ତୋଷାଳିରେ ମନ ମୋହୁଛି ମହିଳାଙ୍କ ଯାଦୁଗରୀ କଳାକୃତି

ରାଜଧାନୀରେ ବେଶ୍ ଧୁମଧାମରେ ଚାଲିଛି 14ତମ ତୋଷାଳି ମେଳା । ଗତ 15ତାରିଖରୁ ଆରମ୍ଭ ହୋଇଥିବା ଏହି ମେଳା ଆସନ୍ତା 27ତାରିଖ ପର୍ଯ୍ୟନ୍ତ ଚାଲିବ । ଆଉ ମେଳାର ମୁଖ୍ୟ ଆକର୍ଷଣ ପାଲଟିଛନ୍ତି ନିଜର କଳାକୃତିରେ ନିର୍ଜୀବ ପଥରକୁ ଜୀବନ୍ତ କରୁଥିବା କିଛି ମହିଳା ।

ଭୁବନେଶ୍ବର: ରାଜଧାନୀରେ ବେଶ୍ ଧୁମଧାମରେ ଚାଲିଛି 14ତମ ତୋଷାଳି ମେଳା । ଏହି ମେଳାର ମୁଖ୍ୟ ଆକର୍ଷଣ ପାଲଟିଛନ୍ତି ନିଜର କଳାକୃତିରେ ନିର୍ଜୀବ ପଥରକୁ ଜୀବନ୍ତ କରୁଥିବା କିଛି ମହିଳା । ପୁରୁଷ କାରିଗର ସହ ତାଳରେ ତାଳ ଦେଇ ପାଦରେ ପାଦ ମିଶାଇ ଏହି ମହିଳାମାନେ କରୁଛନ୍ତି ପଥର ଖୋଦେଇ କାମ ।

ଏହି ମହିଳାମାନେ ପଥରରୁ ଅନେକ ଦେବାଦେଵୀ ସହ ଘର ସଜା ଜିନିଷପତ୍ର ସବୁ ଗଢି ତୋଳି ଦେଉଛନ୍ତି। ପଥର ଖୋଦେଇ କରି ନାନା ପ୍ରକାର ମୂର୍ତ୍ତି ତିଆରୀ କରୁଛନ୍ତି । ଯାହାକୁ କିଣିବା ପାଇଁ ଏହି ମେଳାରେ ଲୋକଙ୍କ ଭିଡ ଜମୁଛି ।

ତେବେ ରାଜ୍ୟ କଳା ଓ ହସ୍ତଶିଳ୍ପ ବିକାଶ ଅନୁଷ୍ଠାନରୁ ସ୍ବତନ୍ତ୍ର ତାଲିମ ନେଇ ଏମାନେ ନିଜର କଳାର ଯାଦୁଗରୀ ଦେଖାଉଛନ୍ତି। ଏହି ପଥର କାରିଗରୀ ବିଦ୍ୟା ଲାଭ କରି ଆଗକୁ ନିଜ ଗୋଡ଼ରେ ଛିଡା ହୋଇ ନିଜେ ସ୍ବାବଲମ୍ବୀ ହେବାର ଆଶା ବାନ୍ଧି ରଖିଥିବା ବେଳେ ବେଶ ଭଲ ଦୁଇ ପଇସା ପାଇ ପରିବାର ଲୋକଙ୍କ ସାହାଯ୍ୟ କରିବା ନେଇ ଲକ୍ଷ୍ୟ ରଖିଛନ୍ତି ଏହି ମହିଳାମାନେ।

ଭୁବନେଶ୍ବରୁ ଶତରୂପା ସାମନ୍ତରାୟ, ଇଟିଭି ଭାରତ