ପୂର୍ବ ଶତ୍ରୁତାରୁ ବୋମାମାଡ଼; ଜଣେ ଗିରଫ, 2 ଫେରାର

ପୂର୍ବ ଶତ୍ରୁତାକୁ ନେଇ ଡ଼ଗରପଡା ଅଞ୍ଚଳର ଗୋଲଖ ପରିଡାଙ୍କ ଘର ଉପରକୁ ବୋମାମାଡ ହୋଇଛି । ଏହି ଘଟଣାରେ କୌଣସି କ୍ଷୟକ୍ଷତି ହୋଇ ନ ଥିବା ସୂଚନା ମିଳିଛି । ଏହା ସହିତ ବୋମାମାଡରେ ସମ୍ପୃକ୍ତି ନେଇ ଜଣେ ଗିରଫ ହୋଇଥିବା ବେଳେ ଅନ୍ୟ 2ଜଣ ଫେରାର ଅଛନ୍ତି ।

କଟକ: ପୂର୍ବ ଶତ୍ରୁତାକୁ ନେଇ ଡ଼ଗରପଡା ଅଞ୍ଚଳରେ ବୋମାମାଡ଼ । ଗୋଲଖ ପରିଡାଙ୍କ ଘର ଉପରକୁ ବୋମାମାଡ ହୋଇଛି । ଏହି ଘଟଣାରେ କୌଣସି କ୍ଷୟକ୍ଷତି ହୋଇ ନ ଥିବା ସୂଚନା ମିଳିଛି । ଖବର ପାଇ ଲାଲବାଗ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରି ଗୋଟିଏ ଅଫୁଟା ବୋମା ଜବତ କରିଛି । ଏହାସହ ମୁଖ୍ୟ ଅଭିଯୁକ୍ତ ତଥା କୁଖ୍ୟାତ ଅପରାଧୀ ହାଡିଆ ପରିଡାକୁ ଗିରଫ କରିଛି ।

ସୂଚନା ଅନୁସାରେ, ଅଭିଯୁକ୍ତ ହାଡିଆର ଦାଦାପୁଅ ଭାଇ ଗୋଲଖ ସହ ପୂର୍ବରୁ ଶତ୍ରୁତା ଥିଲା । ଏଥିପାଇଁ ସେ ଗୋଲଖଙ୍କ ଘର ଉପରକୁ ବୋମାମାଡ କରିଥିଲା । ସେପଟେ ଏହି ଘଟଣାରେ ଫେରାର ଥିବା ଅନ୍ୟ 2 ଜଣ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ଉଦ୍ୟମ ଆରମ୍ଭ କରିଛି । ଏହି ଘଟଣା ପରେ ସ୍ଥାନୀୟ ଲୋକମାନେ ଆତଙ୍କିତ ହୋଇ ପଡିଛନ୍ତି ।

କଟକରୁ ନାରାୟଣ ସାହୁ, ଇଟିଭି ଭାରତ