ଭୁବନେଶ୍ବର:ନେତାଙ୍କ ସହ ବସା ଉଠା । ହାଇପ୍ରୋଫାଇଲ ନେତାଙ୍କୁ କରୁଥିଲେ ବ୍ଲାକମେଲ । ଟଙ୍କା ମାଗି ହରଡ ଘଣାରେ ପଡିଲେ ମହିଳା । ତେବେ ହାଇପ୍ରୋଫାଇଲ ନେତାଙ୍କୁ ବ୍ଲାକମେଲ ଅଭିଯୋଗରେ ଗିରଫ କରିଛି ପୋଲିସ ।
ସୂଚନା ଅନୁସାରେ, ଗିରଫ ହୋଇଥିବା ମହିଳା ଜଣକ ହେଉଛନ୍ତି ମଞ୍ଚେଶ୍ବର ଥାନା ଅନ୍ତର୍ଗତ ସତ୍ୟ ବିହାରର ଅର୍ଚ୍ଚନା ନାଗ ଚାନ୍ଦ । ଏହି ମହିଳା ଜଣଙ୍କ ହାଇପ୍ରୋଫାଇଲ ନେତାଙ୍କ ଠାରୁ ଆରମ୍ଭ କରି ଧନିକ ଶ୍ରେଣୀର ଲୋକଙ୍କୁ ଟାର୍ଗେଟ କରୁଥିଲେ । ସେମାନଙ୍କୁ ନିଜ ଜାଲରେ ଫସାଇବା ପରେ ବ୍ଲକ୍ ମେଲ କରୁଥିଲେ । ଏହାପରେ ସେମାନଙ୍କ ଠାରୁ ମୋଟା ଅଙ୍କରେ ଟଙ୍କା ଆଦାୟ କରୁଥିଲେ । ନିଜ ମାନ ସମ୍ମାନକୁ ଦୃଷ୍ଟିରେ ରଖି ସଂପୃକ୍ତ ମହିଳାଙ୍କ ଖସିବା ନିମନ୍ତେ ଅନେକ ଲୋକ ତାଙ୍କୁ ମୋଟା ଅଙ୍କର ଟଙ୍କା ଦେଉଥିଲେ । ଆଉ ଏହି ଟଙ୍କାରେ ଅୟସ କରିବା ସହ ସମ୍ଭ୍ରାନ୍ତ ଜୀବନ ବିତାଉଥିଲେ । ଏନେଇ ଖଣ୍ଡଗିରି ଅଞ୍ଚଳର ଜନୈକ ବ୍ୟକ୍ତି ପୋଲିସ ନିକଟରେ ଅଭିଯୋଗ କରିଥିଲେ । ଅଭିଯୋଗକୁ ଆଧାର କରି ତଥ୍ୟ ପ୍ରମାଣ ଯୋଗାଡ଼ କରିବା ପରେ ଖଣ୍ଡଗିରି ପୋଲିସ ସଂପୃକ୍ତ ମହିଳାଙ୍କୁ ଗିରଫ କରିଥିଲା ।