କଟକ: ଧୀରେ ଧୀରେ କଟକରେ କୋରୋନା ଗ୍ରାଫ ଉପର ମୁହାଁ ହେଉଛି । ଗତ ତିନି ଦିନରେ ସହରରୁ ମୋଟ 41 ଜଣ କୋଭିଡ ସଂକ୍ରମିତ ଚିହ୍ନଟ ହେଲେଣି । ବୁଧବାର 12, ଗୁରୁବାର 13 ଏବଂ ଶୁକ୍ରବାର17 ଜଣ ନୂଆ ଆକ୍ରାନ୍ତ ନିର୍ଦ୍ଧିଷ୍ଟ ଭାବେ ଗୋଟିଏ ଗୋଟିଏ କ୍ଲଷ୍ଟରରୁ ଚିହ୍ନଟ ହେବା ଘଟଣା ସିଏମସିର ଚିନ୍ତା ବଢାଇଛି ।
ବୁଧ ଓ ଗୁରୁବାର ଅରୁଣଦେଓ ନଗର ଥିବା ଏକ ଘରୋଇ ବିଜ୍ଞାନ କଲେଜରୁ କୋଭିଡ ସଂକ୍ରମିତ ଚିହ୍ନଟ ହୋଇଥିବା ବେଳେ ଗୁରୁବାର ରାତିରେ ମଧୁପାଟଣା ଅଞ୍ଚଳରେ ଥିବା ଏକ ଆଶ୍ରମ ସ୍କୁଲରେ 17 ଜଣ କୋଭିଡ ପଜେଟିଭ ଚିହ୍ନଟ ହୋଇଛନ୍ତି । ଏବଂ ସମସ୍ତ ଆକ୍ରାନ୍ତ ସେଠାକାର ଅନ୍ତେବାସୀ ବୋଲି ଜଣା ପଡ଼ିଛି ।
ଏହାପରେ ସେହି ଆଶ୍ରମ ସ୍କୁଲକୁ ସିଏମସି ଆସନ୍ତା ଏପ୍ରିଲ ମାସ 6 ତାରିଖ ପର୍ଯ୍ୟନ୍ତ ବନ୍ଦ କରିବା ନିଷ୍ପତି ନେଇଥିବା ବେଳେ ସମ୍ପୃକ୍ତ ଶିକ୍ଷାନୁଷ୍ଠାନକୁ ସାଇନ-ଏ-ଡାଏ ଘୋଷଣା କରାଯାଇଛି । ଏହା ସହିତ ସେଠାରେ ଚିହ୍ନଟ ହୋଇଥିବା ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଂ ଆରମ୍ଭ କରିଛି ସିଏମସି ।
କୋଭିଡର କେଉଁ ଷ୍ଟ୍ରେନ୍ ସେଠାରେ ସଂକ୍ରମଣ ବୃଦ୍ଧି ଘଟାଇଛି ତାହା ଜାଣିବା ପାଇଁ 7 ଆକ୍ରାନ୍ତଙ୍କ ସ୍ବାବକୁ ସଂଗ୍ରହ କରି ପରୀକ୍ଷା ପାଇଁ ପଠାଯାଇଛି । 7ଟି ମଧ୍ୟରୁ 4ଟି ନମୂନାକୁ ଆର.ଏମ.ଆର.ସି ଏବଂ 3ଟି ଆଇ.ଏଲ.ଏସକୁ ପଠାଯିବ । ଏହାବ୍ୟତୀତ ଶୁକ୍ରବାର ଦିନ ମୋଟ 11 ଶହ ଲୋକଙ୍କର ସ୍ବାବ ସଂଗ୍ରହ ହୋଇଛି । ଏବଂ ସେଗୁଡ଼ିକର ରିପୋର୍ଟ ରବିବାର ସୁଦ୍ଧା ଆସିବ ବୋଲି ସିଏମସି ପକ୍ଷରୁ କୁହାଯାଇଛି ।