କଟକ: କଟକ ମହାନଗର ନିଗମରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ଆଣି ଭିଜିଲାନ୍ସ ନିର୍ଦେଶକଙ୍କୁ ଭେଟିଲା କଂଗ୍ରେସ । କଟକ ସହରର ସଫେଇ କାମ ରାମକୀ କୁ ଦିଆଯାଇ କୋଟି କୋଟି ଟଙ୍କାର ଦୁର୍ନୀତି କରାଯାଇଥିବା ବେଳେ ଏବେ ମଧ୍ୟ ସମାନ ଢଙ୍ଗରେ ବିବିଜି କମ୍ପାନୀକୁ ବିନା ଟେଣ୍ଡରରେ ସହରର ସଫେଇ କାମ ଦିଆଯାଇଥିବା ଅଭିଯୋଗ କରିଛି କଂଗ୍ରେସ।
କଂଗ୍ରେସ ଅଭିଯୋଗ କରିଛି କମ୍ପାନୀ ସହ ମଧୁଚନ୍ଦ୍ରିକା କରି ସିଏମସି ର ଅଧିକାରୀମାନେ କମ୍ପାନୀ କୁ ଅନୁକମ୍ପା ଦେଖାଉଛନ୍ତି । ଏହା ସହ କୋଟି କୋଟି ଟଙ୍କା ଚଳୁ କରୁଛନ୍ତି। ଗତ ସିଏମସି କାଉନସିଲ ବୈଠକରେ କଂଗ୍ରେସର ସମସ୍ତ କର୍ପୋରେଟରମାନେ ବିନା ଟେଣ୍ଡର ରେ ସେହି କମ୍ପାନୀ ସହରର ସଫେଇ କାମ ଦେବାକୁ ଜୋରଦାର ବିରୋଧ କରିଥିଲେ। ସହରର ସଫେଇ ବାବଦରେ ସିଏମସି ରେ ୧୦୦ କୋଟି ରୁ ଉର୍ଦ୍ଧ୍ବ ଟଙ୍କା ର ଦୁର୍ନୀତି ହୋଇଛି ବୋଲି ଅଭିଯୋଗ କରିଛନ୍ତି ବାରବାଟି କଟକ ବିଧାୟକ ମହମ୍ମଦ ମୋକିମ। କରୋନା ସମୟ ପୁରା ଦେଶ ଠପ ହୋଇ ଯାଇଥିବା ବେଳେ କଟକ ସହରରେ ଏହି କମ୍ପାନୀ ବିନା କୌଣସି ଟେଣ୍ଡରରେ ସଫେଇ କାମ କରିଥିଲା । ଆଉ ତାହାରି ମାଧ୍ୟମ ରେ କୋଟି କୋଟି ଟଙ୍କା ହେରଫେର ହୋଇଥିବାର ଅଭିଯୋଗ ଆଣିଛି କଂଗ୍ରେସ।