କଟକ: ଏସସିବିରେ(SCB) ରୋଗୀଙ୍କ ସମ୍ପର୍କୀୟଙ୍କୁ ଜୁନିୟର ଡାକ୍ତର ମାଡ ମାରିବା ଘଟଣାରେ ତଦନ୍ତ ଆରମ୍ଭ କରିଛି ମଙ୍ଗଳବାଗ ଥାନା ପୋଲିସ । ଡାକ୍ତରଙ୍କ ମାଡର ଶିକାର ହୋଇଥିବା ପୁରୀ ଜିଲ୍ଳା ବ୍ରହ୍ମଗିରି ବାସିନ୍ଦା ପ୍ରତାପ ପରିଡାଙ୍କ ଅଭିଯୋଗ କ୍ରମେ ମଙ୍ଗଳାବାଗ ପୋଲିସ ଏକ ମାମଲା ରୁଜୁ କରିଛି । ଏନେଇ ପୋଲିସ ଘଟଣା ଘଟିଥିବା ନିୟୁ ମେଡିସିନ ଓ୍ବାର୍ଡରେ ଚିକିତ୍ସିତ ହେଉଥିବା ଅନ୍ୟ ରୋଗୀ ଓ ପ୍ରତ୍ୟକ୍ଷଦର୍ଶୀ ଭାବେ ସେମାନଙ୍କ ସମ୍ପର୍କୀୟଙ୍କ ବୟାନ ରେକର୍ଡ କରିଛି ।
ଏହା ପରେ ଗତକାଲି ଡିୟୁଟି କରୁଥିବା ଜୁନିୟର ଡାକ୍ତରଙ୍କର ବୟାନ ରେକର୍ଡ କରାଯିବ । ମଙ୍ଗଳାବାଗ ଥାନାରେ ହୋଇଥିବା ଅଭିଯୋଗ ମୁତାବକ ଦୁଇ ଦିନ ତଳେ ପୁରୀ ଜିଲ୍ଳା ବ୍ରହ୍ମଗିରି ବାସିନ୍ଦା ପ୍ରତାପଙ୍କ ସମ୍ପର୍କୀୟ ଚିକିତ୍ସା ପାଇଁ ଏସସିବିରେ ଭର୍ତ୍ତି ହୋଇଥିଲେ । ସାପ କାମୁଡିଥିବା ସନ୍ଦେହ କରି ଏସସିବିର ଡାକ୍ତରମାନେ ତାଙ୍କୁ ୧୦ଟି ଇଞ୍ଜେକ୍ସନ ଦେଇଥିଲେ । ଏହା ପରେ ଗତକାଲି ଅପରାହ୍ନରେ ରୋଗୀଙ୍କ ମୃତ୍ୟୁ ହେବାରୁ ମୃତକଙ୍କ ପରିବାର ଲୋକେ ଚିକିତ୍ସା ଅବହେଳା ଅଭିଯୋଗ ଆଣିଥିଲେ ଓ ମୃତ ଦେହର ପୋଷ୍ଟମର୍ଟମ କରିବାକୁ ଦାବି କରିଥିଲେ ।