ଲାଗିଛି । ଅନ୍ୟପଟେ ରାଜ୍ୟରେ ପଛୁଆ ବର୍ଗର ଲୋକଙ୍କ ପାଇଁ କୌଣସି ପ୍ରକାରର ସଂରକ୍ଷଣର ବ୍ୟବସ୍ଥା ନାହିଁ । ବିଭିନ୍ନ ସମୟରେ ରାଜ୍ୟ ସରକାର ବିଭିନ୍ନ ଆଇନଗତ ପ୍ରତିବନ୍ଧକ ଆଳରେ ପଛୁଆ ବର୍ଗର ଲୋକଙ୍କ ପ୍ରତି ଅବହେଳା କରୁଥିବା ସଂଘ ଅଭିଯୋଗ କରିଛି ।