ଅକ୍କି@53, ବାଲୁକାକଳା ମାଧ୍ୟମରେ ଶୁଭେଚ୍ଛା ଜଣାଇଲେ ସୁଦର୍ଶନ

ଅଭିନେତା ଅକ୍ଷୟ କୁମାର 53 ବର୍ଷରେ ଆଜି ପଦାର୍ପଣ କରିଥିବା ବେଳେ ତାଙ୍କୁ ଜନ୍ମ ଦିନର ଶୁଭେଚ୍ଛା ବିଭିନ୍ନ ମହଲରୁ ଦିଆଯାଉଛି । ଏହି ପରିପ୍ରେକ୍ଷୀରେ ପୁରୀରେ ବାଲୁକାକଳା ମାଧ୍ୟମରେ ତାଙ୍କୁ ମଧ୍ୟ 53 ତମ ଜନ୍ମ ଦିନର ଶୁଭେଚ୍ଛା ଜଣାଇଛନ୍ତି ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ।

ପୁରୀ: ଆଜି ହେଉଛି ବଲିଉଡର ସୁପରଷ୍ଟାର ଅକ୍ଷୟ କୁମାରଙ୍କ ଜନ୍ମଦିନ । 53 ବର୍ଷରେ ପଦାର୍ପଣ କରିଛନ୍ତି ଲୋକପ୍ରିୟ କଳାକାର ଖିଲାଡି କୁମାର । ଆଜିର ଏହି ଦିନରେ ଖିଲାଡି କୁମାରଙ୍କୁ ଚାରିଆଡୁ ଶୁଭେଚ୍ଛାର ସୁଅ ଛୁଟୁଥିବା ବେଳେ ବାଲୁକା କଳା ମାଧ୍ୟମରେ ନିଆରା ଶୁଭେଚ୍ଛା ଜଣାଇଛନ୍ତି ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ।

ପୁରୀ ବେଳାଭୂମିରେ ଅକ୍ଷୟ କୁମାରଙ୍କ ପାଇଁ ବାଲୁକାକଳା ପ୍ରସ୍ତୁତ କରିଛନ୍ତି ସୁଦର୍ଶନ । ଏହି ବାଲୁକାକଳାରେ ଅକ୍ଷୟ କୁମାରଙ୍କ ପ୍ରତିକୃତିକୁ ସ୍ଥାନ ଦେଇଥିବା ବେଳେ ‘ଏ ରୋଲ ମଡେଲ ହିରୋ’ ବାର୍ତ୍ତା ରହିଛି । ଅକ୍ଷୟ କୁମାର ସବୁବେଳେ ନିଜ ଅଭିନୟ ଓ କଳା ମାଧ୍ୟମରେ ସମାଜକୁ ବିଭିନ୍ନ ସଚେତନତା ବାର୍ତ୍ତା ଦେଇଥାନ୍ତି ।

ଖାସ ସେଥିପାଇଁ ବଲିଉଡରେ ଖିଲାଡି କୁମାରଙ୍କ ସ୍ଥାନ ସ୍ବତନ୍ତ୍ର । ହୃଦୟରେ ରାଜ୍‌ କରୁଥିବା ଏହି ଅଭିନେତାଙ୍କ ଆଗାମୀ ଦିନରେ ଆହୁରି ସଫଳ ଓ ଦୀର୍ଘଜୀବୀ ହୁଅନ୍ତୁ ବୋଲି ବାଲୁକାକଳା ମାଧ୍ୟମରେ ବାର୍ତ୍ତା ଦେଇଛନ୍ତି ସୁଦର୍ଶନ।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ