କଟକ: ରାଜ୍ୟର କୋଣ ଅନୁକୋଣକୁ ଏଠାରୁ ବସ ଗଡୁଛି । ଏହା ମଧ୍ୟ ରାଜ୍ୟର ଏକ ପ୍ରମୁଖ ତଥା ସର୍ବପୁରାତନ ବସଷ୍ଟାଣ୍ଡ । ତେବେ ଆଜି ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡିଛି ଏହି ବାଦାମବାଡି ବସଷ୍ଟାଣ୍ଡ । କଟକ ବାଦମବାଡ଼ି ସ୍ଥିତ ଅନୁଗୁଳ ଓ ପୁରୀ ବସଷ୍ଟାଣ୍ଡରେ ସରକାରଙ୍କ ବିକାଶର ଅସଲ ଚିତ୍ର ଦେଖିବାକୁ ମିଳିଛି । ବସରେ ଚଢିବା, ଓହ୍ଲାଇବା ତ ଦୂରର କଥା, ଚାଲିକି ଯିବା ମଧ୍ୟ ଯାତ୍ରୀଙ୍କ ପାଇଁ ନାହିଁ ନଥିବା ଅସୁବିଧା ସୃଷ୍ଟି କରୁଛି । ଅସରାଏ ବର୍ଷା ହେଲେ କାଦୁଅ ପଚପଚ ସାଙ୍ଗକୁ ସୃଷ୍ଟି ହୋଇଛି କୃତ୍ରିମ ପୋଖରୀ । ଫଳରେ ଯାତ୍ରୀମାନେ ହନ୍ତସନ୍ତ ହେଉଛନ୍ତି । ଏଭଳି ସମସ୍ୟା ଦିନକର ନୁହେଁ ବରଂ ବର୍ଷ ବର୍ଷର । ଫଳରେ ପ୍ରଶାସନର ପ୍ରତିଶୃତି ପାଣିର ଗାର ପାଲଟିଛି ।
ଚାଷ ଜମିର ଭ୍ରମ ସୃଷ୍ଟି କରୁଥିବା ଏହି ସ୍ଥାନଟି ହେଉଛି କଟକ ବାଦମବାଡ଼ି ସ୍ଥିତ ଅନୁଗୁଳ ଓ ପୁରୀ ବସଷ୍ଟାଣ୍ଡର ଚିତ୍ର । ଆଣ୍ଠୁଏ କାଦୁଅ ସାଙ୍ଗକୁ ଚାରିଆଡେ କୁଢକୁଢ ଅଳିଆ ଓ ଆବର୍ଜନା । ଖାଲି ସେତିକି ନୁହେଁ ଅସରାଏ ବର୍ଷାରେ ଷ୍ଟାଣ୍ଡର ରୂପରେଖ ପୁରା ବଦଳିଯାଏ। ସାରା ଓଡ଼ିଶା ତଥା ଅନ୍ୟାନ୍ୟ ରାଜ୍ୟକୁ ବସ ସେବା ଯୋଗାଉଥିବା ଏହି ବସଷ୍ଟାଣ୍ଡ ଆଜି ସମ୍ପୂର୍ଣ୍ଣ ଅବହେଳିତ ହୋଇ ପଡ଼ିରହିଛି । ବର୍ଷ ବର୍ଷ ଧରି ନର୍କ ଯନ୍ତ୍ରଣା ଦେଉଥିବା ବସଷ୍ଟାଣ୍ଡରେ କେବେ ସୁଧାର ଆସିବ ବୋଲି ଯାତ୍ରୀଙ୍କ ଠାରୁ ଆରମ୍ଭ କରି ବସ କର୍ମଚାରୀ ପ୍ରଶ୍ନ କରିଛନ୍ତି । କଟକ ସହରର ମୁଖ୍ୟସ୍ଥଳୀ କହିଲେ ବାଦାମବାଡ଼ି । ପ୍ରତିଦିନ ହଜାର ହଜାର ବସ ବିଭିନ୍ନ ଜିଲ୍ଲା ତଥା ରାଜ୍ୟକୁ ଯାତାୟତ କରେ । ଦୀର୍ଘ 20 ବର୍ଷହେଲା ବସଷ୍ଟାଣ୍ଡର ସମାନ ଅବସ୍ଥା ରହିଆସିଥିବା ଲୋକେ କହିଛନ୍ତି ।