ପୁରୀ: ଆଗାମୀ ଜୁଲାଇ 4 ତାରିଖରେ ବିଶ୍ବପ୍ରସିଦ୍ଧ ରଥଯାତ୍ରା । ଏଥିପାଇଁ ଚଳଚଞ୍ଚଳ ହେବାରେ ଲାଗିଲାଣି ଶୀକ୍ଷେତ୍ରଧାମ ପୁରୀ । ଚଳିତ ବର୍ଷ ରଥଯାତ୍ରାକୁ କିଭଳି ଭାବେ ଶାନ୍ତିଶୃଙ୍ଖଳାର ସହ ସମାପନ କରାଯିବ ସେନେଇ ଆଜି (ଗୁରୁବାର) ପ୍ରଶାସନ ପକ୍ଷରୁ ପୁରୀ ବଡ଼ଦାଣ୍ଡ ସ୍ଥିତ ନିଳାଦ୍ରୀ ଭକ୍ତ ନିବାସରେ ତୃତୀୟ ସମନ୍ବୟ ବୈଠକ ଅନୁଷ୍ଠିତ ହୋଇଯାଇଛି ।
ଭିଡିଓ ସୌଜନ୍ୟ: ସମ୍ବାଦଦାତା, ପୁରୀ
ଆଇନ ମନ୍ତ୍ରୀ ପ୍ରତାପ ଜେନାଙ୍କ ଅଧ୍ୟକ୍ଷତାରେ ଏହି ବୈଠକ ପୁରୀରେ ଅନୁଷ୍ଠିତ ହୋଇଯାଇଛି । ଏହି ବୈଠକରେ କେନ୍ଦ୍ରାଞ୍ଚଳ ଆର ଡିସି, ନଗର ଉନ୍ନୟନ ବିଭାଗ ମନ୍ତ୍ରୀ, ପନୀୟଜଳ ଓ ପଞ୍ଚୟାତରାଜ ମନ୍ତ୍ରୀ, ବିଦ୍ୟୁତ ବିଭାଗ ମନ୍ତ୍ରୀ ଯୋଗ ଦେଇଥିଲେ । ତାଙ୍କଛଡା ପୁରୀ ଜିଲ୍ଲାପାଳ, ଏସପି, ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ସମେତ ଶ୍ରୀମନ୍ଦିରର ବରିଷ୍ଠ ସେବାୟତ ଉପସ୍ଥିତ ଥିଲେ ।
ଆଜିର ଏହି ବୈଠକରେ ମୁଖ୍ୟତଃ ରଥଯାତ୍ରାକୁ ନେଇ 16ଟି ପ୍ରସଙ୍ଗ ଉପରେ ଆଲୋଚନା ହୋଇଥିଲା । ରଥଯାତ୍ରାକୁ ଶୃଙ୍ଖଳିତ କରିବା, ରଥ ନିର୍ମାଣ, ରଥକାଠ ଯୋଗାଣ, ସ୍ବାସ୍ଥ୍ୟ ସେବା, ଜଳ ଯୋଗାଣ, ବିଦ୍ୟୁତ, ପରିମଳ, ପରିବହନ, ସୁରକ୍ଷା ବ୍ୟବସ୍ଥା ଆଦି ବିଷୟ ଉପରେ ଆଲୋଚନା ହୋଇଯାଇଛି ।
ରଥଯାତ୍ରାକୁ ଦୃଷ୍ଟିରେ ରଖି 200 ବସ, 192 ଟି ଅଧିକ ସ୍ବତନ୍ତ୍ର ଟ୍ରେନ ଚଳାଯିବ । ସେହିପରି 17 ଟି ସ୍ଥାନରେ ପାର୍କିଂ ନେଇ ବ୍ୟବସ୍ଥା ରହିବ । ବିଦ୍ୟୁତ, ପନୀୟଜଳ ଯୋଗାଣ ସମ୍ବନ୍ଧିତ ସମସ୍ୟା ଆସନ୍ତା ଜୁନ 25 ତାରିଖ ସୁଧା ସାରିବାକୁ ନିଷ୍ପତ୍ତି ହୋଇଛି । ପୁରୀ-ଭୁବନେଶ୍ବର ଜାତୀୟ ରାଜପଥ ମରାମତି ଜୁନ ମାସ ସୁଧା ଶେଷ ହେବ । ସେହିପରି ବଡ଼ ଦାଣ୍ଡରେ ଟ୍ରାଫିକ ବ୍ୟବସ୍ଥା ସୁଗମ ନେଇ ବ୍ୟବସ୍ଥା ହେବ । ଚଳିତ ମାସ ଶେଷ ସପ୍ତାହରେ ମୁଖ୍ୟମନ୍ତ୍ରୀ ଶେଷ ସମନ୍ବୟ ବୈଠକରେ ଯୋଗ ଦେବେ ।
ତେବେ ଅନେକ କାର୍ଯ୍ୟ କରିବାରେ ପୁରୀ ପୌର ପାଳିକା, ସ୍ବସ୍ଥ୍ୟ ବିଭାଗ , ଜାତୀୟ ରାଜପଥ ବିଭାଗ ବିଳମ୍ବ କରିବାକୁ ନେଇ ସଭାରେ ଉଦବେଗ ପ୍ରକାଶ ପାଇଥିଲା । ସଭାରେ ବରିଷ୍ଠ ସେବାୟତ, ବୁଦ୍ଧିଜୀବୀ, ସାମ୍ବାଦିକମାନେ ମଧ୍ୟ ଯୋଗ ଦେଇଥିଲେ । ତେବେ ସବୁ ସମସ୍ୟା ଆସନ୍ତା 25 ତାରିଖ ସୁଧା ସାରିବାକୁ ନିଷ୍ପତ୍ତି ହୋଇଛି ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
