ପୁରୀ: କୋଭିଡ କଟକଣା ଯୋଗୁ ଶ୍ରୀମନ୍ଦିରକୁ ଭକ୍ତଙ୍କ ପ୍ରବେଶ ବନ୍ଦ ରହିଛି। ଅରୁଣ ସ୍ତମ୍ଭ ନିକଟକୁ ମଧ୍ୟ ଭକ୍ତଙ୍କୁ ଯିବା ପାଇଁ କଟକଣା ଜାରି କରାଯାଇଛି। ତେବେ ଏହି ନିୟମକୁ କୋହଳ କରି ଅରୁଣ ସ୍ତମ୍ଭ ନିକଟକୁ ଭକ୍ତଙ୍କୁ ଯିବାକୁ ଅନୁମତି ଦେବାକୁ ପୁରୀ ଜିଲ୍ଲା ପ୍ରଶାସନ ପାଖରେ ଦାବି ରଖିଛି ପୁରୀ ଜିଲା ଯୁବ ଅଧିବକ୍ତା ସଙ୍ଘ।
ପୁରୀ ଜିଲା ଯୁବ ଅଧିବକ୍ତା ସଙ୍ଘ ପକ୍ଷରୁ ଅରୁଣ ସ୍ତମ୍ଭରେ କଟକଣା କୋହଳ କରି ଭକ୍ତଙ୍କୁ ପ୍ରବେଶ ପାଇଁ ଅନୁମତି ନେଇ ଜିଲ୍ଲାପାଳଙ୍କ ଉଦେଶ୍ୟରେ ଦାବି ପ୍ରଦାନ କରାଯାଇଛି । ସଂଗଠନ କହିଛି ମନ୍ତ୍ରୀ, ବିଧାୟକ ଓ ନେତାଙ୍କୁ ଅରୁଣ ସ୍ତମ୍ଭ ନିକଟକୁ ଛଡା ଯାଉଛି । ହେଲେ ଦୁଃଖର ବିଷୟ ମହାପ୍ରଭୁଙ୍କ ପ୍ରିୟ ଭକ୍ତମାନଙ୍କୁ ଅରୁଣ ସ୍ତମ୍ଭ ନିକଟକୁ ଯିବା ପାଇଁ କଟକଣା କରାଯାଇଛି। ବଡ଼ ବଡ଼ିଆ ଲୋକଙ୍କ ପାଇଁ ଗୋଟେ ଆଇନ ଓ ସାଧାରଣ ଭକ୍ତ ପାଇଁ ଅଲଗା ଆଇନ ଠିକ ନୁହେଁ ବୋଲି ପୁରୀ ଜିଲ୍ଲା ଯୁବ ଅଧିବକ୍ତା ସଙ୍ଘ କହିଛି । ମହାପ୍ରଭୁଙ୍କ ନିକଟରେ ଯେଭଳି ପୁରୀ ଜିଲ୍ଲା ପ୍ରଶାସନ ଉଚ୍ଚ ନୀଚର ଭେଦ ଭାବ ସୃଷ୍ଟି କରୁଛି, ତାହା ଅତ୍ୟନ୍ତ ନିନ୍ଦନୀୟ ବୋଲି ସଂଘ କହିଛି ।