ଶରତଙ୍କ ନେତୃତ୍ବରେ କଂଗ୍ରେସ ଶୀର୍ଷରେ ପହଞ୍ଚିବ: ନିରଞ୍ଜନ ପଟ୍ଟନାୟକ

ଓଡିଶା କଂଗ୍ରେସର ନୂଆ ମୁଖିଆ ହୋଇଛନ୍ତି ଶରତ ପଟ୍ଟନାୟକ । ଏହାପରେ ବିଦାୟୀ ସଭାପତି ନିରଞ୍ଜନ ପଟ୍ଟନାୟକ କଂଗ୍ରେସ ହାଇକମାଣ୍ଡଙ୍କୁ ତାଙ୍କ ଉପରେ ବିଶ୍ବାସ ଦେଖାଇ ଦାୟିତ୍ବ ଦେଇଥିବାରୁ କୃତଜ୍ଞତା ଜଣାଇଛନ୍ତି । ଅଧିକ ପଢନ୍ତୁ

ଭୁବନେଶ୍ବର: ସମସ୍ତ ଆଲୋଚନା ପର୍ଯ୍ୟାଲୋଚନା, ଚର୍ଚ୍ଚା ଆକଳନ ପରେ ଶେଷରେ ଘୋଷଣା ହୋଇଛି ଓଡିଶା କଂଗ୍ରେସର ନୂଆ ମୁଖିଆ । ପୂର୍ବତନ ସାଂସଦ ପୂର୍ବତନ ପିସିସି ସଭାପତି ତଥା ଅନୁଭବି ଅଖିଳ ଭାରତୀୟ କଂଗ୍ରେସ କମିଟି(AICC) ସଦସ୍ୟ ଶରତ ପଟ୍ଟନାୟକଙ୍କୁ ରାଜ୍ୟ କଂଗ୍ରେସର ମୁଖିଆ ଭାବେ ନିଯୁକ୍ତ କରିଛନ୍ତି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ । ପୂର୍ବତନ PCC ସଭାପତି ନିରଞ୍ଜନ ପଟ୍ଟନାୟକଙ୍କ ଇସ୍ତଫାକୁ ଗ୍ରହଣ କରି ବ୍ୟାପକ ଆଲୋଚନା ପରେ ଶରତଙ୍କ ନାମରେ ମୋହର ମାରିଛନ୍ତି କଂଗ୍ରେସ ହାଇକମାଣ୍ଡ ।

ନିଜ ଇସ୍ତଫା ଗ୍ରହଣ ହେବାପରେ ସାମ୍ବାଦିକ ସମ୍ମିଳନୀ ଜରିଆରେ କୃତଜ୍ଞତା ଜଣାଇଛନ୍ତି ବିଦାୟୀ ସଭାପତି ନିରଞ୍ଜନ ପଟ୍ଟନାୟକ । ଟ୍ବିଟ୍‌ କରି ନିରଞ୍ଜନ କହିଛନ୍ତି, "ଓଡିଶା ପ୍ରଦେଶ କଂଗ୍ରେସ ସଭାପତି ଭାବେ ଶରତ ପଟ୍ଟନାୟକଙ୍କୁ ନିଯୁକ୍ତି ମିଳିଛି । ମୋର ବିଶ୍ବାସ, ଶରତ ପଟ୍ଟନାୟକଙ୍କ ନେତୃତ୍ବରେ ଓଡିଶା କଂଗ୍ରେସ ଶୀର୍ଷରେ ପହଞ୍ଚିବ । ଓଡିଶା କଂଗ୍ରେସକୁ ସଂଗଠିତ ସୁଦୃଢ କରିବା ପାଇଁ ମୋର ସମର୍ଥନ ମାର୍ଗଦର୍ଶନ ଶରତଙ୍କ ପ୍ରତି ରହିବ । ସଫଳତା ପାଇଁ ଶୁଭକାମନା ।"

ସେହିପରି ଓଡିଶା କଂଗ୍ରେସର ସେବା କରିବା ମୋ ପାଇଁ ସମ୍ମାନର କଥା ବୋଲି ନିରଞ୍ଜନ କହିଛନ୍ତି । ଏହାସହ ବିଶ୍ବାସ କରି ଦାୟିତ୍ବ ଦେଇଥିବାରୁ ଦଳର ମୁଖ୍ୟ ସୋନିଆ ଗାନ୍ଧୀଙ୍କୁ କୃତଜ୍ଞତା ଜଣାଉଛି । ସେହିପରି ମୋର କାର୍ଯ୍ୟକାଳ ସମୟରେ ସମର୍ଥନ ସହଯୋଗ ଓ ଦିଗଦର୍ଶନ ଦେଇଥିବାରୁ ସାଂସଦ ରାହୁଲ ଗାନ୍ଧୀଙ୍କୁ ମଧ୍ୟ ଧନ୍ୟବାଦ ଜଣାଉଛି ବୋଲି ନିରଞ୍ଜନ ଟ୍ବିଟ୍‌ କରିଛନ୍ତି । ନିରଞ୍ଜନ ନିଜର ସଭାପତିତ୍ବ କାଳରେ ଓଡିଶାର ପ୍ରଭାରୀ ଭାବେ କାର୍ଯ୍ୟ କରିଥିବା ଜିତେନ୍ଦ୍ର ସିଂ, ଜଗଦିଶ ଟାଇଟଲର, ବର୍ତ୍ତମାନର ପ୍ରଭାରୀ ଚେଲ୍ଲା କୁମାରଙ୍କ ସହ ସହପ୍ରଭାରୀ ରୁଦ୍ର ରାଜୁଙ୍କୁ ମଧ୍ୟ ସହଯୋଗ ସମର୍ଥନ ଓ ମାର୍ଗଦର୍ଶନ କରିଥିବାରୁ କୃତଜ୍ଞତା ଜଣାଇଛନ୍ତି ।

ବ୍ୟୁରୋ ରିପୋର୍ଟ, ଇଟିଭି ଭାରତ