କଟକ: ପ୍ରତାରକ କନେଷ୍ଟବଳକୁ ଗିରଫ କଲା କଟକ ମହିଳା ଥାନା ପୋଲିସ । ଜଣେ ନର୍ସିଂ ଶିକ୍ଷୟତ୍ରୀଙ୍କୁ ବିବାହ ପ୍ରତିଶୃତି ଦେଇ ଶାରୀରିକ ସମ୍ପର୍କ ରଖିଥିଲେ ଅଭିଯୁକ୍ତ କନେଷ୍ଟବଳ । ଦୀର୍ଘ ଦିନ ଏକାଠି ରହିବା ପରେ ପ୍ରେମିକା ବିବାହ ପାଇଁ ଜିଦ ଧରିବାରୁ ପ୍ରତାରକ କନେଷ୍ଟବଳ ଖସି ପଳାଇଥିଲା । ଆଇନକୁ ଫାଙ୍କି ଲୁଚି ବୁଲୁଥିବା କଟକ ରେଳବାଇ ପୋଲିସର କନେଷ୍ଟବଳକୁ ଗତକାଲି(ବୁଧବାର) ମହିଳା ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଜଣକ ହେଉଛନ୍ତି ଅଡ଼ଶପୁର ମଉଜପୁର ଗାଁର ସୋମ୍ୟ ରଞ୍ଜନ ସ୍ବାଇଁ।
ସୂଚନାନୁଯାୟୀ, କଟକ ରେଳବାଇ ଏସ୍ପି କାର୍ଯ୍ୟାଳୟରେ କାର୍ଯ୍ୟରତ କନେଷ୍ଟବଳ ସୋମ୍ୟ ରଞ୍ଜନ ସ୍ବାଇଁ ଦେଖା ଚାହଁ ମଧ୍ୟରେ ଏକ ଘରୋଇ ନର୍ସିଂ ଶିକ୍ଷାନୁଷ୍ଠାନର ଶିକ୍ଷୟତ୍ରୀଙ୍କ ସହ ୨୦୧୫ରୁ ପ୍ରେମ ସମ୍ପର୍କ ଗଢି ଉଠିଥିଲା । ଉଭୟଙ୍କ ମଧ୍ୟରେ ସମ୍ପର୍କ ବେଶ ନିବିଡ଼ ହୋଇଯାଇଥିଲା । ତେବେ ଦୀର୍ଘଦିନ ଏକାଠି ରହିବାପରେ ସୋମ୍ୟଙ୍କୁ ବୈଦିକ ରୀତିରେ ବିବାହ କରିବାକୁ ଯୁବତୀ ଜଣକ ଜିଦ ଧରିବାରୁ ଅଭିଯୁକ୍ତ ଜଣକ ଏଥିରେ ରାଜି ହୋଇନଥିଲେ । ଏପରିକି ତାଙ୍କୁ ଅନେକ ଥର ମାରପିଟ କରିଥିବା ଯୁବତୀ ଜଣକ ଅଭିଯୋଗ କରିଥିଲେ।