କଟକ: ଗତ କିଛିଦିନ ହେବ ଟାଙ୍ଗୀ ଚୌଦ୍ଵାର ବ୍ଲକର ବିଭିନ୍ନ ପଞ୍ଚାୟତରେ ହାତୀ ଉପଦ୍ରବ ଦେଖିବାକୁ ମିଳିଛି । ବ୍ଲକର ସଫା କରଞ୍ଜି ମଙ୍ଗରାଜପୁର, ମହିଂସାଲଣ୍ଡା ଆଦି ପଞ୍ଚାୟତରେ ଥିବା ଧାନ କ୍ଷେତକୁ 17 ହାତୀପଲ ପଶି ବ୍ୟାପକ ଫସଲ ନଷ୍ଟ କରିଥିବା ଦେଖିବାକୁ ମିଳିଛି । ଯାହାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।
ଫସଲ ଉଜାଡୁଛି ହାତୀ, ଚିନ୍ତାରେ ଚାଷୀ
କଟକ ବନଖଣ୍ଡ ଡାଲି ଯୋଡା ରେଞ୍ଜର ବିଭିନ୍ନ ଜଙ୍ଗଲରୁ ହାତୀପଲ ମାନ ଆସି ଅମଳ ହେବାକୁ ଥିବା ଫସଲ ନଷ୍ଟ କରୁଛନ୍ତି । ଚଳିତ ବର୍ଷ ନିଅଣ୍ଟିଆ ବର୍ଷା ପରେ ଧାନରେ ଚକଡ଼ା ପୋକ ଲାଗି ଧାନ ଗଛ ନଷ୍ଟ ହେଉଥିବାବେଳେ ଏବେ ଯାହା କିଛି ଫସଲ ଅମଳ ଲାଗି ବାକି ଅଛି ତାହା ହାତୀ ପେଟକୁ ଚାଲିଯାଉଛି । ଏହାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ସହ ଏ ସଂକ୍ରାନ୍ତରେ ବନବିଭାଗକୁ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁନି ।