ସମ୍ବଲପୁର : ନକଲି ସମ୍ବଲପୁରୀ ଛାପା ଶାଢୀ ପୋଡିଲା ସମ୍ବଲପୁର କୋଶଲ ସେନା। ନକଲି ସମ୍ବଲପୁରୀ ଛାପା ଶାଢ଼ୀର ବିରୋଧ କରି ଆଜି (ଶୁକ୍ରବାର) ସମ୍ବଲପୁର କୋଶଲ ସେନା ପକ୍ଷରୁ ଏହି ଅଭିନବ ଉପାୟରେ ଏହା ବିରୋଧ ପ୍ରଦର୍ଶନ କରାଯାଇଛି।
ଏହାବି ପଢନ୍ତୁ :ପୋଖରୀରେ ବୁଡି ଭାଇଭଉଣୀ ମୃତ, ଡ଼ଙ୍କାରୀ ଗାଁରେ ଶୋକର ଛାୟା
ସମ୍ବଲପୁରର ଗୋଲବଜାର ଛକ ଠାରେ ଶୁକ୍ରବାର ସନ୍ଧ୍ୟାରେ ସମ୍ବଲପୁର କୋଶଲ ସେନା ପକ୍ଷରୁ ନକଲି ସମ୍ବଲପୁରୀ ଶାଢ଼ୀ ତିଆରି ବିରୋଧରେ ବିକ୍ଷୋଭ ପ୍ରଦର୍ଶନ କରାଯାଇଛି। ମୁଖ୍ୟତଃ ରାଜସ୍ଥାନ ଓ ପଶ୍ଚିମବଙ୍ଗରୁ ଆସୁଥିବା ନକଲି ସମ୍ବଲପୁରୀ ଡିଜାଇନର ଶାଢ଼ୀ ଯୋଗୁଁ ସମଗ୍ର ପଶ୍ଚିମ ଓଡ଼ିଶାର ହଜାର ହଜାର ସମ୍ବଲପୁରୀ ଶାଢୀ ବୁଣାକାର ଓ ବ୍ୟବସାୟୀ ବହୁତ କ୍ଷତି ସହୁଛନ୍ତି।ଏହା ଦ୍ୱାରା ସମ୍ବଲପୁରୀ କଳା ସଂସ୍କୃତିର ପରିଚୟ ବହନ କରୁଥିବା ସମ୍ବଲପୁରୀ ଶାଢ଼ୀର ବ୍ୟବସାୟ ମଧ୍ୟ ରାଜ୍ୟ ତଥା ଜାତୀୟ ସ୍ତରରେ ପ୍ରଭାବିତ ହେଉଛି । ତେଣୁ ନକଲି ସମ୍ବଲପୁରୀ ଶାଡୀ ଉପରେ ରୋକ ଲଗାଇବାକୁ ରାଜ୍ୟ ସରକାରଙ୍କୁ କୋଶଲ ସେନା ପକ୍ଷରୁ ଦାବି କରାଯାଇଛି।
ସମ୍ବଲପୁରରୁ ବାଦଶାହା ଜୁସ୍ମନ ରଣା,ଇଟିଭି ଭାରତ
