ସମ୍ବଲପୁର: ବନ ବିଭାଗର ଗ୍ରୀନ ମହାନଦୀ ଅଭିଯାନରେ ଲାଗିବ 60 ଲକ୍ଷ ଚାରା। ଚଳିତ ବର୍ଷ ସମ୍ବଲପୁର-ଝାରସୁଗୁଡା-ବରଗଡ 3 ଜିଲ୍ଲାରେ 60 ଲକ୍ଷ ଚାରା ଲଗାଯିବ। ମାଗଣାରେ ଚାରା ଯୋଗାଇବ ସମ୍ବଲପୁର ବନ ବିଭାଗ। ଏନେଇ ଚାରା ବିତରଣ ଆରମ୍ଭ ହୋଇଯାଇଛି।
ସମ୍ବଲପୁର ତଥା ଝାରସୁଗୁଡ଼ାରେ ଅନେକ ଶିଳ୍ପ ଅନୁଷ୍ଠାନ ଗଢି ଉଠିଛି । 2000 ମସିହା ପର ଠାରୁ ଏହି 2 ଜିଲ୍ଲାରେ ବହୁଗୁଡିଏ ଶିଳ୍ପ ଅନୁଷ୍ଠାନ ଆରମ୍ଭ ହୋଇଥିଲା। ଆଉ ଏହି ଶିଳ୍ପାୟନ ନାଁରେ ବହୁ ଜଙ୍ଗଲ ଓ ଗଛ କାଟି ଦିଆଗଲା। ଯାହା ବର୍ତ୍ତମାନ ମଧ୍ୟ ଜାରି ରହିଛି। ଏପରିକି ବର୍ତ୍ତମାନ ମଧ୍ୟ ରାସ୍ତା ପ୍ରଶସ୍ତିକାରଣ ନାଁ ରେ ସମ୍ବଲପୁର- ବରଗଡ ରାସ୍ତା, ସମ୍ବଲପୁର-ଝାରସୁଗୁଡା ରାସ୍ତା, ସମ୍ବଲପୁର-ଦେବଗଡ଼ ରାସ୍ତା ଓ ସମ୍ବଲପୁର-ଅନୁଗୋଳରେ ଲକ୍ଷ ଲକ୍ଷ ଗଛ କାଟି ଦିଆଗଲା। ଆଉ ଏହାର ପ୍ରଭାବ ପରିବେଶ ,ପ୍ରଦୂଷଣ ଓ ବନ୍ୟଜନ୍ତୁଙ୍କ ଉପରେ ଦେଖାଯାଇଥିଲା। ଏଭଳି ପରିସ୍ଥିତିରେ ବର୍ତ୍ତମାନ ସମ୍ବଲପୁର ବନ ବିଭାଗ ମହାନଦୀ କୂଳର ଉଭୟ ପାର୍ଶ୍ଵରେ 2 କିମି ଅଞ୍ଚଳକୁ ବନୀକରଣ କରି ଗ୍ରୀନ ଜୋନ ତିଆରି କରିବାକୁ ଲକ୍ଷ ରଖିଛି।