ପଣା ସଂକ୍ରାନ୍ତିରେ କମ୍ପୁଛି ପୁରୀ

ଘଣ୍ଟ ଘଣ୍ଟା ଓ ଧୂପ ଦୀପ ନୈବେଦ୍ୟ ସହ ପାଳନ ହେଉଛି ପଣା ସଂକ୍ରାନ୍ତି ତଥା ଓଡିଆ ନବବର୍ଷ । ପ୍ରକମ୍ପତି ମଠ ଠୁ ମନ୍ଦିର, ଗାଁଠୁ ସହର। ଆନନ୍ଦ, ଉଲ୍ଲାସ, ଉତ୍କଣ୍ଠାରେ ପ୍ରତିଟି ମନ ଭକ୍ତିର ଭାବସାଗରରେ ଆନ୍ଦୋଳିତ । ପିଠା ପଣାରେ ମହକି ଉଠୁଛି ଘର ଦ୍ବାର । କାରଣ ଆଜି ହେଉଛି ମହାବିଷୁବ ସଂକ୍ରାନ୍ତି ଓ ହନୁମାନ ଜୟନ୍ତୀ ।

ପୁରୀ: ଆଜି ମହାବିଷୁବ ସଂକ୍ରାନ୍ତି ଅବସରରେ ଶ୍ରୀକ୍ଷେତ୍ର ପୁରୀ ଚଳଚଞ୍ଚଳ ଓ ଉତ୍ସବ ମୁଖର । ଏହି ପବିତ୍ର ଦିନରେ ଶ୍ରୀମନ୍ଦିରରେ ବିଶେଷ ନୀତି ଅନୁଷ୍ଠିତ ହୋଇଥାଏ | ମଧ୍ୟାହ୍ନ ଧୂପ ପରେ ଶ୍ରୀଜଗନ୍ନାଥଙ୍କ ବାଡରୁ ଆଜ୍ଞାମାଳ ବିଭିନ୍ନ ମହାବୀରଙ୍କ ମନ୍ଦିରକୁ ବିଜେ କରାଯାଇଥାଏ | ଶ୍ରୀମନ୍ଦିର ପରମ୍ପରା ଅନୁସାରେ ଚାରିଦ୍ବାରରେ ମହାବୀରଙ୍କ ବ୍ୟତୀତ ଜଗନ୍ନାଥ ବଲ୍ଲଭ ଓ ଦରିଆ ମହାବୀରଙ୍କ ନିକଟକୁ ମଧ୍ୟ ଆଜ୍ଞାମାଳ ବିଜେ ହୋଇଥାଏ |

ବିଶ୍ବାସ ରହିଛି ଆଜି ପ୍ରଭୁ ହନୁମାନଙ୍କୁ ପୂଜାର୍ଚ୍ଚନା କଲେ ସମସ୍ତ ଦୁଖକଷ୍ଟ ଦୂର ହୁଏ । ଏଥିପାଇଁ ସକାଳୁ ଶ୍ରୀମନ୍ଦିର ଦକ୍ଷିଣ ଦ୍ବାରରେ ଥିବା ପ୍ରଭୁ ହନୁମାନ ଦର୍ଶନ ପାଇଁ ଭକ୍ତଙ୍କ ଭିଡ଼ ଜମିଥିଲା । ଏହାଛଡା ଆଜିର ଦିନକୁ ଓଡ଼ିଆ ନବବର୍ଷ ଭାବେ ମଧ୍ୟ ପାଳନର ପରମ୍ପରା ରହିଛି । ଏଣୁ ଶ୍ରୀକ୍ଷେତ୍ର ପୁରୀ ଉତ୍ସବ ମୁଖର ।

ଉତ୍କଳୀୟ ପରମ୍ପରା ତଥା ଶ୍ରୀଜଗନ୍ନାଥ ସଂସ୍କୃତି ସହିତ ଜଡିତ ଥିବା ଜାଗା, ଆଖଡ଼ା ମାନଙ୍କରେ ଆଜିର ଦିନରେ କୁସ୍ତି କସରତ ସହିତ ରଣକୌଶଳ ଶିକ୍ଷାର ଶୁଭାରମ୍ଭ କରାଯାଇଥାଏ | ସକାଳୁ ସକାଳୁ ମହାବୀରଙ୍କ ନିକଟରେ ପୂଜାର୍ଚ୍ଚନା କରି ସାହିର ଯୁବକମାନେ ନୂଆ କୌପୁନି ପରିଧାନ କରି ମାଟି କୁସ୍ତି ବିଦ୍ୟା ଶିଖିଥାନ୍ତି |

ଏହାଛଡା ବିଭିନ୍ନ ଜାଗା ଆଖଡ଼ା ପକ୍ଷରୁ ନିଝାମ, ବାଡ଼ିଖେଳ, ନାଗାନୃତ୍ୟ ଆଦି ହନୁମାନ ପଟୁଆରା ବାହାରି ସାହି ପରିକ୍ରମା କରିଥାନ୍ତି | ଏହିଦିନ ପୁରୀରେ ନିଆରା ଭାଙ୍ଗ ପଣାର ଝଲକ ଦେଖିବାକୁ ମିଳିଥାଏ | ସାହି ବସ୍ତିମାନଙ୍କରେ କ୍ଷୀର, ସର, ରାବିଡି, ଛେନା, ନଡିଆ, ଫଳ ଆଦି ଦ୍ରବ୍ୟ ପଡି ସୁସ୍ବାଦୁ ପଣା ପ୍ରସ୍ତୁତ କରାଯାଇ ବଣ୍ଟନ କରାଯାଏ |

ଆଜିର ଦିନରେ ବିଶେଷତଃ ଜାଗା ଆଖଡ଼ା ମାନଙ୍କରେ ଅତ୍ୟନ୍ତ ଉତ୍ସାହ ଓ ଧୂମଧାମରେ ପାଳନ କରାଯାଉଥିବା ବେଳେ ଛତୁଆ ଓ ପଣାଭୋଗ କରାଯାଇଥାଏ । ଏହାସହ ଆଗାମୀ ମାସେ ପର୍ଯ୍ୟନ୍ତ ତୁଳସୀ ଚଉରାରେ ଘଡି ଶିକା ସାହାଯ୍ୟରେ ଶୀତଳ ଜଳ ସୂର୍ଯ୍ୟଦେବଙ୍କୁ ଦେବାର ପରମ୍ପରା ରହିଛି |

ପୁରୀରୁ ଶକ୍ତି ପ୍ରସାଦ ମିଶ୍ର,ଇଟିଭି ଭାରତ