କଟକ: ଆଉ ଦିନ କେଇଟା ପରେ ମହାଶିବରାତ୍ରୀ । ଦେବ ଦେବ ମହାଦେବଙ୍କ ଜାଗର ପର୍ବରେ ରହିଛି ଦୀପର ସ୍ବତନ୍ତ୍ର ଭୂମିକା । ଦୀପଟିଏ ଜାଳି, ଭୋଳାନାଥଙ୍କ ପାଖରେ ସବୁ ଗୁହାରୀ-ଅଳି ଢାଳିଦେବାକୁ ବର୍ଷଟିଏ ଚାହିଁ ରହିଥାଏ ଭକ୍ତ । ତା' ସାଙ୍ଗକୁ ଏଥର ମଧ୍ୟ ହଟିଛି କୋଭିଡ କଟକଣା । ଫଳରେ ଚଳିତ ମହାଶିବରାତ୍ରୀରେ ବଢିଛି ଦୀପର ଚାହିଦା ।
ମହାଦେବଙ୍କ ନିକଟରେ ଲାଗିହେବ ମହାଦୀପ, ଲାଗିବ ଦେଢ କ୍ବିଣ୍ଟାଲ ଘିଅ
ମହାଦେବଙ୍କ ପାଇଁ ଦୀପ ତିଆରି କରୁଥିବା କାରିଗରଙ୍କ ମଧ୍ୟରୁ ଚର୍ଚ୍ଚାରେ କଟକ ବିଡାନାସୀର ସୁରେନ୍ଦ୍ର ବେହେରା । ସୁରେନ୍ଦ୍ରଙ୍କ ହାତରେ ପ୍ରସ୍ତୁତ ହେଉଛି ଦେଢ କ୍ବିଣ୍ଟାଲ ଘିଅ ଧାରଣ କରିପାରୁଥିବା ବୃହତ୍ତମ ଦୀପ । ଏଥିପାଇଁ ଚଳିତବର୍ଷ ଦୀପ ଗଢା ପାଇଁ ଜୋରସୋରରେ ଲାଗିପଡିଛନ୍ତି କୁମ୍ଭାର ପରିବାର । ମାର୍ଚ୍ଚ ୧ ରେ ଅନୁଷ୍ଠିତ ହେବ ଜାଗର ଯାତ । ଦୀପ ତିଆରି କାମ ମଧ୍ୟ ଅଧା-ଅଧି ସରିଲାଣି । ପ୍ରଭୁ ଲିଙ୍ଗରାଜଙ୍କ ପାଇଁ ସୁରେନ୍ଦ୍ର ତିଆରି କରୁଥିବା ସର୍ବବୃହତ୍ତ ଦୀପର କେବଳ ରଙ୍ଗ ଲଗା କାମ ବାକି ରହିଛି ।