ଶ୍ରୀମନ୍ଦିରରେ କାର୍ତ୍ତିକ ମାସ ଆରମ୍ଭ, ରାଧା ଦାମୋଦର ବେଶରେ ଦର୍ଶନ ଦେବେ ତିନି ଠାକୁର

ଶ୍ରୀମନ୍ଦିରରେ ଆଜି ଠୁ ଆରମ୍ଭ ହେଲା କାର୍ତ୍ତିକ ମାସ । ଶ୍ରୀମନ୍ଦିରରେ ଅନୁଷ୍ଠିତ ହେବ ସ୍ବତନ୍ତ୍ର ନୀତିକାନ୍ତି । ରାଧା ଦାମୋଦର ବେଶରେ ଦର୍ଶନ ଦେବେ ତିନି ଠାକୁର ।

ପୁରୀ: ଆଜି ହେଉଛି ଆଶ୍ବିନ ମାସ ଶୁକ୍ଲ ପକ୍ଷ ଏକାଦଶୀ ତିଥି । ଆରମ୍ଭ ହୋଇଛି କାର୍ତ୍ତିକ ମାସ । ମାସେ ଧରି ହବିଷ୍ୟାଳିମାନେ କାର୍ତ୍ତିକ ବ୍ରତ ପାଳନ କରିବେ । ଏନେଇ ଶ୍ରୀମନ୍ଦିରରେ ଆରମ୍ଭ ହୋଇଯାଇଛି କାର୍ତ୍ତିକ ନୀତିକାନ୍ତି । ଆଜି ଠାରୁ ରାଧା ଦାମୋଦର ବେଶରେ ଦର୍ଶନ ଦେବେ ତିନି ଠାକୁର ।

କାର୍ତ୍ତିକ ଶୁକ୍ଳ ପକ୍ଷ ଦଶମୀ ପର୍ଯ୍ୟନ୍ତ ମହାପ୍ରଭୁଙ୍କର ଏହି ବେଶ ଅନୁଷ୍ଠିତ ହେବା ସହିତ କାର୍ତ୍ତିକ ପୂର୍ଣ୍ଣିମା ଯାଏଁ ବାଳ ଧୂପ ଦିଆଯିବ । ଭକ୍ତ ଓ ଶ୍ରଦ୍ଧାଳୁଗଣ ରାଧା ଦାମୋଦରଙ୍କ ବେଶ ଦର୍ଶନ କରି କୃତାର୍ଥ ଲାଭ କରିବେ । ତେବେ ଆସନ୍ତା 14ରୁ କାର୍ତ୍ତିକ ବ୍ରତ ଆରମ୍ଭ ହେବାକୁ ଥିବାବେଳେ ପ୍ରଶାସନ ପକ୍ଷରୁ 3ଟି ସ୍ଥାନର ବ୍ୟବସ୍ଥା କରାଯାଇଛି ।

ଯେଉଁଠି 25 ଶହ ହବିଷ୍ୟାଳିମାନେ ଏହି ଶିବିରରେ ରହିବେ । ମାଗଣା ରହିବା, ମହାପ୍ରସାଦ ସେବନ, ଜଗନ୍ନାଥ ଦର୍ଶନ ନିମନ୍ତେ ପ୍ରଶାସନ ବିଭିନ୍ନ ବ୍ୟବସ୍ଥା ଗ୍ରହଣ କରିଛି ।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ