ବିଜୁ ଜୟନ୍ତୀକୁ ଧୁମଧାମରେ ପାଳନ କରିବ ବିଜେଡି

ରାଜ୍ୟ ସରକାରଙ୍କର ୨୦ ବର୍ଷ ପୂରଣ ଅବସରରେ ବଡ଼ ଧରଣର ସମାବେଶ ଆୟୋଜନ କରିବ ବିଜେଡି । ଅଧିକ ପଢନ୍ତୁ...

କଟକ: ବିଜୁ ଜୟନ୍ତୀ, ପଞ୍ଚାୟତ ରାଜ ଦିବସ ଓ ରାଜ୍ୟ ସରକାରଙ୍କର ୨୦ ବର୍ଷ ପୂରଣ ଅବସରରେ ବଡ଼ ଧରଣର ସମାବେଶ ଆୟୋଜନ କରିବ ବିଜେଡି । ଆସନ୍ତା ମାର୍ଚ୍ଚ ୫ ତାରିଖରେ ବିଜୁ ଜୟନ୍ତୀ ଉପଲକ୍ଷେ ଏହି ସମାବେଶକୁ ଆୟୋଜନ କରିବା ପାଇଁ ଗୁରୁବାର କଟକରେ ଏକ ପ୍ରସ୍ତୁତ ବୈଠକର ଆୟୋଜନ କରାଯାଇଥିଲା ।

କଟକ, କେନ୍ଦ୍ରାପଡା, ଯାଜପୁର, ଜଗତସିଂହପୁର ଓ ଢେଙ୍କାନାଳ ଜିଲ୍ଲାର ସମସ୍ତ ବିଧାୟକ, ସାଂସଦ, ମନ୍ତ୍ରୀ ଓ ଲୋକପ୍ରତିନିଧିଙ୍କୁ ନେଇ ଏହି ପ୍ରସ୍ତୁତ ବୈଠକ କରାଯାଇଥିଲା । ତେବେ କଟକ ବାଲିଯାତ୍ରା ପଡ଼ିଆରେ ଏହି ସମାବେଶକୁ କିଭଳି ସଫଳ କରାଯିବ ସେନେଇ ଆୟୋଜିତ ଏହି ବୈଠକରେ ଆଲୋଚନା କରାଯାଇଥିଲା ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ଅନେକ ବିଶିଷ୍ଟ ଅତିଥି ଏହି କାର୍ଯ୍ୟକ୍ରମରେ ଯୋଗଦେବେ । ଏଥିସହ ଦଳ ୨୦ ବର୍ଷରେ ଲୋକଙ୍କ ପାଇଁ କି କି କାମ କରିଛି ସେନେଇ ଲୋକଙ୍କ ପାଖରେ ଉପସ୍ଥାପନ କରାଯିବ ବୋଲି ବୈଠକ ପରେ ଦଳ ପକ୍ଷରୁ ସୂଚନା ଦିଆଯାଇଛି ।

କଟକରୁ ନାରାୟଣ ସାହୁ, ଇଟିଭି ଭାରତ