ସମ୍ପାଦକ ପଦ ପାଇଁ ହେବ ରୋଚକ ଲଢେଇ

ଏଥର ଓସିଏ ନିର୍ବାଚନରେ ସମ୍ପାଦକ ପଦକୁ ନେଇ କଡ଼ା ମୁକାବିଲା ହୋଇପାରେ । ପୂର୍ବତନ ସଂପାଦକ ଆଶୀର୍ବାଦ ବେହେରାଙ୍କ ପୁତ୍ର ସଞ୍ଜୟ ବେହେରା ଏହି ପଦ ପାଇଁ ଦାବିଦାର ଅଛନ୍ତି । ତେବେ ଅନ୍ୟତମ ଆଶାୟୀ ପ୍ରାର୍ଥୀ ନବ ପଟ୍ଟନାୟକଙ୍କ ତାଙ୍କୁ କଡା ଟକ୍କର ଦେଇପାରନ୍ତି ବୋଲି ଚର୍ଚ୍ଚା ହେଉଛି ।

କଟକ: ଅକ୍ଟୋବର 20ରେ ହେବ ଓଡିଶା କ୍ରିକେଟ ଆସୋସିଏସନର ନିର୍ବାଚନ । ବିଦ୍ଧିବଧ ଭାବେ ତାରିଖ ଘୋଷଣା ପରେ ନିର୍ବାଚନ ନେଇ ବଢୁଛି ଉଷ୍ମତା । କାହା ମୁଣ୍ଡରେ ହାତୀ ଢାଳିବ ସୁନା କଳସ ? କିଏ ଧରିବ ଓସିଏର ମଙ୍ଗ ? ଏହାକୁ ନେଇ ଆରମ୍ଭ ହୋଇଛି ଆଲୋଚନା ପର୍ଯ୍ୟାଲୋଚନା ।

ନିର୍ବାଚନ ମୈଦାନରେ ଏଥର ଓସିଏର ପୂର୍ବତନ ସମ୍ପାଦକ ତଥା ଭେଟେରାନ ଆଶୀର୍ବାଦ ବେହେରା ନାହିଁନ୍ତି ବୋଲି ଚର୍ଚ୍ଚା ହେଉଛି । ସେଥପାଇଁ ସମ୍ପାଦକ ପଦ ପାଇଁ ଚାଲିଛି କସରତ । ବାପାଙ୍କ ସ୍ଥାନ ନେବାକୁ ପୁଅ ସଞ୍ଜୟ ବେହେରା ସଜ ହେଉଛନ୍ତି ବୋଲି ମଧ୍ୟ ସୂଚନା ମିଳୁଛି । ଓସିଏର ସଦସ୍ୟ ଓ ଭୋଟର ଚାହିଁଲେ ସେ ସମ୍ପାଦକ ହେବାରେ ମୋର କୌଣସି ଅସୁବିଧା ନାହିଁ ବୋଲି କହିଛନ୍ତି ସଞ୍ଜୟ ।

ଦୀର୍ଘ ବର୍ଷ ଧରି ବାରବାଟିର ପରିଚାଳନା ଦାୟିତ୍ବରେ ଥିଲେ ଆଶୀର୍ବାଦ ବେହେରା । 20 ବର୍ଷର ଅଭିଜ୍ଞତା ମଧ୍ୟ ରହିଛି । ତାଙ୍କୁ ପୁରୁଣା ଖିଲାଡି ବୋଲି କହିବାକୁ ପଛାଇ ନାହାଁନ୍ତି ବିରୋଧୀ । ମାତ୍ର ଏଥର ନିର୍ବାଚନରେ ଆର୍ଶୀବାଦ ବେହେରାଙ୍କ ଗୋଷ୍ଠୀ ଜିତିବା କଷ୍ଟ ବୋଲି କହିଛନ୍ତି, ଆଶାୟୀ ସମ୍ପାଦକ ପାର୍ଥି ନବ ପଟନାୟକ । ଅନ୍ୟପଟେ ଏହି ନିର୍ବାଚନରେ ଆଶୀର୍ବାଦ ବେହେରାଙ୍କ ଅନୁପସ୍ଥିତିରୁ ଫାଇଦା ଉଠାଇବା ଲକ୍ଷ୍ୟରେ ରହିଛନ୍ତି ବିରୋଧୀ । ଏପରି ସ୍ଥିତିରେ ଏଥର ନିର୍ବାଚନରେ ସଂପାଦକ ପଦ ପାଇଁ ଲଢେଇ ବେଶ ରୋଚକ ହେବ ବୋଲି ଚର୍ଚ୍ଚା ହେଉଛି ।

କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ