ଭୁବନେଶ୍ବର: ରାଜ୍ୟରେ ଦିନକୁ ଦିନ ବଢିବାରେ ଲାଗିଛି ମହାମାରୀ କୋରୋନା ସଂକ୍ରମଣ । ଇତି ମଧ୍ୟରେ କେନ୍ଦ୍ର ସରକାର ଅନଲକ-୧ ଘୋଷଣା କରିବା ପରେ ରାଜ୍ୟ ସରକାରଙ୍କ ପକ୍ଷରୁ ଅଣାଯାଇଛି ନୂଆ ଗାଇଡ଼ଲାଇନ । ସଂକ୍ରମିତଙ୍କ ସଂଖ୍ୟା ବଢ଼ୁଥିବାରୁ ଭୁବନେଶ୍ବରରେ ମଧ୍ୟ ସମାନ ନିୟମ ଲାଗୁ ହେବ। ଏହି ନିୟମରେ କୌଣସି ପରିବର୍ତ୍ତନ ହେବ ନାହିଁ ବୋଲି ବିଏମସି ପକ୍ଷରୁ ସ୍ପଷ୍ଟୀକରଣ ଦିଆଯାଇଛି।
ଭୁବନେଶ୍ବରରେ ଅନଲାକ-1; ଯାଣନ୍ତୁ କାହାକୁ ମିଳିବ ଅନୁମତି, କଣ ରହିବ ବନ୍ଦ ବିଏମସି କମିଶନର ପ୍ରେମ ଚନ୍ଦ୍ର ଚୌଧୁରୀଙ୍କ ସୂଚନା ଅନୁସାରେ ଭୁବନେଶ୍ବରରେ ମୋଟ ୧୧ ଜଣ କୋରୋନା ଆକ୍ରାନ୍ତ ଏବେ ଚିକିତ୍ସିତ ହେଉଛନ୍ତି । ଏମାନଙ୍କ ମଧ୍ୟରୁ ୯ ଜଣ ବାହାରୁ ଆସିଛନ୍ତି। ଭୁବନେଶ୍ବରକୁ ମୋଟ ୨୧୮୮ ଜଣ ପ୍ରବାସୀ ଓଡ଼ିଆ ଆସିଥିବା ବେଳେ ଏମାନଙ୍କ ମଧ୍ୟରୁ ୧୨୯୭ ଜଣ ହୋମ କ୍ବାରେଣ୍ଟାଇନରେ ଅଛନ୍ତି । ଅବଶିଷ୍ଟ କ୍ବାରେଣ୍ଟାଇନ ଅବଧି ସାରିଛନ୍ତି। ଦୈନନ୍ଦିନ ଭୁବନେଶ୍ୱରରେ ୩୦୦ରୁ ୪୦୦ କୋଭିଡ ୧୯ ଟେଷ୍ଟ ହେଉଛି। ଏବେ ଭୁବନେଶ୍ୱର କୌଣସି କଣ୍ଟେନମେଣ୍ଟ ଜୋନ ନାହିଁ।
ଅନଲକ ୧ ଘୋଷଣା ହେବା ପରେ ସ୍ମାର୍ଟସିଟି ଭୁବନେଶ୍ବରରେ ଲକଡାଉନ କଟକଣା କିଛି ମାତ୍ରାରେ କୋହଳ କରାଯାଇଛି । ହେଲେ ଭୁବନେଶ୍ବରରେ ଜୁଲାଇ ୩୧ ଯାଏଁ ସମସ୍ତ ସ୍କୁଲ, କଲେଜ ଓ କୋଚିଂ ସେଣ୍ଟର ବନ୍ଦ ରହିବ । ସେହିପରି ଜୁନ ୩୦ ଯାଏଁ ଖୋଲିବନି ସପିଂ ମଲ, ସିନେମା ହଲ ଓ କୌଣସି ଧାର୍ମିକ ଅନୁଷ୍ଠାନ । ୩୦ ପ୍ରତିଶତ କ୍ଷମତାରେ ଖୋଲିବ ହୋଟେଲ। ଅଟୋରେ ସର୍ବାଧିକ ୨ ଜଣ ଯାତ୍ରୀ ଯାତ୍ରା କରିପାରିବେ। ବସରେ ମଧ୍ୟ ସମାନ ସିଟ ଅନୁଯାୟୀ ଯାତ୍ରୀ ବସି ପାରିବେ। ଛେପ ପକାଇଲେ କିମ୍ବା, ମାସ୍କ ନପିନ୍ଧିଲେ ଦେବାକୁ ପଡିବ ଫାଇନ। ପ୍ରଥମ ଓ ଦ୍ବିତୀୟ ଥର ପାଇଁ ୫୦୦ ଟଙ୍କା ଜୋରିମାନା ଦେବାକୁ ପଡିବ। ତୃତୀୟ ଥର ବିନା ମାସ୍କରେ ଗୋଡ କାଢ଼ିଲେ ଗଣିବେ ୧୦୦୦ ଟଙ୍କା । ଚୁଟି କାଟିବା ପାଇଁ ସେଳୁନ ଓ ବିଉଟି ପାର୍ଲରରେ ଆଧାରକାର୍ଡ ବାଧ୍ୟତାମୂଳକ କରାଯାଇଛି ।
ଜୁନ ୩୦ ଯାଏଁ ପ୍ରତି ଶନିବାର ଓ ରବିବାର ଭୁବନେଶ୍ବର ସଟଡାଉନ ହେବ। ସଟଡାଉନ ସମୟରେ ଅତ୍ୟାବଶ୍ୟକ ସାମଗ୍ରୀ ଦୋକାନ, ହସ୍ପିଟାଲ, କ୍ଲିନିକ, ମେଡ଼ିକାଲ ଷ୍ଟୋରକୁ ଅନୁମତି ମିଳିଛି। କୃଷି, ପଶୁପାଳନ ଓ ମତ୍ସ୍ୟଚାଷକୁ ମଧ୍ୟ ଅନୁମତି ପ୍ରଦାନ କରାଯାଇଛି। ଭୁବନେଶ୍ବରରେ ସମସ୍ତ ପାର୍କ ମଧ୍ୟ ସକାଳ ୫ଟାରୁ ଦିନ 10ଟା ଏବଂ ଅପରାହ୍ନ ୪ଟାରୁ ସଂଧ୍ୟା ୬ ଟା ଯାଏଁ ଖୋଲିବ। ଜୁନ ମାସରେ କୋରୋନା ବଢ଼ିପାରେ ବୋଲି ରାଜ୍ୟ ସରକାର ଆକଳନ କରୁଥିବାରୁ ଗାଇଡ଼ ଲାଇନରେ କିଛି ପରିବର୍ତ୍ତନ କରାଯାଇଛି।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
