ରାଉରକେଲା: ସ୍ତ୍ରୀ ସାଜିଲା ସୁପାରି କିଲର । ପୂର୍ବତନ ପ୍ରେମିକ ସହ ମିଶି କଲା ସ୍ବାମୀର ହତ୍ୟା । ଏପରି ଜଘନ୍ୟ ହତ୍ୟାକାଣ୍ଡ ଘଟିଛି ସୁନ୍ଦରଗଡ ଜିଲ୍ଲାର ବଣାଇ ଥାନା ଅନ୍ତର୍ଗତ କେନ୍ଦ୍ରୀକଲା ନିକଟରେ ଥିବା ଏକ ଜଙ୍ଗଲରେ । ଏହି ଘଟଣାରେ ପୋଲିସ ସ୍ତ୍ରୀ, ପୂର୍ବତନ ପ୍ରେମିକଙ୍କ ସମେତ 4 ଜଣଙ୍କୁ ଗିରଫ କରିଥିବା ଜଣାପଡିଛି ।
ସ୍ତ୍ରୀ ଭିଆଇଲା ଜଘନ୍ୟ କାଣ୍ଡ, ପୂର୍ବ ପ୍ରେମିକ ସହ ମିଶି ସ୍ବାମୀକୁ ହତ୍ୟା ଘଟଣାଟି ହୋଇଥିଲା ଏପରି । ପ୍ରଥମେ ପୋଲିସ ଖବର ପାଇ କେନ୍ଦ୍ରୀକଲା ନିକଟରେ ଥିବା ଜଙ୍ଗଲରୁ ଅନିଲ ମୁଣ୍ଡାର ମୃତ ଦେହକୁ ଉଦ୍ଧାର କରିଥିଲା । ପ୍ରାଥମିକ ତଦନ୍ତରୁ ଏହା ଏକ ହତ୍ୟାକାଣ୍ଡ ବୋଲି ଜଣାପଡିଥିଲା । ଅନିଲର ସ୍ତ୍ରୀ ଉପରେ ସନ୍ଦେହ ହେବାରୁ ତାକୁ ପଚରାଉଚରା କରିଥିଲା ପୋଲିସ । ଆଉ ପରେ ମୋବାଇଲ କଲ ଆଧାରରେ ସମସ୍ତ ତଥ୍ୟ ପଦାକୁ ଆସିଥିଲା ।
ଅନିଲର ସ୍ତ୍ରୀ ସୀମା ମୁଣ୍ଡା ଅନିଲର ନିର୍ଯାତନା ସହି ନପାରି ଗୁରୁଣ୍ଡିଆ ଥାନାର ବଡବାଲିଜୋଡି ଗ୍ରାମର ପୂର୍ବତନ ପ୍ରେମିକ ନମଜାନ ବୁଡ ସହ ଆଲୋଚନା କରିଥିଲେ । ସ୍ବାମୀକୁ ରାସ୍ତାରୁ ହଟାଇବାକୁ ଏକ ଯୋଜନା ପ୍ରସ୍ତୁତ କରିଥିଲେ। ପରେ ନମଜାନ ରାଜଗାଙ୍ଗପୁରର ସୁରଜ ନାଏକ ଓ ଗଣେଶ ନାଏକଙ୍କ ସହ ଆଲୋଚନା ପରେ 1 ଲକ୍ଷ ଟଙ୍କାର ଡିଲ ହୋଇଥିଲା । ପ୍ରଥମେ ଖାଇବା ପିଇବା ଲାଗି ତାଙ୍କୁ 4500 ଟଙ୍କା ଦିଆଯାଇଥିଲା ।
ଗତ 18 ତାରିଖ ରାତିରେ ପୂର୍ବ ଯୋଜନା ମୁତାବକ ଅନିଲକୁ ଘରୁ ଡାକି କେନ୍ଦ୍ରୀକଲା ଜଙ୍ଗଲରେ ପହଞ୍ଚି ସାଙ୍ଗ ହୋଇ ସମସ୍ତେ ମଦପାନ କରିଥିଲେ । ଆଉ ପରେ ପୂର୍ବ ଯୋଜନା ଅନୁସାରେ ଅନିଲଙ୍କୁ ପ୍ରଥମେ ମଦ ବୋତଲରେ ଆକ୍ରମଣ ପରେ ଧାରୁଆ ଅସ୍ତ୍ରରେ ବେକ କାଟି ହତ୍ୟା କରି ସେଠାରୁ ଚମ୍ପଟ ମାରିଥିଲେ । ଏହି ଘଟଣାରେ ପୋଲିସ ଅନିଲର ସ୍ତ୍ରୀ ସୀମା ମୁଣ୍ଡା, ପୂର୍ବତନ ପ୍ରେମିକ ନମଜାନ ବୁଡ, ସୁରଜ ନାୟକ, ଗଣେଶ ନାଏକକୁ ଗିରଫ କରି କୋର୍ଟ ଚାଲାଣ କରିଛି ବୋଲି ଏସଡିପିଓ ଅବକାଶ ରାଉତରାୟ ଶୁକ୍ରବାର ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
