ପୁରୀ: ବଡ ଠାକୁରଙ୍କ ବ୍ୟଙ୍ଗ ଫଟୋକୁ ନେଇ ବିବାଦ । ଭାଇରାଲ ଫଟୋ ମହାପ୍ରଭୁଙ୍କ ନିମନ୍ତେ ଉପହାସଜନକ ବୋଲି ପ୍ରଶ୍ନ ଉଠାଇଛନ୍ତି ସେବାୟତ । ଜଗନ୍ନାଥଙ୍କ ଏଭଳି ବ୍ୟଙ୍ଗାତ୍ମକ କାର୍ଟୁନକୁ ନେଇ ଚେତାବନୀ ଦେଲେ ବରିଷ୍ଠ ସେବାୟତ । ଏଭଳି ଦୁଃସାହସରରୁ ନିବୃତ୍ତ ପାଇଁ ସତର୍କ କରାଇଲେ । ମହାପ୍ରଭୁଙ୍କ ବ୍ୟଙ୍ଗ କରିବା ଧୃଷ୍ଟତା ମହାପାପ ବୋଲି କହିଛନ୍ତି ସେବାୟତ । ସୂଚନା ଯେ, ସୋସିଆଲ ମିଡିଆରେ ମହାପ୍ରଭୁ ଜଗନ୍ନାଥ, ବଡ ଠାକୁର ବଳଭଦ୍ର ଓ ଶକ୍ତିରୂପିଣୀ ସୁଭଦ୍ରାଙ୍କ ଜ୍ବର ଓ ଜ୍ବରମାପକ ଥର୍ମୋମିଟର ପାଟିରେ ରଖି ଖଟରେ ଶୟନ କରିଥିବା ଫଟୋକୁ ନେଇ ମୁଣ୍ଡଟେକିଛି ବିବାଦ ଓ ପ୍ରତିବାଦ ।
ସ୍ନାନପୂର୍ଣ୍ଣିମାରେ ମହାପ୍ରଭୁ 108 ଗରା ସୁବାସିତ ଜଳରେ ସ୍ନାନ ପରେ ଏବେ ଜ୍ବରରେ ଆକ୍ରାନ୍ତ ହୋଇ ଅଣସର ପିଣ୍ଡିରେ ଅଛନ୍ତି । ମହାପ୍ରଭୁ ଶ୍ରୀଅଙ୍ଗ ସୁସ୍ଥ ପାଇଁ ଦଇତାପତି ସେବକମାନେ ଗୁପ୍ତ ନୀତିରେ ଉପଚାର ବିଧି କରୁଛନ୍ତି । ଇତି ମଧ୍ୟରେ ମହାପ୍ରଭୁଙ୍କ ଅଣସରକୁ ନେଇ ବ୍ୟଙ୍ଗାତ୍ମକ କାର୍ଟୁନ ସୋସିଆଲ ମିଡିଆ ଭାଇରାଲ ହେବାରେ ଲାଗିଛି। ଯେଉଁ କାର୍ଟୁନରେ ମହାପ୍ରଭୁ ଏକ ଖଟରେ ଘୋଡେଇ ହୋଇ ଶୋଇ ଥିବାବେଳେ ଏକ ଥର୍ମୋମିଟର ପାଟିରେ ରହିଛି। ଏଭଳି ବ୍ୟଙ୍ଗାତ୍ମକ କାର୍ଟୁନକୁ ନେଇ ସେବାୟତ ମହଲରେ ଅସନ୍ତୋଷ ସୃଷ୍ଟି ହୋଇଛି ।