ନିଶା କାରବାର ରୋକିବାକୁ ଡ୍ରାଇଭ, ଏକ ମାସରେ ୧୦କୋଟି ମାଦକ ଦ୍ରବ୍ୟ ଜବତ

ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ନିଶା କାରବାରେ ରୋକ ଲଗାଇବାକୁ ରାଜ୍ୟ ଅବକାରୀ ବିଭାଗର ସ୍ୱତନ୍ତ୍ର ଅଭିଯାନ । ଏକମାସରେ 3143ଟି କେସ ରୁଜୁ ହୋଇଥିବାବେଳେ 2597 ଜଣ ଗିରଫ ହୋଇଛନ୍ତି । ଅଧିକ ପଢନ୍ତୁ

କଟକ: ଅବକାରୀ ବିଭାଗ ଟାର୍ଗେଟରେ ପଞ୍ଚାୟତ ନିର୍ବାଚନ । ନିର୍ବାଚନ ସମୟରେ ନିଶା କାରବାର ରୋକିବାକୁ ବ୍ୟାପକ ପ୍ରସ୍ତୁତି କରିଛି ରାଜ୍ୟ ଅବକାରୀ ବିଭାଗ। ଏହି କ୍ରମରେ ଆରମ୍ଭ ହୋଇଥିବା ସ୍ୱତନ୍ତ୍ର ଅଭିଯାନରେ ବିପୁଳ ପରିମାଣରେ ନିଶା ଦ୍ରବ୍ୟ ଜବତ କରିଛି ଅବକାରୀ ବିଭାଗ । ସାମ୍ବାଦିକ ସମ୍ମିଳନୀରେ ଏନେଇ ସୂଚନା ଦେଇଛନ୍ତି ଅବକାରୀ ବିଭାଗ ଡେପୁଟି କମିଶନର ରାମଚନ୍ଦ୍ର ପାଲଟା।

ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ସ୍ୱତନ୍ତ୍ର ଅଭିଯାନରେ 3143ଟି କେସ ରୁଜୁ ହୋଇଥିବାବେଳେ 2597 ଜଣ ଗିରଫ ହୋଇଛନ୍ତି । ସେହିପରି 90 ହଜର 688 ଲିଟର ଦେଶୀ ମଦ , 8ଲକ୍ଷ 18 ହଜାର150 ଲିଟର ପୋଚ , 4 ହଜାର 9 ସହ51 କିଲୋ ଗଞ୍ଜେଇ, 1061 ଗ୍ରାମ ବ୍ରାଉନ ସୁଗାର ଓ 958 କିଲୋ ଭାଙ୍ଗ ଭଳି ବହୁ ମାଦକ ଦ୍ରବ୍ୟ ଜବତ କରିଛି ଅବକାରୀ ବିଭାଗ । ଯାହାର ଆନୁମାନିକ ମୂଲ୍ୟ 10 କୋଟି ଟଙ୍କା ହେବ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଡେପୁଟି କମିଶନର ।

ସେହିପରି ଗତ ବର୍ଷ ଡିସେମ୍ବର ସୁଦ୍ଧା ଅବକାରୀ ବିଭାଗ ମାଦକ ଦ୍ରବ୍ୟ କାରବାରକୁ ନେଇ 27 ହଜାର 107ଟି କେସ ହୋଇଛି । 22 ହଜାର 355 ଜଣ ଅଭିଯୁକ୍ତକୁ ଗିରଫ କରାଯାଇଛି । 7 ଲକ୍ଷ 32 ହଜାର 437 ଲିଟର ଦେଶୀ ମଦ ଜବତ ହୋଇଛି । 78 ଲକ୍ଷ 20 ହଜାର 871କେଜି ମହୁଲି ପୋଚ, 5 ହଜାର 50ଲିଟର ନକଲି ମଦ, ବିନା ଆୟକର ପଇଠରେ 2034 ଲିଟର ବିଦେଶୀ ମଦ ଓ 3671 ସ୍ପିରିଟ , 21046 କେଜି ଗଞ୍ଜେଇ ଜବତ ହୋଇଛି । ସେହିପରି 9288 .9 କେଜି ବ୍ରାଉନ ସୁଗାର, 581 ଲିଟର କଫ ସିରଫ ଏଵଂ 1532 ଟିମଟର ସାଇକେଲ ଜବତ କରାଯାଇଛି । ଜବତ ସାମଗ୍ରୀର ମୂଲ୍ୟ 97.89 କୋଟି ଟଙ୍କା ହେବ ବୋଲି କହିଛି ବିଭାଗ ।

କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ