Pakhala Divas: ବାଲୁକା କଳାରେ ବିଶ୍ବ ପଖାଳ ଦିବସର ଶୁଭେଚ୍ଛା

ଆଜି ବିଶ୍ବ ପଖାଳ ଦିବସ । ବାଲୁକା ଚିତ୍ରକଳା ମାଧ୍ୟମରେ ପଖାଳ ଦିବସର ଶୁଭେଚ୍ଛା ଦେଲେ ବାଲୁକାଶିଳ୍ପୀ ସୁଦର୍ଶନ ପଟ୍ଟନାୟକ । ଅଧିକ ପଢନ୍ତୁ

ପୁରୀ: ପଖାଳ, ପ୍ରତିଟି ଓଡିଆର ପ୍ରିୟ ଖାଦ୍ୟ । ପ୍ରତ୍ୟେକ ଓଡିଆ ଘରେ ରହିଛି ପଖାଳ କଂସାର ସ୍ବତନ୍ତ୍ର ସ୍ଥାନ । ଖରାଦିନ ଆସିଲେ ଚାଳ ଘରଠୁ ଆରମ୍ଭ କରି ଚକାଚକ୍ ପ୍ରାସାଦ ଯାଏଁ ସବୁଠି ଖୋଜାପଡେ ପଖାଳ କଂସା । ଓଡିଆ ଜାତିର ଅନନ୍ୟ ବିଶେଷତ୍ବ ବହନ କରୁଥିବା ପଖାଳର ପ୍ରଚାର ପ୍ରସାର ପାଇଁ ମାର୍ଚ୍ଚ ୨୦ ତାରିଖରେ ଓଡିଆମାନେ ପାଳନ କରିଆସୁଛନ୍ତି ପଖାଳ ଦିବସ । ଆଜି ଏହି ବିଶ୍ଵ ପଖାଳ ଦିବସ ଅବସରରେ ପ୍ରତ୍ୟେକ ଓଡ଼ିଆଙ୍କୁ ବାଲୁକା ଚିତ୍ରକଳା ମାଧ୍ୟମରେ ଶୁଭେଚ୍ଛା ଜଣାଇଛନ୍ତି ବାଲୁକା ଚିତ୍ରଶିଳ୍ପୀ ସୁଦର୍ଶନ ପଟ୍ଟନାୟକ ।

ଏହି ଅନ୍ତର୍ଜାତୀୟ ବାଲୁକା ଶିଳ୍ପୀ ପୁରୀ ନୀଳାଦ୍ରୀ ବେଳାଭୂମିରେ ପଖାଳ ଦିବସ ଅବସରରେ ଏକ ଆକର୍ଷଣୀୟ ବାଲୁକା ଚିତ୍ରକଳା ତିଆରି କରିଛନ୍ତି । ବାଲିରେ ସେ ପଖାଳ, ବଡିଚୁରା, ମାଛ ଭଜା ଓ ବିଭିନ୍ନ ପ୍ରକାର ପାରମ୍ପରିକ ଓଡିଆ ବ୍ୟଞ୍ଜନର ଅବିକଳ ପ୍ରତିକୃତି ଗଢିଛନ୍ତି । ଯାହାକି ଖୁବ୍ ଆକର୍ଷଣୀୟ ଦେଖାଯାଉଛି ।

କେବଳ ଓଡିଆ ନୁହେଁ, କୋଟି ଓଡିଆଙ୍କ ଆରାଧ୍ୟ ପ୍ରଭୁ ଜଗନ୍ନାଥଙ୍କର ମଧ୍ୟ ପଖାଳ ସହିତ ରହିଛି ଅଭିନ୍ନ ସମ୍ପର୍କ । ପରମ୍ପରା ଅନୁଯାୟୀ, ଶ୍ରୀମନ୍ଦିରରେ ପ୍ରତିଦିନ ମହାପ୍ରଭୁଙ୍କୁ ଦହି ପଖାଳ ଲାଗି କରାଯାଏ । ଏଣୁ ପଖାଳ ଓଡିଆମାନଙ୍କର ଅତି ପ୍ରିୟ ଓ ପ୍ରମୁଖ ଖାଦ୍ୟ ଭାବେ ଗ୍ରହଣ କରାଯାଇଛି । ପଖାଳ ଭୋଜନର ଏକ ସ୍ୱତନ୍ତ୍ରତା ରହିଛି । ଏଣୁ ପଖାଳ ଭୋଜନକୁ ମନେ ରଖିବା ପାଇଁ ମାର୍ଚ୍ଚ ୨୦ ତାରିଖକୁ ବିଶ୍ୱ ପଖାଳ ଦିବସ ଭାବେ ପାଳନ କରାଯାଇଥାଏ । ବିଶେଷ କରି ଓଡିଶାର ଖାଦ୍ୟ ପଖାଳର ପ୍ରଚାର ପ୍ରସାର କରିବା ଏହି ଦିବସ ପାଳନର ମୁଖ୍ୟ ଉଦ୍ଦେଶ୍ୟ ରହିଛି।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ