ସମ୍ବଲପୁର: ବର୍ତ୍ତମାନ ରାଜ୍ୟ ସରକାରଙ୍କ ‘5ଟି’ ସଚିବ ରାଜ୍ୟ ସାରା ସରପ୍ରାଇଜ ଭିଜିଟ କରୁଛନ୍ତି । ସାଧାରଣ ଜନତାଙ୍କ ସେବା ଓ ସୁବିଧାର ଉପଲବ୍ଧତାକୁ ପରଖିବା ପାଇଁ ଏସବୁ କରାଯାଉଛି ବୋଲି ଚାରିଆଡେ ଡିଣ୍ଡିମ ପିଟା ଯାଉଛି । ତେବେ ସମ୍ବଲପୁରରେ ଏଭଳି କିଛି ଚିତ୍ର ସାମ୍ନାକୁ ଆସିଛି ଯାହାକୁ ଦେଖିଲେ ଏସବୁ ଲୋକ ଦେଖାଣିଆ ଭଳି ମନେ ହେଉଛି । ଜିଲ୍ଳାପାଳଙ୍କ କାର୍ଯ୍ୟାଳୟର ସୂଚନା ଓ ଲୋକସମ୍ପର୍କ ବିଭାଗରେ ପିଅନ ଭାବେ କାର୍ଯ୍ୟ କରି 2015 ମସିହା ଜୁଲାଇ 31 ତାରିଖରେ ଅବସର ନେଇଥିବା ବିନୋଦ ବିହାରୀ ନାଏକଙ୍କୁ ଏପର୍ଯ୍ୟନ୍ତ ଫାଇନାଲ ପେନସନ ମିଳିନଥିବା ଏହାର ଜ୍ବଳନ୍ତ ଉଦାହରଣ ।
ଦେବଗଡ ଜିଲ୍ଲା ଚନ୍ଦନଖୁଣ୍ଟି ଗାଁର ବିନୋଦ ବିହାରୀ ନାଏକ । 1979 ମସିହାରୁ ପିଅନ ଚାକିରି ଆରମ୍ଭ କରି 31 ଜୁଲାଇ 2015ରେ ଅବସର ନେଇଥିଲେ । ଇତି ମଧ୍ୟରେ ତାଙ୍କୁ ଅବସର ନେବାର 4 ବର୍ଷ ବିତି ଯାଇଥିଲେ ମଧ୍ୟ ଏବେ ବି ସେ ପ୍ରୋଭିଜିନାଲ ପେନସନ ପାଉଛନ୍ତି । ଏପର୍ଯ୍ୟନ୍ତ ତାଙ୍କୁ ଫାଇନାଲ ପେନସନ ମିଳିନାହିଁ । ବୋଝ ଉପରେ ନଳିତା ବିଡା ପରି ସେ ଏବେ ପକ୍ଷାଘାତ ରୋଗରେ ପୀଡିତ । ଏସବୁ ପରେ ବି ସେ ଦେବଗଡ ଜିଲ୍ଲାରୁ ସମ୍ବଲପୁର ଜିଲ୍ଲାପାଳଙ୍କ କାର୍ଯ୍ୟାଳୟ ଆସି ଆସି ନୟାନ୍ତ ହୋଇଗଲେଣି । ହେଲେ ତାଙ୍କର ଫାଇନାଲ ପେନସନ ଟିଏ ହୋଇପାରୁନାହିଁ । ସେପଟେ ତାଙ୍କର କୌଣସି ସନ୍ତାନ ନଥିବାରୁ ପ୍ରୋଭିଜିନାଲ ପେନସନରେ ମିଳୁଥିବା କମ ଟଙ୍କାରେ ଚଳିବା ମୁସକିଲ୍ ହୋଇପଡୁଛି ।