ରାଉରକେଲା: ଚଳନ୍ତା ଟ୍ରେନରେ ମହିଳାଙ୍କୁ ଅସଦାଚରଣ । ରାଜ୍ୟରଣୀ ଏକ୍ସପ୍ରେସରେ ଏଭଳି ଅସଦାଚରଣ ହେଇଥିବାର ଅଭିଯୋଗ ଆଣିଲେ ଜଣେ ମହିଳା ଯାତ୍ରୀ । ସୂଚନା ଅନୁସାରେ, ଶୁକ୍ରବାର ଭୁବନେଶ୍ବରରୁ ରାଉରକେଲା ଆସୁଥିବା ରାଜ୍ୟରାଣୀ ଏକ୍ସପ୍ରେସରେ ରାଜଗାଙ୍ଗପୁର ନିକଟରେ ଜେନେରାଲ ବଗିରେ ଢେଙ୍କାନାଳର ଜଣେ ଯୁବକ ରାଉରକେଲା ଆସୁଥିବା ଜଣେ ମହିଳାଙ୍କୁ ଶୋଇଥିବା ବେଳେ ଅସଦାଚରଣ କରିଥିଲେ।
ତେବେ ମହିଳା ଜଣଙ୍କ ନିଦଭାଙ୍ଗି ଯିବା ପରେ ସେ ଚିତ୍କାର କରିବାରୁ ଟ୍ରେନର ଅନ୍ୟଯାତ୍ରୀ ମାନେ ଯୁବକଙ୍କୁ ଧରି ରାଉରକେଲା ଜିଆରପି ପୋଲିସର ହସ୍ତାନ୍ତର କରିଛନ୍ତି । ଅନ୍ୟପଟେ ଯୁବକ ଜଣଙ୍କ ସେଭଳି କିଛି କରିନଥିବାର ସଫେଇ ଦେଇଛନ୍ତି । ଯୁବକଙ୍କ କହିବା ମୁତାବକ, ଜେନେରାଲ ବଗିରେ ମହିଳା ଶୋଇଥିବା ସିଟରେ ସେ ବସିଥିଲେ। ନିଦ ଲାଗିବାରୁ ଅସାବଧାନତା ଯୋଗୁଁ ତାଙ୍କ ହାତ ମହିଳାଙ୍କ ଗୋଡ଼ରେ ବାଜିଥିଲା ଯାହାକୁ ନେଇ ମହିଳା ଜଣଙ୍କ ଭୁଲ ଭାବିଥିଲେ । ତେବେ ରାଉରକେଲା ଜିଆରପି ପୋଲିସ ମହିଳାଙ୍କ ଅଭିଯୋଗ ମୁତାବକ ଯୁବକଙ୍କୁ ଗିରଫ କରିଛି ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
