ଭୁବନେଶ୍ବର: ଦାଦାବଟି ମାଗିଲେ ଲୋକଙ୍କୁ ନା । ଥାନା ଭିତରେ କିନ୍ତୁ ଲାଞ୍ଚକୁ ନାହିଁ ମନା । ଏପରି ଅଜବ କାରବାର କମିସନରେଟ ପୋଲିସକୁ କରିଛି ବଦନାମ । କାରଣ ନିଜ କର୍ମଚାରୀଙ୍କ ଉପରେ ଅଙ୍କୁଶ ଲଗାଇବାରେ ବିଫଳ ପୋଲିସ କମିସନର । ହେଲେ ସହରରେ ଦାଦାବଟି ମାଗୁଥିବା ଲୋକଙ୍କୁ ସାବାଡ ପାଇଁ କରିଛନ୍ତି ଲମ୍ବା ଯୋଜନା ଆଉ ହେଲପଲାଇନ ନମ୍ବର । ଯାହାର ଏକ ଜ୍ବଳନ୍ତ ଉଦାହରଣ ପୁରା କମିସନରେଟସ ପୋଲିସକୁ କରିଛି ବଦନାମ ।
ଧଉଳି ଥାନାର ଏଏସଆଇ ତୋଫାନ ଗୁରୁ ଏକ ମାମଲାର ରଫାଦଫା ପାଇଁ ୧୫୦୦ ଟଙ୍କା ଲାଞ୍ଚ ନେବା ବେଳେ ତାଙ୍କୁ ଧରିଛି ଭୁବନେଶ୍ବର ଭିଜିଲାନ୍ସ । ଏହାପରେ ପଦାରେ ପଡିଛି ପୋଲିସ ବାବୁଙ୍କ ଦାଦାବଟି ତଥା ଲାଞ୍ଚ କାରବାରର ଗୁମର । ମୁଖା ଖୋଲିଛି କମିସନରେଟ ପୋଲିସର କର୍ମଚାରୀଙ୍କ ଲାଞ୍ଚ ନେବାର ନିଆରା ଢଙ୍ଗ । କିପରି ରାଜ୍ୟର ଜଣେ ଦକ୍ଷ ପୋଲିସ ମାତ୍ର କେଇଟା ଟଙ୍କା ପାଇଁ ବିକ୍ରି କରିଦେଉଛନ୍ତି ଦେଉଛନ୍ତି ମୁଣ୍ଡ । ନିରିହ ଲୋକଙ୍କ ଠୁ ଦାଦାବଟି ଭଳି ନେଉଛନ୍ତି ଖୋଲାଖୋଲି ଲାଞ୍ଚ, ଯାହାର ଟିକିଏ ବି ସୁରାକ ପାଉନାହାନ୍ତି ପୋଲିସ କମିସନର ।
ଲାଞ୍ଚ ନେଇ ଧଉଳି ASI ଗିରଫ, 15 ଶହ ଟଙ୍କା ପାଇଁ କମିସନରେଟ ପୋଲିସ ବଦନାମ ପୁର୍ବରୁ ଏଇଭଳି ଅନେକ କର୍ମଚାରୀ ଭିଜିଲାନ୍ସ ଦ୍ବାରା ଗିରଫ ପରେ ମଧ୍ୟ ବଦନାମର ଭୟ ନଥିବା କମିସନରେଟ ପୋଲିସର ଏହା ନିତିଦିନିଆ ଅଭ୍ୟାସ ପରି ମନେହେଉଛି । ପୁରା ଡିପାର୍ଟମେଣ୍ଟ ଏବେ ବଦନାମ ହେଉଥିବା ବେଳେ କମିସନର ନେବେ କି ଏକ ଦୃଢ ପଦକ୍ଷେପ ? ଗଣମାଧ୍ୟମ ସାମ୍ନାରେ କମିସନର ବିବୃତି ରଖି ଦେବେ କି ୫ଟିର ପ୍ରମାଣ?
ସହରବାସୀଙ୍କୁ ଏଭଳି ଲାଞ୍ଚୁଆ ପୋଲିସର କାରନାମା ଏବେ ବେଶ ବ୍ୟଥିତ କରିଛି । ଗୃହ ବିଭାଗ ଓ ମୁଖ୍ୟମନ୍ତ୍ରୀ ଏ ଦିଗରେ ଧ୍ୟାନ ନଦେଲେ ଲାଞ୍ଚ ପାଇଁ ଲୋକଙ୍କ ଆକ୍ରୋଶ ଶିକାର ଯେପରି ରାଜ୍ୟ ସରକାର ନ ହୁଅନ୍ତି ତାହା ଆଶଙ୍କା ସୃଷ୍ଟି କରିଛି । ସେହିପରି ନିମାପଡ଼ା କୃଷି ଉଦ୍ୟାନ ଅଧିକାରୀ ରମାକାନ୍ତ ପରିଡ଼ା୧୦ ହଜାର ଟଙ୍କା ଲାଞ୍ଚ ନେବା ବେଳେ ଗିରଫ କରିଛି ଭୁବନେଶ୍ବର ଭିଜିଲାନ୍ସ ଡିଭିଜନ । ୬୦ ହଜାର ଟଙ୍କାର ସବସିଡ୍ ପାସ କରିବାକୁ ନେଉଥିଲେ କୃଷି ଉଦ୍ୟାନ ଅଧିକାରୀ । ଏହାର ସୁରାକ ପାଇ ରଙ୍ଗବୋଳା ଟଙ୍କା ସହ ସମ୍ପୃକ୍ତ ଲାଞ୍ଚୁଆ ଅଧିକାରୀଙ୍କୁ ଧରିଛି ଭିଜିଲାନସ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
