କଟକ: ନିର୍ବାଚନକୁ ନେଇ ବେଶ ସରଗରମ ହୋଇ ଉଠିଛି ରାଜ୍ୟ ରାଜନୀତି । ଓଡିଶାରୁ ଅଧିକ ଲୋକସଭା ଆସନ ଜିତିବା ଓ ରାଜ୍ୟରେ ସରକାର ଗଢିବା ଲକ୍ଷ୍ୟ ନେଇ ମାରାଥନ ପ୍ରଚାରରେ ଲାଗିଛନ୍ତି ବିଜେପିର ରାଷ୍ଟ୍ରୀୟ ନେତାଗଣ । ଗତକାଲି ସିଲଭରସିଟିରେ ରୋଡ ଶୋ କରିଥିଲେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା । ଏହାପରେ ଆଜି(ଗୁରୁବାର) ଦଳ ପାଇଁ ଭୋଟ ମାଗିବା ପାଇଁ କଟକ ଚୌଦ୍ୱାର ନିର୍ବାଚନ ମଣ୍ଡଳୀରେ ପହଞ୍ଚିଛନ୍ତି କେନ୍ଦ୍ରମନ୍ତ୍ରୀ ଉମା ଭାରତୀ । ସେଠାରେ ସେ ଏକ ନିର୍ବାଚନ ସଭାକୁ ସମ୍ବୋଧିତ କରି ରାଜ୍ୟ ସରକାର ଉପରେ ଜୋରଦାର ବର୍ଷିଛନ୍ତି ।
ରାଜ୍ୟରେ ଦୀର୍ଘ ଦିନ ଧରି ବିଜେଡି ଶାସନ କରିବା ଫଳରେ ରାଜ୍ୟ ରୁଗୁଣ ହୋଇପଡିଛି । ଆଉ ବିଜେପି ହିଁ ଏହି ରୋଗକୁ ନିରାକରଣ କରି ପାରିବ ବୋଲି କହିଛନ୍ତି ଉମା ଭାରତୀ । ଏହା ସହ ରାଜ୍ୟରେ ଥିବା ଆଇଏଏସଙ୍କ ବିନା ନବୀନ ବାବୁ ଅଧୁରା ବୋଲି କହିଥିଲେ ସେ । କାରଣ ଯେତେବେଳେ ମହାନଦୀ ଜଳ ବିବାଦ ଉପୁଜିଥିଲା ସେତେବେଳେ ଦିଲୀରେ ଏକ ବୈଠକ ଡାକିଥିଲେ ବିଭାଗୀୟ ମନ୍ତ୍ରୀ ଉମା ଭାରତୀ । କିନ୍ତୁ ବୈଠକ ସମୟରେ ଏକ ଆଇଏଏସ ଅଫିସର ନବୀନ ବାବୁଙ୍କ କାନରେ କିଛି କହୁଥିବାର ନଜର ଆସିଥିଲେ । ଯାହାକୁ ମୁଁ ବାରଣ କରିବା ସହ ବୈଠକକୁ କିଛି ସମୟ ପାଇଁ ସ୍ଥଗିତ ରଖିଥିଲି । ଏହି ଦୃଶ୍ୟ ହିଁ ବୟାନ କରୁଥିଲା ଯେ ଓଡିଶାର ସ୍ଥିତି କଣ।