କଟକ: ବାଇକ ଲୁଟେରାକୁ ଗିରଫ କଲେ ଦରଘାବଜାର ଥାନା ପୋଲିସ। ଦୀର୍ଘଦିନ ଧରି ସହର ଭିତରେ ବାଇକ ଲୁଟର ଆତଙ୍କ ମଚାଇଥିଲା ସେ। ଶେଷରେ ପୋଲିସ ପଞ୍ଝା ରେ ପଡିଛି ଏହି ଲୁଟେରା ।
ସୂଚନା ଅନୁଯାୟୀ, ଗତ ଅଗଷ୍ଟ ୧୩ ତାରିଖ ଦିନ ସିଡିଏ ସେକ୍ଟର ୬ରେ ରହୁଥିବା ହିତେଶ ଶର୍ମା ଏକ ହୋଣ୍ଡା ଆକ୍ଟିଭା ଗାଡି ନେଇ ଏକ ମନ୍ଦିରକୁ ଆସିଥିଲେ। ସେ ଗାଡିକୁ ବାହାରେ ରଖି ମନ୍ଦିରକୁ ପୂଜା କରିବାକୁ ଯାଇଥିଲେ। ଆସିଲା ବେଳକୁ ଜଣେ ଯୁବକ ତାଙ୍କ ଗାଡିକୁ ଚୋରି କରି ନେଉଥିବା ଦେଖିବାକୁ ପାଇଲେ।
ହିତେଶ ଉକ୍ତ ଯୁବକଙ୍କୁ ପିଛା କରିଥିଲେ। ହେଲେ ଯୁବକ ଜଣକ ତାଙ୍କ ଗାଡିକୁ ନେଇ ପଳାଇବାରେ ସକ୍ଷମ ହୋଇଥିଲା । ପରେ ହିତେଶଙ୍କ ବାପା ଏନେଇ ଦରଘାବଜାର ଥାନାରେ ଏଫଆଇଆର ଦେଇଥିଲେ। ପୋଲିସ ଘଟଣାର ତଦନ୍ତ କରି ନିକଟରେ ଲାଗିଥିବା ସିସିଟିଭି ଯାଞ୍ଚ କରି ଲୁଟେରାକୁ ଠାବ କରିଥିଲେ।
ମକରବା ସାହି ଅଞ୍ଚଳର ଧନରାଜୁ ନାମକ ଏହି ଲୁଟେରାକୁ ଗିରଫ କରି ପଚରାଉଚରା କରିବାରୁ ସେ ୩ଟି ବାଇକ ଲୁଟ କରିଥିବା ପୋଲିସ ନିକଟରେ ସ୍ୱୀକାର କରିଥିଲା। ତେବେ ସମ୍ପୃକ୍ତ ଅଭିଯୁକ୍ତଙ୍କ ବିରୋଧରେ ବିଭିନ୍ନ ଥାନାରେ ଅନେକ ଚୋରି ମାମଲା ରହିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି।
କଟକରୁ ନାରାୟଣ ସାହୁ, ଇଟିଭି ଭାରତ
