ପୁରୀ: ସଞ୍ଜୟ ଦାସ ବର୍ମାଙ୍କ ବ୍ୟକ୍ତିଗତ ସହାୟକ ଚିତ୍ତରଞ୍ଜନ ପଲେଇ ହତ୍ୟା ମାମଲାର (ChittaRanjan Murder Case) ପର୍ଦ୍ଦାଫାସ ପାଇଁ ତନାଘନା ଚଳାଇଛି କ୍ରାଇମବ୍ରାଞ୍ଚ । ବୁଧବାର ରାତିରେ କ୍ରାଇମବ୍ରାଞ୍ଚ ଟିମ୍ ପୁରୀରେ ପହଞ୍ଚିଥିଲା । ଗୁରୁବାର ମୃତଦେହ ମିଳିଥିବା ସ୍ଥାନକୁ ଯାଇ ଅନୁଧ୍ୟାନ କରିଥିଲା ଟିମ୍ । ଏଥିସହ ଘଟଣା ଦିନ ଚିତ୍ତରଞ୍ଜନଙ୍କ ସହ ଭୋଜିରେ ଥିବା ସମସ୍ତ ବ୍ୟକ୍ତିଙ୍କୁ କ୍ରାଇମବ୍ରାଞ୍ଚ ଟିମ୍ ଜେରା ଆରମ୍ଭ କରିଛି । ଆଜି ଅଭିଯୁକ୍ତ ଜଗାର ମାଟିଆପଡା ସହିତ ଭଡାଘର ତଲାସୀ କରିଛି କ୍ରାଇମବ୍ରାଞ୍ଚ ।
ଗତକାଲି (ଗୁରୁବାର) ଚିତ୍ତର ପରିବାର ଲୋକଙ୍କ ବୟାନ ରେକର୍ଡ ସହ ଅଟକ ଥିବା ଜଗା, ସଞ୍ଜୟ ଦାସବର୍ମାଙ୍କ ପିଏସଓ ସର୍ବେଶ୍ବର ଜେନା ଓ ଅନ୍ୟ ସହଯୋଗୀ ମାନଙ୍କୁ ପୁରୀ ବାସେଳୀସାହି ଥାନାରେ ପଚରାଉଚରା କରାଯାଇଥିଲା । ଆଜି ଜଗାର ମାଟିଆପଡା ସ୍ଥିତ ଭଡାଘରେ କ୍ରାଇମବ୍ରାଞ୍ଚ ତନାଘନା ତଦନ୍ତ ଆରମ୍ଭ କରିଛି। ଭୋଜି ଦିନ କେଉଁ ମାନେ ଥିଲେ , କଣ ଘଟଣା ସବୁ ଘଟିଥିଲା , ଘଟଣା ସ୍ଥଳରେ କିଛି ପ୍ରମାଣ ଅଛି କି ସେ ନେଇ କ୍ରାଇମବ୍ରାଞ୍ଚ ଟିମ ତଦନ୍ତ ଆରମ୍ଭ କରିଛି । ମୁଖ୍ୟ ଅଭିଯୁକ୍ତ କୁହା ଯାଉଥିବା ଜଗନ୍ନାଥ ଷଡ଼ଙ୍ଗୀ ଓରଫ ଜଗାକୁ ଘଟଣା ସ୍ଥଳକୁ ନେଇ ପଚରାଉଚରା କରିସାରିଛି କ୍ରାଇମବ୍ରାଞ୍ଚ।