ଭୁବନେଶ୍ବର: ରାଜଧାନୀରେ ପାଳିତ ହୋଇଯାଇଛି ବିଶ୍ବ ଋତୁସ୍ରାବ ସ୍ବଚ୍ଛତା ଦିବସ । ଶନିବାର ସ୍ଵେଚ୍ଛାସେବୀ ସଂଗଠନ ଆଇନା ଓ ୟୁନିସେଫ ଓଡ଼ିଶା ସହଭାଗିତାରେ କଲୋଳ ପୁରଷ୍କାର ମହୋତ୍ସବ ଓ ବିଶ୍ବ ଋତୁସ୍ରାବ ସ୍ବଚ୍ଛତା ଦିବସ ଆୟୋଜିତ ହୋଇଥିଲା । ଋତୁସ୍ରାବ ସମ୍ବନ୍ଧୀୟ ଅନ୍ଧବିଶ୍ଵାସକୁ ଦୂର କରିବା ତଥା ସଚେତନତାର ବାର୍ତା ବାଣ୍ଟିବାକୁ ପ୍ରତିବର୍ଷ ଏହି ମହୋତ୍ସବ ହୋଇଆସୁଛି । ତେଣୁ ସଚେତନତା ପାଇଁ ୧୦ଟି ସର୍ବଶ୍ରେଷ୍ଠ କ୍ଷୁଦ୍ର ଚଳଚ୍ଚିତ୍ର, ଚିତ୍ର ପ୍ରଦର୍ଶନ, ରେଡିଓ ଜଙ୍ଗଲ, ଓଡିଶୀ ନୃତ୍ୟ ପ୍ରମୁଖ ପ୍ରଦର୍ଶିତ କରାଯିବା ସହ ପ୍ରତିଭାଙ୍କୁ ପୁରସ୍କାର ବିତରଣ କରାଯାଇଛି ।
ଏହି ଅବସରରେ ଆଇନା ଦ୍ଵାରା ପ୍ରସ୍ତୁତ ଏକ ମ୍ୟୁଜିକ ଭିଡିଓ ଉନ୍ମୋଚିତ କରାଯାଇଛି । ୧୦ଟି ଶ୍ରେଷ୍ଠ ସିନେମା ପୁରସ୍କୃତ ହୋଇଛି । ଭୁବନେଶ୍ଵର ମେୟର ସୁଲୋଚନା ଦାସ ଏହି କାର୍ଯ୍ୟକ୍ରମରେ ଯୋଗଦେଇ ଏଭଳି ଏକ ଭିନ୍ନ ପ୍ରସଙ୍ଗକୁ ସାମନାକୁ ଆଣିବାର ପ୍ରୟାସ କରିଥିବାରୁ ଆଇନା ଓ ୟୁନିସେଫକୁ ଧନ୍ୟବାଦ ଜଣାଇଛନ୍ତି । ଋତୁସ୍ରାବ ପାଇଁ ଏବେ ବି ସମାଜରେ ଅନେକ ଅନ୍ଧବିଶ୍ଵାସ ରହିଛି ଯାହା ଫଳରେ ପ୍ରକୃତ ସତ୍ୟତା ଲୋକଙ୍କ ପାଖରେ ପହଞ୍ଚି ପାରୁନାହିଁ ବୋଲି ନିଜର ମତ ରଖିଥିଲେ ।